1 Petelo 3:1-22

  • Akento ye akala basompa (1-7)

  • Nukalanga e ntwadi muna mpasi; nuvava luvuvamu (8-12)

  • Numona mpasi mu kuma kia unsongi (13-22)

    • Nukubama mu tanina vuvu kieno (15)

    • Luvubu ye ntona zambote (21)

3  Diau adimosi mpe, yeno akento, nusakalela akazi eno, kimana awana balembi lemvokelanga e Diambu dia Nzambi, babakilwa muna kadilu kia akento au, ke mu diambu ko  wau bemonanga e nkal’eno yambote yo vumi.  O vienga kweno ke kukadi kwa ku mbazi ko—nkangilu a nsuki, mvuat’a nkembo za wolo yovo mvuatu miantalu—  kansi kwa kiwuntu kiaswekama kia ntima kaka muna mvuatu ulembi wolakana wa ntim’anleka yo lembama, una vo wantalu kikilu vana meso ma Nzambi.  Kadi i wau wuwu bayiviengeselanga akento avelela kuna nz’ankulu ana babundanga e vuvu muna Nzambi yo sakalela akazi au,  wauna Sara kalemvokelanga Abarayama yo kunyikila vo mfumu. Oyeno nukitukidi se wan’andi, wau nuvanganga mawete yo lembi mona wonga.  Yeno akala mpe diau adimosi, nukadilanga yau kuna zayi.* Nuzitisanga akento, wau ke bena ye ngolo zayingi ko,* kadi oyau mpe avingidi a nsambu za moyo kumosi yo yeno, kimana e sambu yeno yalembi vekama.*  Dianu vo, yeno awonso nukala yo nyindu mosi, nukalanga e ntwadi muna mpasi ye kiese, akwa nzolani a ungudi, akwa walakazi yo lulembamu.  Ke nuvutula mbi muna mbi ko yovo malevo muna malevo. Nusambula kaka, e kuma kadi muna diadi i nwabokelelwa, kimana nwavua e nsambu. 10  Kadi “ndiona ozolele zinga yo mona lumbu yambote, kafwete lunga-lunga lubini lwandi muna mbi yo nu’andi muna vova luvunu. 11  Yambula kavengomoka muna mbi, kavanga oma mambote; kavava luvuvamu yo tatidila lo. 12  Kadi meso ma Yave muna ansongi mena, o matu mandi muna ndodokela zau, kansi mimpanga-mambi, o Yave ubafididi e nima.” 13  Ozevo, nani okunumwesa e mpasi avo nusidi oma mambote e tima? 14  Kansi avo numwene mpasi mu kuma kia unsongi, nuyangalala. Ke numoni wonga ko wa mambu mana bemwenanga wonga,* ngatu tokana. 15  Kansi nuzitisa Kristu se Mfumu muna ntima mieno, nukalanga nwakubama mu vana e mvutu kwa konso ndiona okunuyuvula e kuma kia vuvu kina omo yeno, kansi kuna lembama yo vumi. 16  Nukalanga ye ntona zambote, kimana muna mana bekunuvovelanga e mbi, bamwesw’e nsoni awana beyivisanga e nkal’eno ambote nze alandi a Kristu. 17  Kadi avo i luzolo lwa Nzambi, disundidi o wete nwamona e mpasi wau nuvanganga oma mambote, ke mu kuma kia vanga mbi ko. 18  Kadi Kristu mfwa mosi kaka kafwa muna diambu dia masumu, nsongi a muntu muna diambu dia awana balembi songa, kimana kanusunzula kwa Nzambi. Wavondelwa muna nitu, kansi wavewa o moyo muna mwanda. 19  Muna mpila yayi i kayendela yo samuna kwa mianda mina muna pelezo, 20  mina miateka kolama vava Nzambi kavingilanga kuna luzindalalu muna lumbu ya Noa, ekolo kiatungwanga e nzaza, ina yavuluzilwa wantu andwelo muna maza, i sia vo, nana dia wantu.* 21  O luvubu, luna vo i fwaniswa kia diambu diadi, lukunuvuluzanga mpe owau (ke lukatulanga mvindu a nitu ko, kansi i ndombelo a ntona zambote kwa Nzambi), muna lufuluku lwa Yesu Kristu. 22  Una vana koko kwalunene kwa Nzambi, kadi wayenda kuna zulu, yo sakalelwa kwa ambasi, kwa wisa ye nkuma.

Mvovo vana yand'a lukaya

Yovo “nubabakulanga.”
Sina, “kinzu kiatovoka.”
Yovo “kakidilwa.”
Dilenda kala vo, “ke numoni wonga wa mvumisa zau ko.”
Yovo “mioyo.”