Maku 13:1-37

  • MBANINU A TANDU (1-37)

    • Vita, nzakama za ntoto, mvengele (8)

    • Nsangu zambote zisamunwa (10)

    • Mpasi zayingi (19)

    • Ngiz’a Mwan’a muntu (26)

    • Kingana kia nsanda (28-31)

    • Nuyingila (32-37)

13  Una kavaikidinge muna tempelo, nlongoki andi mosi umvovese vo: “E Nlongi, tala mfunu mia matadi ye nzo zazi!”  Kansi, Yesu umvovese vo: “Nga omwene nzo zazi zampwena? Ke vesala tadi va ntandu tadi ko ovava, dina dilembi kunkumunwa.”  Una kavuende vana Mongo a Olive mantalani ye tempelo, Petelo, Yakobo, Yoane yo Andere banyuvuidi vana va yau kaka, oku vo:  “Utuzayisa, nkia ntangwa mekala e mambu mama? Nki i sinsu kikala vava e mambu mama mawonso meluaka ku mbaninu?”  Yesu oyantikidi kubavovesa vo: “Nutoma kuyikenga valembi kala muntu okunuvukumuna.  Ayingi bekwizila muna nkumbu ame yo vova vo, ‘Mono i Kristu,’ yo vukumuna wantu ayingi.  Vava nuwá vita ye nsangu za vita, ke nutelamwa mioyo ko; mambu mama mafwete vangama, vo i mbaninu* ke yayizidi ntete ko.  “Kadi zula kitelamena zula, kintinu kitelamena kintinu; mukala nzakama za ntoto muna zunga eki ye kiankaka; mukala mpe mvengele. Omama i lubantiku lwa nsongo.  “Nutoma kuyikenga. O wantu bekunuyekola kuna mbazi za nkanu, bekunuwanda muna masambilu, yo telameswa vana ndose ayadi ye atinu muna kuma kiame, muna umbangi kwa yau. 10  E nsangu zambote ziteka samunwa muna zula yawonso. 11  Avo banubakidi muna kunuyekola kuna mbazi a nkanu, ke nutokani ko kana aweyi nuvova; konso dina nuvewa muna ntangwa yayina, i nuvova, kadi ke yeno ko nuvova, kansi mwand’avelela kaka. 12  Kuna diak’e sambu, mpangi oyekola mpangi andi kavondwa, o se mpe mwan’andi, o wana betelamena mase mau yo kubavondesa. 13  Wantu awonso bekunumenga mu kuma kia nkumbu ame. Kansi ndiona ozindalala yakuna mbaninu, yandi ovuluzwa. 14  “Kansi, vava numona má kiangemi, kiamfwasi, kitelamene vana ke kifwete kala ko, (o ntangi, yambula kasadila umbakuzi), ana bena muna Yuda yambula batinina muna miongo. 15  Ndiona una vana nludi a nzo kakulumuki ko, ngatu kota kabonga má kina muna nzo andi; 16  ndiona una muna mpatu kavutukila ko lekwa kasisidi, kenda bonga kinkutu kiandi. 17  Tâtu kwa akento bayimita y’awana beyemeka muna lumbu yayina! 18  Nusambanga kimana e ntin’eno yalembi kala mu nsungi a sivu;* 19  kadi e lumbu yayina yampasi ikala, zina ke zateka kala ko tuka kuna lubantiku lwa nsem’a Nzambi yamu wau, ke zikala diaka ko. 20  Kele vo Yave kakufika e lumbu yayina ko, ke vadi vuluka nkutu muntu ko, kansi mu kuma ki’awana basolwa, wakufika e lumbu yayina. 21  “Diau dimosi mpe, avo muntu unuvovese vo, ‘Tala! O Kristu una vava,’ yovo ‘Kûna i kena!’ ke nukwikila wo ko. 22  Kadi Kristu zaluvunu ye ngunza zaluvunu zibundumuka yo vanga sinsu ye masivi, mu vukumuna ana basolwa, avo dilendakana. 23  Vo i yeno, nuyikenga. Ntekele kunuzayisa mawonso. 24  “Muna lumbu yayina, vava kifokoka e mpasi zazina, o ntangwa obukama e tombe, e ngonde ke ivana diaka miezi ko, 25  e ntetembwa zibetomoka tuka kuna zulu, ye ngolo za zulu zinikunwa. 26  I bosi, bemona Mwan’a muntu okwizila muna matuti ye nkum’ayingi yo nkembo. 27  Otuma mbasi zandi, balungalakesa awana basolwa muna konko* yau yá, tuka kuna nsuk’a nza yakuna nsuka e zulu. 28  “Nulongoka kingana eki muna nsanda: Avo tayi yandi isavukidi makaya, nuzeye wo vo e nsungi a mvula ifinamene. 29  Diau dimosi mpe, oyeno avo numwene mambu mama mawonso mavangamene, nuzaya wo vo va mwelo se kena. 30  Kieleka, inuvovese vo, e mbandu yayi ke ikuviokela nkutu ko yavana mambu mama mawonso mevangama. 31  E zulu ye nza vioka ivioka, kansi mambu mame ke mevioka nkutu ko. 32  “Mu kuma kia lumbu kiakina yovo ola, ke vena muntu ko ozeye kio, kana nkutu ambasi kuna zulu ngatu Mwana, kansi Se kaka. 33  Nutoma tala, nuyingila, kadi ke nuzeye yo ko e ntangwa yasikidiswa. 34  Diau dimosi yo muntu wele mu nkangalu, osisidi nzo andi, ovene wisa kwa ntaudi zandi, konso muntu ye salu kiandi, yo kanikina nemwelo kayingilanga. 35  Dianu vo, nuyingila, kadi ke nuzeye yo ko e ntangwa ikwiza mfumu a nzo, kana masika, ovo mu dingidingi, ovo muna nkielo a kuma,* ovo mu mene-mene, 36  kimana vava keluaka kuna kinsalukisa, kalembi kunuwana ku nsi a tulu. 37  Kansi, owu inuvovese, mpovele wo mpe kw’awonso: Nuyingila.”

Mvovo vana yand'a lukaya

Yovo “mbaninu a nza.”
Yovo “mbangala.”
Yovo “tembwa yá.”
Sina, “muna nkokol’a nsusu.”