Maku 2:1-28

  • Yesu owukidi mbevo a vola (1-12)

  • Yesu obokele Levi (13-17)

  • Kiuvu mu kuma kia fionkonona (18-22)

  • Yesu, ‘Mfumu a lumbu kia Vundu’ (23-28)

2  Kansi, ke vavioka lumbu yayingi ko, okotele diaka muna Kafanau, e nsangu zimwanganene vo muna nzo kena.  E ndonga ilungalakene muna nzo yavana ke mukedi diaka fulu ko kana nkutu vana mwelo, i bosi oyantikidi kubasamunwina e diambu.  Bantwasidi mbevo a vola, oneto kwa wantu yá.  Kansi wau ke balendele kunlwakisa kwa Yesu ko mu kuma kia ndonga, bafukwidi o nludi vana kena o Yesu, bavuidi wo bangula, bakulumwini e kipoyo kina kilele mbevo a vola.  O Yesu vava kamwene lukwikilu lwau, ovovese mbevo a vola vo: “E mwana, masumu maku malolokelo.”  Asoneki ankaka bakedi vana, bavovele muna ntima miau vo:  “Ekuma muntu ndioyo kavovele mpila yayi? Otiangwini Nzambi. Nani olenda loloka masumu, avo ke mosi kaka ko, Nzambi e?”  Kansi, vana vau o Yesu wau kabakwidi vo i wau beyindulanga, ubavovese vo: “Ekuma nuyindulwilanga mambu mama omo ntima mieno?  Adieyi diasazu mu vova kwa mbevo a vola, ‘O masumu maku malolokelo’ yovo vova vo, ‘Telama, bonga kipoyo kiaku yo diata’? 10  Kansi kimana nwazaya wo vo Mwan’a muntu ovuidi wisa kia loloka masumu ova nza—” ovovese mbevo a vola vo: 11  “Ivovese vo, Telama, bonga kipoyo kiaku, wenda kuna nzo aku.” 12  Otelamene, vana vau obongele kipoyo kiandi, odiete vana bena yau awonso. Awonso basivikidi, bakembelele Nzambi, oku vo: “Ke twasidi mona diambu dia mpila yayi ko.” 13  Wele diaka vana ndambu a mbu, e ndonga yawonso inlende, ubalongele. 14  Una keviokanga, omwene Levi wa mwan’a Alefayo ovuende vana vevakulwilwanga e mpaku, umvovese vo: “Undanda.” Vana vau, otelamene, unlende. 15  I bosi, wele dia muna nzo andi, avakulwisi a mpaku ayingi ye asumuki bezidi vuanda vamosi yo Yesu ye alongoki andi, kadi ndonga muna yau banlende. 16  Kansi, asoneki a Afarisi wau bamwene vo vamosi kedilanga ye asumuki ye avakulwisi a mpaku, bavovese alongoki andi vo: “Kinga vamosi kedilanga ye avakulwisi a mpaku ye asumuki?” 17  Vava kawidi wo, Yesu ubavovese vo: “Ana bena yo vimpi ke bavuidi ngang’a mawuku mfunu ko, kansi ambevo kaka. Kizidi bokela ansongi ko, kansi asumuki.” 18  Alongoki a Yoane ye Afarisi fionkonona* bafionkononanga. Dianu vo, bezidi kunyuvula: “Ekuma alongoki a Yoane ye alongoki a Afarisi befionkonwenanga, kansi alongoki aku ke befionkononanga ko?” 19  O Yesu ubavutwidi vo: “Akundi a toko diansompi ke bena ye kuma kia fionkonona* ko ekolo bena kumosi yo toko diansompi, nga ke wau ko e? Ekolo bena yo toko diansompi ke balendi fionkonona ko. 20  Kansi, vekala ye lumbu yina e toko diansompi kekatulwa vana bena, muna lumbu yayina i befionkonona.* 21  Ke vena muntu ko olondanga e tenda kia nlele ampa muna mvuatu wankulu, kadi o nlele ampa unana mvuatu wankulu yo sakisa e vundu. 22  Diau dimosi, ke vena muntu ko osianga e vinyu ampa muna madila mankulu ma nkand’a bulu. Kadi e vinyu ibukisa madila, e vinyu ifwasuka kumosi ye madila. Kansi, vinyu ampa muna madila mampa ma nkand’a bulu isiwanga.” 23  Una kaviokelenge muna mpatu za masa muna lumbu kia Vundu, alongoki andi bayantikidi tolola ntu mia masa. 24  Afarisi bamvovese vo: “Ekuma bevangilanga edi ke diansongi ko omu lumbu kia Vundu?” 25  Ubavutwidi vo: “Nga ke nwatanga dio ko dina Davidi kavanga vava kakondwa madia yo fwa nzala kumosi ye ana bakala yandi e? 26  Muna tandu kia Abiata wa ngang’ambuta, o Davidi wakota muna nzo a Nzambi yo dia mbolo zatambikwanga vana ndose a Nzambi, edi ke diansongi ko mu dia zo, nanga anganga kaka, wavana mpe zankaka kw’awana bakala yandi.” 27  I bosi, ubavovese vo: “E lumbu kia Vundu kiavangilwa mu kuma kia wantu, kansi o wantu ke bavangilwa mu kuma kia lumbu kia Vundu ko. 28  Dianu vo, Mwan’a muntu i Mfumu a lumbu kia Vundu.”

Mvovo vana yand'a lukaya

Yovo “mina nsoki.” Tala Nsas’a Mvovo.
Yovo “mina nsoki.” Tala Nsas’a Mvovo.
Yovo “mina nsoki.” Tala Nsas’a Mvovo.