Maku 10:1-52

  • Longo ye vonda longo (1-12)

  • Yesu osambwidi yingiana-ngiana (13-16)

  • Kiuvu kia toko dia mvuama (17-25)

  • Bembola maka mambu muna wete dia Kintinu (26-31)

  • Lufwa lwa Yesu lusakwilu diaka (32-34)

  • Ndomb’a Yakobo ye Yoane (35-45)

    • Yesu wavana moyo andi se lukûlu lwa wantu ayingi (45)

  • Batimai wa mpofo owukilu (46-52)

10  Okatukidi kwakuna, olueke muna mingilu mia Yuda, kuna simu dia Yodani, e ndonga yizidi vana kena. Wau vo i fu kiandi, oyantikidi diaka kubalonga.  Afarisi bezidi muna kuntonta, banyuvuidi kana vo diansongi kwa yakala mu vonda longo yo nkaz’andi.  Ubavutwidi vo: “Mose adieyi kanukanikina?”  Bavovele vo: “Mose wayambula vo yakala kasoneka nkand’a vondela longo yo kunsindika.”  Yesu ubavovese vo: “Mu kuma kia bâla kwa ntima mieno i kanusoneken’o nkanikinu wau.  Kansi kuna lubantiku, vava Nzambi kasema wantu, ‘Wabasema yakala yo nkento.  Muna kuma kiaki o yakala osisa se diandi yo ngudi andi,  yau wole bekala se nitu mosi,’ ke nwole diaka ko, kansi nitu mosi.  Dianu vo, kina kiayikakeswa kwa Nzambi, o muntu kavambanisa ko.” 10  Vava bakotele muna nzo, alongoki banyuvuidi diambu diadi. 11  Ubavovese vo: “Konso yakala ovonda longo yo nkaz’andi, kasompa wankaka, zumba katele yo sumukina nkaz’andi, 12  avo nkento ovondele longo yo nkaz’andi, kasompa wankaka, zumba katele.” 13  I bosi, wantu bantwasidi yingiana-ngiana kimana kabasimba, kansi alongoki babasimini. 14  Una kamwene wo, Yesu okendalele yo kubavovesa vo: “Nuyambula yingiana-ngiana yiza kwa mono; ke nubasimi ko, kadi e Kintinu kia Nzambi kia awana bena nze yingiana-ngiana yayi. 15  Kieleka inuvovese vo, konso ona olembi tambula Kintinu kia Nzambi nze kingiana-ngiana, ke kota mo nkutu ko.” 16  Owonzakene yingiana-ngiana, ubasambwidi yo kubatenseka o moko. 17  Una se kevaika, muntu mosi wizidi e ntinu yo fukama vana ndos’andi, unyuvuidi vo: “E Nlongi Ambote, adieyi mfwete vanga muna vua moyo a mvu ya mvu?” 18  Yesu umvovese vo: “Ekuma ungikidi vo wambote? Ke vena muntu ambote ko, Nzambi kaka. 19  E nkanikinu ozeye mio: ‘Kuvondi ko, kute zumba ko, kuyiyi ko, kusie kimbangi kia luvunu ko, kuvunginiki ko, zitisa se diaku yo ngudi aku.’” 20  Umvovese vo: “E Nlongi, mawonso mama ilundanga mo tuka muna kileke kiame.” 21  Yesu untadidi, unzolele, umvovese vo, “Diambu dimosi okondelo: Wenda teka yawonso una yau yo vana nzimbu kw’asukami, okala yo lusalu kuna zulu; wiz’andandi.” 22  Kansi okendalele muna mvutu zazi, wele ye ntantu zawonso, kadi nkwa mavua mayingi. 23  Una katadidi oku y’oku, Yesu ovovese alongoki andi vo: “Diampasi kw’awana bena ye nzimbu mu kota muna Kintinu kia Nzambi!” 24  Kansi alongoki basivikidi muna mvovo miandi. I bosi, Yesu ovutwidi vo: “E wana, diampasi kikilu mu kota muna Kintinu kia Nzambi! 25  Diasazu kwa samo kaviokela muna disu dia ntumbu, ke mu mvuama ko kakota muna Kintinu kia Nzambi.” 26  Basivikidi kikilu, banyuvuidi* vo: “Nani olenda vuluzwa?” 27  Yesu ubatadidi, ovovele vo: “Kuna kwa wantu ke dilendakana ko, kansi kuna kwa Nzambi, mawonso malendakana.” 28  Petelo umvovese vo: “Oyeto tusisidi yawonso yo kulanda.” 29  Yesu ovovele vo: “Kieleka inuvovese vo, ke vena muntu ko wasisa nzo yovo mpangi yovo nsanga yovo ngudi yovo se yovo wana yovo mpatu muna kuma kiame ye mu kuma kia nsangu zambote 30  kalembi tambula nkama-nkama omu kolo kiaki—nzo, mpangi, nsanga, ngudi, wana, ye mpatu, kumosi ye lubangamu—muna tandu* kikwiza, moyo a mvu ya mvu. 31  Kansi, ayingi bavita besukinina, ana basukinina bevita.” 32  Una se betomboka kuna Yerusaleme, muna nzila Yesu ubavitidi kuna ntwala, alongoki andi basivikidi kikilu, kansi ana banlende bamwene wonga. Obongele diaka yau Kumi ye Zole ubanete va yau kaka, oyantikidi kubasamunwina mawonso mekumbwila, oku vo: 33  “Wau se tutomboka kuna Yerusaleme, o Mwan’a muntu oyekolwa vana moko ma nganga zambuta ye asoneki. Bekunzengela tumbu kia lufwa yo kunyekola kwa esi zula,* 34  oyau bekunsakanena yo kuntaulwila mete, bekunzwabula yo kumvonda, kansi muna lumbu kietatu ofuluka.” 35  I bosi, Yakobo ye Yoane, wan’a Zebedayo, bamfinamene, bamvovese vo: “E Nlongi, tuzolele vo watuvangila konso dina tukulomba.” 36  Ubavovese vo: “Adieyi nuzolele yanuvangila?” 37  Bavutwidi vo: “Utuyambula twavuanda, mosi kuna koko kwaku kwalunene, wankaka kuna koko kwalumonso, muna nkembo aku.” 38  Kansi, Yesu ubavutwidi vo: “Oyeno ke nuzeye dio ko dina nulombele. Nga nulenda nua e kopo dina inua yovo vubwa e mvubwa ina ivubw’e?” 39  Bamvovese vo: “Tulenda kweto.” Yesu ubavovese vo: “E kopo dina inua, nulenda dio kweno nua, e mvubwa mpe ina mvubwa, nulenda yo vubwa. 40  Kansi, edi dia vuanda kuna koko kwame kwalunene yovo kwalumonso, ke diame ko yanuvana dio, kadi dia awana kaka bakubikilwa dio kwa Se diame.” 41  Yau kumi vava bawidi wo, bafungidi makasi mu kuma kia Yakobo yo Yoane. 42  Kansi, o Yesu ubabokele, ubavovese vo: “Nuzeye wo vo awana beyalanga e zula, bediatidilanga nkangu, e nene miau mpe bena ye wisa muna yau. 43  Ke wau ko difwete kala vovo nwina; kansi konso ona ozolele kala nene vovo nwina, kafwete kala selo kieno, 44  konso ona ozolele kala se ntu vovo nwina, kafwete kala se ntaudi kwa yeno awonso. 45  Kadi o Mwan’a muntu kayiza sadilwa ko, kansi kasadila kaka yo vana moyo andi se lukûlu lwa wantu ayingi.” 46  I bosi, balueke muna Yeriko. Kansi, una se kevaika muna Yeriko y’alongoki andi ye ndong’ayingi, Batimai (mwan’a Timai), mpofo walombanga tukau, ofongele vana mbel’a nzila. 47  Vava kawa vo i Yesu wa Nazarete, oyantikidi o kaza, oku vo: “E Yesu, e Mwan’a Davidi, umfwil’e nkenda!” 48  Ayingi bantumbidi, bamvovese vo kabutama, kansi osakisi diaka o kaza, oku vo: “E Mwan’a Davidi, umfwil’e nkenda!” 49  O Yesu oningamene yo vova vo: “Numbokela keza oku ngina.” Babokele mpofo, bamvovese vo: “Yangalala! Telama; yandi ubokele.” 50  Otubidi yunga kiandi, otelamene, wele kwa Yesu. 51  I bosi, Yesu unyuvuidi vo: “Adieyi ozolele yavanga kwa ngeye?” O mpofo umvutwidi vo: “E Raboni,* yambula yamona diaka.” 52  Yesu umvovese vo: “Wenda kwaku. Lukwikilu lwaku lusaswidi.” Vana vau omwene, oyantikidi kunlanda muna nzila.

Mvovo vana yand'a lukaya

Dilenda kala vo, “bayuvuzianini.”
Tala Nsas’a Mvovo.
Awana bena vo ke Ayuda ko.
I sia vo “Nlongi.”