Tala mambu

Tala ntu mia mambu

Mbangi za Yave

Sola ndinga Kikongo

 ZINGU KIA KIKRISTU

Yangalelanga e Salu kia Samuna e Nsangu Zambote

Yangalelanga e Salu kia Samuna e Nsangu Zambote

Nga diampasi dikalanga kwa ngeye mu samuna e nsangu zambote? Ndonga mu yeto tulenda vova vo elo. Ekuma? Nanga tuwanananga yo wantu ke bezolanga wá nsangu zambote ko muna zunga kieto yovo wonga tumonanga wa mokena ye nzenza. Dialudi vo mambu mama malenda kulula e kiese kieto. Kansi, o Nzambi tusambilanga Nzambi a kiese ona ozolele vo selo yandi bakala mpe ye kiese. (Nku 100:2; 1 Tim 1:11) Nkia kuma tatu tuvuidi mu yangalela samuna e nsangu zambote?

Entete, e nsangu tusamunanga vuvu zivananga. Kana una vo e vuvu kia wantu ayingi mu kuluka kaka kina o unu, tuzadisanga e ntima miau ye “nsangu zambote.” (Yes 52:7) E nsangu zambote za Kintinu kia Nzambi zizadisanga mpe e ntima mieto ye kiese. Vitila wenda muna salu kia umbangi, teka yindula e nsambu zitwasa Kintinu kia Nzambi ova ntoto.

Diazole, e nsangu zambote tusamunanga zitwasanga nluta kwa wantu muna nitu ye muna mwanda. Belongokanga una balenda yambulwila mavangu mambi yo vua e vuvu kia moyo a mvu ya mvu. (Yes 48:17, 18; Roma 1:16) Tulenda kukiyindula nze yeto tuna mu salu kia vava wantu yo vuluza mioyo miau muna vonza. Kana una vo wantu akaka ke bazolele vuluzwa ko, tukwamanananga vava awana bazolele.—Mat 10:11-14.

Diatatu dina vo i diambu disundidi o mfunu, e salu kieto Yave kikembelelanga. Yandi otoma yangalelanga e salu kieto kia umbangi. (Yes 43:10; Ayib 6:10) Vana ntandu, okutuvananga o mwand’andi avelela kimana twalungisa e salu kiaki una ufwene. Muna kuma kiaki, lombanga kwa Yave kasadisa mu kala ye kiese, kadi kimosi muna fu ya mbongo a mwanda. (Ngal 5:22) Muna lusadisu lwandi, tulenda kulula o ntelamw’a moyo yo kwamanana samuna e nsangu zambote kuna unkabu. (Mav 4:31) Kana nkutu nkia mpila bebadikila e nsangu tusamunanga o wantu muna zunga kieto, tukalanga ye kiese muna salu kieto kia samuna nsangu zambote.—Yez 3:3.

Aweyi ofwete kadilanga muna salu kia umbangi? Aweyi olenda songela kiese kiaku?

NUTALA E VIDEO, VUTULWISA E KIESE KIAKU MUNA LONGOKA YO BADIKA, I BOSI NUVANA E MVUTU ZA YUVU ILENDE:

  • Ekuma tufwete silanga e fu kia longoka va fulu kiantete, kana nkutu vava tusalanga ola zayingi muna salu kia umbangi konso ngonde?

  • Aweyi tulenda tanginina Maria?

  • Mu nkia ntangwa obadikanga e Diambu dia Nzambi?

  • Nki kikutwasilanga e kiese vava osamunanga e nsangu zambote?