Mvutu za Bibila

 Yesu wavuluza wantu bena vo akwa kwikizi vava kavana moyo andi se kimenga kia lukulu. (Matai 20:28) Muna kuma kiaki, Bibila kiyikilanga Yesu vo “Mvuluzi a nza.” (1 Yoane 4:14) Bibila kivovanga mpe vo: “Ke vena luvuluzu muna muntu akaka ko, ke vena mpe nkumbu yankaka ko oku nsi a ntangwa yavewa kwa wantu ina tufwete vuluzilwa.”—Mavangu 4:12.

 Yesu ‘wayeleka lufwa mu kuma kia wantu awonso’ bekwikilanga muna yandi. (Ayibere 2:9; Yoane 3:16) I bosi, “Nzambi wamfula muna mafwa” ye Yesu wavutuka kuna zulu se vangwa kia mwanda. (Mavangu 3:15) Kuna zulu, Yesu wafwana “vuluza emvimba awana befinamanga Nzambi muna yandi, e kuma kadi ozinganga kaka muna dodokela muna wete diau.”—Ayibere 7:25.

Ekuma Yesu kafwete dodokela muna wete dieto?

 Yeto awonso tu asumuki. (Roma 3:23) E sumu dina se nkaku vana kati kweto yo Nzambi ye dikutufilanga muna lufwa. (Roma 6:23) Kansi, Yesu una se “kimpovela” kwa awana bekwikilanga muna kimenga kia lukûlu lwandi. (1 Yoane 2:1, mvovo vana yand’a lukaya) Yesu ododokelanga muna wete diau muna lomba kwa Nzambi vo kawa sambu yau yo loloka masumu mau. Olungisa e diambu diadi muna nzil’a kimenga kiandi kia lukûlu. (Matai 1:21; Roma 8:34) Nzambi owanga e ndomba zazi kadi ngwizani zina ye luzolo lwandi. Nzambi watuma Yesu ova ntoto kimana “wantu bavuluzilwa kaka muna yandi.”—Yoane 3:17.

Nga okwikila muna Yesu i diau kaka divavuanga muna vuluzwa?

 Ve. Kanele vo tufwete kwikila muna Yesu muna vuluzwa, vena ye mambu mankaka tufwete vanga. (Mavangu 16:30, 31) Bibila kivovanga vo: “Wauna e nitu yakondwa mwanda yafwa, o lukwikilu mpe lwakondwa mavangu, lwafwa.” (Yakobo 2:26) Muna vuluzwa, tufwete:

•   Longoka mayingi mu kuma kia Yesu yo Yave wa Se diandi.—Yoane 17:3.

•   Kumika lukwikilu lwaku muna yandi.—Yoane 12:44; 14:1.

•   Tufwete songa lukwikilu lweto muna lemvokelanga nkanikinu miau. (Luka 6:46; 1 Yoane 2:17) Yesu walonga vo ke awonso ko bekunyikilanga vo “Mfumu” bevuluzwa, kansi awana kaka “bevanganga luzolo lwa Se [diandi] wina kuna zulu.”—Matai 7:21.

•   Kana nkutu muna mpasi, tufwete kwamanana songa lukwikilu lweto. Yesu wasonga e ziku kia diambu diadi vava kavova vo: “Ndiona ozindalala yakuna mbaninu, yandi ovuluzwa.”—Matai 24:13.