Ngindu zabendomoka za wantu

 Ngindu zabendomoka: Mbangi za Yave ke bekembelelanga Luwutuku lwa Yesu ko kadi ke bekwikilanga mu Yesu ko.

 Ludi: Tu Akristu. Tukwikilanga vo luvuluzu mu Yesu kaka lukwizila.—Mavangu 4:12.

 Ngindu zabendomoka: Oyeno esi nzo nuvambulanga muna kubalonga vo balembi kembelelanga Luwutuku lwa Yesu.

 Ludi: Tutokanenanga wete dia esi nzo, i kuma tusadilanga Nkand’a Nzambi muna sadisa esi nzo bakala ye ngwizani ambote.

 Ngindu zabendomoka: Oyeno lau diambote dia “nkinzi a luwutuku” nuvidisanga, vanaziana tukau, luvuvamu ova nza ye songaziana e dienga.

 Ludi: Oyeto ngolo tusianga mu kala akwa luvuvamu yo ntim’a mvevo e lumbu yawonso. (Ngana 11:25; Roma 12:18) Muna bonga e nona, vava tukutakananga ye mpangi zeto yo kuyivana muna salu kia samuna e nsangu zambote, tulemvokelanga nkanikinu wa Yesu “ngovo nutambwidi, nuvan’e ngovo.” (Matai 10:8) Vana ntandu, tutoma songanga e ziku vo e Kintinu kia Nzambi kaka kisinga twasa luvuvamu ova nza.—Matai 10:7.

Ekuma Mbangi za Yave ke Bekembelelanga Luwutuku lwa Yesu ko?

•   Yesu wakanikina vo twayindulanga lufwa lwandi, ke luwutuku lwandi ko.—Luka 22:19, 20.

•   Antumwa za Yesu ye alongoki antete ke bakembelelanga lumbu kia Luwutuku lwa Yesu ko. O nkanda Enciclopédia Brasa uvovanga vo “o nkinzi a Luwutuku lwa Yesu, bispo Libério wasikidiswa wo muna mvu wa 354,” tezo kia nkama zole za mvu zavioka tuka ntumwa ansuka kafwila.

•   Ke vena ziku ko kisonganga vo Yesu kia 25 kia ngonde a Desemba kawutuka; e lumbu kia luwutuku lwandi ke kiasonama mu Nkand’a Nzambi ko.

•   Tukwikilanga vo lumbu kia Luwutuku lwa Yesu ke kitondwanga ko kwa Nzambi kadi mindembi-kwikila bayantika kio.—2 Korinto 6:17.

Nga diamfunu mu tokanena e diambu diadi?

 Ndonga bekembelelanga e lumbu kia Luwutuku lwa Yesu nana bazeye wo vo mindembi-kwikila bayantika kio ye ke kiasonama muna Nkand’a Nzambi ko. Wantu awaya nanga bekiyuvulanga vo: Ekuma Akristu bafwete kadila ye ngindu zazi zaswaswana? Nga diamfunu mu tokanenanga e diambu diadi?

 Nkand’a Nzambi ukutukasakesanga twatoma yindulanga, twakala yo ‘nyindu asikila.’ (Roma 12:1, 2) Ukutulonganga twayangalelanga e ludi. (Yoane 4:23, 24) Kana una vo tutokanenanga dina akaka beyindulanga mu kuma kieto, nkanikinu mia Nkand’a Nzambi tulemvokelanga, kana nkutu vo dilenda fila e ndonga mu lembi kutuyangalela.

 Kana una vo ke tukembelelanga lumbu kia luwutuku lua Yesu ko, tuzitisanga nswa wa konso wa kibakila e nzengo mu kuma kia diambu diadi. Ke tukakidilanga wantu ko vava bekembelelanga e lumbu kia luwutuku lwa Yesu.