1 Petelo 4:1-19

  • Zinga mu vanga luzolo lwa Nzambi nze i Kristu (1-6)

  • E mbaninu a lekwa yawonso ifinamene (7-11)

  • Mona mpasi wau vo u Nkristu (12-19)

4  Wau kina vo Kristu wamona mpasi muna nitu, oyeno mpe nukala yo nyindu* wau mosi; e kuma kadi ndiona omwene mpasi muna nitu oyambwidi masumu,  kimana kazinga muna kolo kiandi kisidi muna nitu, ke mu vanga zolela ya wantu ko, kansi luzolo lwa Nzambi kaka.  Kadi e ntangwa nwaviokesa muna vanga zolela ya esi zula* yafwana, vava nwayivananga muna mavangu mansoni,* zolela yambi, nkolwa, nkemba,* nua vinyu ayingi ye nsambila za teke zangemi.  Wau vo ke nukangalanga diaka e ntwadi ko muna zingu kiau kia usafu, besivikanga yo kunutianguna.  Kansi, wantu awaya mbalu beta kwa ndiona okubamene mu fundisa awana bena moyo y’awana bafwa.  Kiaki i kuma e nsangu zambote zasamunwinwa mpe kwa mafwa, kimana bafundisilwa muna nitu mun’owu wa ngindu za wantu, kansi muna ngindu za Nzambi bakala moyo mun’owu wa mwanda.  Kansi e mbaninu a lekwa yawonso ifinamene. Dianu vo, nulungalala, nuyingilanga* muna sambu.  Vana ntandu a mambu mawonso, nuzolaziananga, kadi o zola kufuka ulolo wa masumu.  Nutambuziananga kuna zola, lembi yidima.* 10  Konso muntu vovo nwina muna tezo kina katambulwila o lukau, yambula kasadila lo muna wete dia muntu yo nkw’andi nze selo yambote ya nsambu za Nzambi zina zimonekanga muna mpila zayingi. 11  Avo muntu ovova, yambula kavova mambu ma Nzambi; avo muntu osala, yambula kasadila mun’owu wa ngolo kevananga o Nzambi; kimana muna mambu mawonso o Nzambi kakembelelwa muna Yesu Kristu. Kuna kwa yandi nkembo yo nkuma yamu mvu ya mvu. Amen. 12  Azolwa, ke nusiviki ko mu kuma kia ntonta zampasi* zinuluakidi, vika sia vo, diambu dianzenza dinubwididi. 13  Kansi, nuyangalala yamuna tezo nwinina e ntwadi muna mpasi za Kristu, kimana muna kolo kia lusengomoko lwa nkembo andi, nwayangalala kikilu. 14  Avo nusembwa* muna nkumbu a Kristu, nuyangalala, kadi o mwand’a nkembo, elo, o mwand’a Nzambi wina omo yeno. 15  Kansi, ke vakadi muntu ko vovo nwina omweswa e mpasi nze mvondi yovo mwivi yovo mumpanga-mambi ngatu nyakami a mambu mangani. 16  Kansi, avo muntu omweswa e mpasi wau vo Nkristu, kamoni nsoni ko, yambula kakwamanana kembelela Nzambi wau kenatanga e nkumbu yayi. 17  Kadi eyayi i ntangwa yasikidiswa kimana o lufundisu lwayantikila muna nzo a Nzambi. Avo omu yeto luyantikila, ozevo, aweyi ikala e mbaninu y’awana balembi lemvokela e nsangu zambote za Nzambi? 18  “O muntu ansongi avo mu mpasi kevuluzilwa, ozevo, adieyi dibwila mundembi vumina Nzambi yo nsumuki?” 19  Dianu vo, awana bemonanga e mpasi mun’owu wa luzolo lwa Nzambi, yambula bakwamanana bunda e vuvu kwa Mvangi akwikizi wau bevanganga mawete.

Mvovo vana yand'a lukaya

Yovo “nzengo.”
Awana bena vo ke Ayuda ko.
Muna Kingerekia a·selʹgei·a. Tala Nsas’a Mvovo.
Yovo “nkinzi.”
Yovo “nusikama.”
Yovo “uninina.”
Yovo “ntonta za tiya.”
Yovo “tiangunwa.”