Lusengomono 2:1-29

  • Nsangu kwa nkutakani a Efeso (1-7), Semurena (8-11), Pengamo (12-17), ye Tuatira (18-29)

2  “Kuna kwa mbasi a nkutakani ina muna Efeso soneka vo: I mau mama mavovele ndiona osimbidi ntetembwa nsambwadi vana koko kwandi kwalunene yo kangala vana kati kwa zangikilwa nsambwadi ya mini ya wolo:  ‘Nzeye mavangu maku, mfuntuk’aku yo luzindalalu lwaku, ovo kulendi tonda wantu ambi ko, otontanga awana bekiyikilanga vo antumwa, kansi ke antumwa ko, omwene vo akwa luvunu.  Osonganga mpe luzindalalu, ozizidilanga muna diambu dia nkumbu ame yo lembi yoya.  Kansi, edi ngina diau kwa ngeye, wayambwidi o zola wakala kwau kuna lubantiku.  “‘Dianu vo, sungamena una wakala vitila wabwa, viluka ntima yo vutukila mavangu maku mantete. Avo kuvilukidi o ntima ko, ikwiza kwa ngeye, yakatula zangikilwa kiaku kia mini vana fulu kiandi.  Kansi, edi diambote wina diau: Omengene mavangu ma alandi a malongi ma Nikolao, mana mono imenganga mpe.  Ndiona una yo matu, yambula kawá edi divovele mwanda kwa nkutakani: Ndiona osunda ikunyambula kadia e bundu kia nti a moyo una muna paradiso ya Nzambi.’  “Kuna kwa mbasi a nkutakani ina muna Semurena soneka vo: I mau mama mavovele ‘Ndiona Wantete ye Wansuka,’ ona wakala wafwa ye una diaka moyo:  ‘Nzeye mpasi zaku yo usukami waku—kansi u mvuama—ye lutiangu lwa awana bekiyikilanga vo Ayuda, kansi ke Ayuda kwau ko, oyau i sambilu dia Satana. 10  Kumoni wonga ko mu kuma kia mpasi zina omona. Nkadi ampemba osia ankaka omo yeno muna pelezo kimana nwatontwa kikilu, numona e mpasi mu lumbu kumi. Zizidila ye kwikizi kana nkutu yamuna lufwa, ikuvana kolowa kia moyo. 11  Ndiona una yo matu, yambula kawa edi divovele mwanda kwa nkutakani: Ndiona osunda kemona nkutu lufwa lwazole ko.’ 12  “Kuna kwa mbasi a nkutakani a Pengamo soneka vo: I mau mama mavovele ndiona wina yo nsosolo wandá, watwá, wa meno mole: 13  ‘Nzeye koko wina, i sia vo, koko kwina e kunda kia Satana; kansi osimbinini nkumbu ame, kuvakwidi nkalu ko muna lukwikilu lwaku omu mono, kana nkutu muna lumbu ya Antipa wa mbangi ame akwikizi, ona wavondelwa ovo ndambu eno, koko kukalanga Satana. 14  “‘Kansi, mambu mandwelo ngina mau kwa ngeye, wina ye awana belandanga malongi ma Bilami, ona walonga Balaki kasia e sakuba vana vena wan’a Isaele kimana badia yimenga ya teke yo tá zumba.* 15  Diau adimosi, ongeye mpe wina ye awana belandanga malongi ma Nikolao. 16  Dianu vo, viluka o ntima, avo ke wau ko, ikwiza kwa ngeye mu nzaki, ikubanwanisina muna nsosolo wandá wa nu’ame. 17  “‘Ndiona una yo matu, yambula kawá edi divovele mwanda kwa nkutakani: Ndiona osunda ikumvana ndambu a mana ina yaswekwa, ikumvana mpe tadi diampembe yo soneka vana tadi e nkumbu ampa ina ke izayakene kwa muntu ko, nanga vo ndiona kaka oveno yo.’ 18  “Kuna kwa mbasi a nkutakani a Tuatira soneka vo: I mau mama mavovele o Mwan’a Nzambi, ndiona wina yo meso nze nlaku a tiya yo malu nze nsongo ambote: 19  ‘Nzeye mavangu maku, zola kwaku, lukwikilu lwaku, uselo waku yo luzindalalu lwaku, o mavangu maku mansuka masundidi oma mantete. 20  “‘Kansi, edi ngina diau kwa ngeye, oyambulwidi nkento ndioyo Izebele, ona okukiyikilanga vo ngunza ankento, olonganga yo vukumuna ntaudi zame batá e zumba* yo dia yimenga ya teke. 21  Imvene ntangwa kaviluka o ntima, kansi kazolele viluka ntima ko muna zumba* yandi. 22  Tala, omono se ikuntuba vana mfulu a mayela, ye mpasi zayingi kw’awana betanga yandi e zumba, nanga vo baviluka e ntima muna mavangu mandi. 23  O wan’andi ikubavondela muna vuku kiampondi, kimana e nkutakani zawonso zazaya wo vo omono isatanga e nsi a mbundu* ye ntima yo kunusendela konso muntu mun’owu wa mavangu mandi. 24  “‘Kansi, mpovele kwa ankaka muna yeno luna muna Tuatira, awonso ana ke belanda longi diadi ko, ye awana balembele zaya oma meyikilwanga vo “mambu masina ma Satana”: Kinutensekele zitu diankaka ko. 25  Kansi, nusimbinina mana nwina mau yavana nkwiza. 26  Ndiona osunda yo landa nzila zame yakuna nsuka, ikumvana e wisa kia zula, 27  ovungula nkangu muna mvuala ya sengwa, kimana bakosomonwa nze yinzu ya tûma, wauna yatambula kwa Se diame. 28  Ikumvana ntetembwa ankielelo. 29  Ndiona una yo matu yambula kawa edi divovele mwanda kwa nkutakani.’

Mvovo vana yand'a lukaya

Tala Nsas’a Mvovo.
Tala Nsas’a Mvovo.
Muna Kingerekia, por·neiʹa. Tala Nsas’a Mvovo.
Yovo “makani maswekama.” Sina, “nguba.”