Mvutu za Nkand’a Nzambi

Luvuvamu ova nza ke lukwizila mu ngolo za wantu ko, kansi muna Kintinu kia Nzambi kaka, i sia vo, luyalu lw’ezulu, luyalwa kwa Kristu Yesu. Tala mana kekutulongango’ Nkand’a Nzambi mu kuma kia vuvu kiaki kiakiese.

  1. Nzambi “osima vita yakuna nsuk’a nza.” Olungisa nsilu andi wa “sima vita yakuna nsuk’a nza” kimana awana ketondanga bazingila mu luvuvamu.—Nkunga 46:9; Luka 2:14.
  2. Tuka kun’ezulu Kintinu kia Nzambi kiyala nz’amvimba. (Daniele 7:14) Wau vo luyalu lwalu lwa nz’amvimba, lusukisa umvwania wa nsi utwasanga vita zayingi.
  3. Yesu wa Ntinu a Kintinu kia Nzambi, oyikilwanga vo “Nkuluntu a Luvuvamu,” ovanga mawonso mu sikidisa ‘luvuvamu ke lukala nsuka ko.’—Yesaya 9:6, 7.
  4. Awana ke bazolele yambula mavangu mansoki ko, ke bekota muna Kintinu ko, kadi Nzambi omenganga awonso bezolang’o nsoki.—Nkunga 11:5; Ngana 2:22.
  5. Nzambi olonganga nkangu andi una balenda zingila mu luvuvamu. Muna songa e nluta mia malongi mama, Nkand’a Nzambi uvovanga vo: “E nsosolo miau, nsengo befula mio; o madionga, nkanku; zula ke kizangwila zula nsosolo ko, ke belongwa diaka nwana ko.”—Yesaya 2:3, 4.

Kieleka, mafunda yo mafunda ma Mbangi za Yave omu nza yawonso belongwanga kwa Nzambi una balenda kadila akwa luvuvamu. (Matai 5:9) Kana una vo mu makanda maswaswana tutukanga yo zingila mu tezo kia nsi 236, ke tusimbanga nkele ko muna vonda akw’eto.

O unu, Mbangi za Yave belongokanga nzil’a luvuvamu