1 Timoteo 1:1-20

  • Mavimpi (1, 2)

  • Lulukisu mu kuma kia alongi aluvunu (3-11)

  • Paulu wafwilw’e nkenda (12-16)

  • Ntinu a mvu ya mvu (17)

  • ‘Nwana ndwan’ambote’ (18-20)

1  Paulu, wa ntumw’a Kristu Yesu muna lutumu lwa Nzambi wa Mvuluzi eto yo Kristu Yesu wa vuvu kieto,  kuna kwa Timoteo* wa mwan’ame kikilu muna lukwikilu: Nsambu oko wina, ye nkenda, ye luvuvamu lutuka kwa Nzambi wa Se yo Kristu Yesu wa Mfumu eto.  Wauna yakasakesela vo wakala kaka muna Efeso ekolo omono yayenda kuna Makedonia, i diau mpangidi owau, kimana wakanikina ankaka balembi longa mambu mankaka,  ngatu sia e sungididi muna tusansu twaluvunu ye tuvila. Mambu mama ke mena nkutu mfunu ko, mpaka kaka metukisanga, ke mambu matukidi kwa Nzambi ko malenda kumika lukwikilu.  Kieleka, e kani dia luludiku* lwalu i zola kuna kutukanga muna ntim’avelela ye muna ntona zambote yo lukwikilu lwakondwa kivunina.  Wau babembwele mambu mama, ankaka bakivene muna moko yakondwa mfunu.  Bazolele kala alongi a nsiku, kansi ke bebakulanga ko mana bevovanga yovo mana besiandamenanga.  Tuzeye wo vo o Nsiku wambote avo muntu olemvokele wo una ufwene,  yo zaya vo o nsiku ke wasiwa mu kuma kia muntu ansongi ko, kansi mu kuma kia yimpumbulu, akolami, mindembi vumina Nzambi ye asumuki, minkondwa kwikizi* ye akwa lutiangu, avondi a mase ye ngudi ye wantu ankaka, 10  minta-zumba,* akala belekananga ye akw’au akala, anatumuni a wantu, akwa luvunu, mindia ndofi zaluvunu ye mawonso ke mena ngwizani ko ye longi diavimpi* 11  mun’owu wa nkembo a nsangu zambote za Nzambi a kiese, zina yayekekwa. 12  Ntondele Kristu Yesu wa Mfumu eto, ona wankumika, kadi wambadikila vo i nkwa kwikizi wau kangiekeka uselo, 13  kana una vo ntianguni a Nzambi yakala ye mbangiki ye nkwa nsoki. Kansi yafwilwa e nkenda kadi ku bubu* yavangilanga wo yo kondwa lukwikilu. 14  E nsambu za Mfumu eto zawokela kikilu omu mono kumosi yo lukwikilu yo zola kuna muna Kristu Yesu. 15  E diambu diadi diaziku ye difwene tambulwilwa e mvimba: Kristu Yesu wayiza ova nza mu vuluza asumuki. Vana bena, omono i nsundidi. 16  Kana una vo i wau, yafwilwa e nkenda kimana muna mono ngina vo nsundidi osumuka, Kristu Yesu i kasongela luzindalalu lwandi lwawonso, kankitula se mbandu kw’awana bekwikila muna yandi muna vua moyo a mvu ya mvu. 17  Kuna kwa Ntinu a mvu ya mvu, olembi wolakana yo lembi moneka, wa Nzambi mosi kaka, kwa yandi zitu yo nkembo yamu mvu ya mvu. Amen. 18  E mwan’ame Timoteo, ivene luludiku* lwalu mun’owu wa ungunza wavovelwa mu kuma kiaku, una onwaninanga e ndwan’ambote, 19  wasimbinina lukwikilu ye ntona zambote, zina ankaka babembola, yo vidisa lukwikilu lwau nze nzaza idimukini. 20  Imenai yo Alesandero i ankaka muna wantu awaya, ibayekwele kwa Satana kimana balongoka vo ke batianguni diaka Nzambi ko.

Mvovo vana yand'a lukaya

Ina ye nsasa vo, “Ndiona Ovuminanga Nzambi.”
Yovo “nkanikinu.”
Yovo “minkondwa zola kwakieleka.”
Tala Nsas’a Mvovo, “Zumba.”
Yovo “diambote; diamfunu.”
Yovo “kondwa zayi.”
Yovo “nkanikinu.”