Mvutu za Bibila

 Sumu i konso vangu yovo ngindu ke zina ngwizani ko ye nsiku mia Nzambi. Ndiona osumukanga okululanga nsiku mia Nzambi yo vanga e vilwa vana ntadisi a Nzambi. (1 Yoane 3:4; 5:17) Bibila kivovanga mpe vo e sumu i yambula vanga mambu mambote.—Yakobo 4:17.

 Muna ndinga yasina yasonekena e Bibila, o mvovo “sumu” ina ye nsasa vo “lembi lungisa diambu.” Muna bonga e nona, kuna Isaele yankulu, buka kimosi kia makesa bakala ye ndekwa zatuba matadi muna “lusuki lembi vengomoka” yovo “lembi sumuka.” (Afundisi 20:16) Ozevo, o sumuka i lembi lungisa emvimba e nkanikinu mia Nzambi mialunga.

 Wau vo Nzambi i mvangi eto, una ye nswa wasikidisa nkanikinu mu kuma kia wantu. (Lusengomono 4:11) Mbalu tutá kwa Nzambi mu kuma kia mavangu meto.—Roma 14:12.

Nga tulenda venga emvimba e sumu?

 Ve. Bibila kivovanga vo: “Awonso basumuka yo funga muna songa o nkembo a Nzambi.” (Roma 3:23; 1 Ntinu 8:46; Kimpovi 7:20; 1 Yoane 1:8) Ekuma?

 Kuna lubantinu, wantu antete, i sia vo, Adami yo Eva wantu alunga bakala. Nzambi wabavanga mun’owu wa fwaniswa kiandi. (Tuku 1:27) Kansi vava bakolamena Nzambi bakituka se asumuki. (Tuku 3:5, 6, 17-19) Vava bawuta wana, babasambukisa e sumu, nze kimbevo kiampondi. (Roma 5:12) Muna kuma kiaki, Davidi wa Ntinu a Isaele wavova vo: “Muna mbi yawutukila.”—Nkunga 51:5.

Nga maka masumu masundidi masumu mankaka?

 Ingeta. Muna bonga e nona, Bibila kivovanga vo wantu bazingilanga muna Sodomo yankulu, ‘yimpumbulu bakala, basumukanga kwayingi’ ye ‘masumu mau masaka.” (Tuku 13:13; 18:20) Tala mambu matatu mesonganga sumu diampwena.

1.   Mpila e sumu. Bibila kivovanga vo tufwete venga sumu diampwena nze, mavangu ma zumba, sambila teke, yiya, kolwa malavu, dia nzimbu zangani, vonda ye mavangu ma mpandu. (1 Korinto 6:9-11; Lusengomono 21:8) Bibila kisonganga vo masumu mama mampwena, maswaswana ye masumu ke tukananga ko nze vanga yovo vova diambu dikendelekanga akaka. (Ngana 12:18; Efeso 4:31, 32) Kansi, Bibila kisonganga mpe vo ke tufwete vezanga konso sumu ko, kadi ediadi dilenda kutufila mu vanga e sumu diampwena.—Matai 5:27, 28.

2.   Kuma. Wantu ankaka besumukanga kadi ke bazeye nsiku mia Nzambi ko. (Mavangu 17:30; 1 Timoteo 1:13) Bibila ke kiyambulwilanga masumu mama ko, kansi kisonganga vo maswaswana yo kolamena e kani dia Nzambi kuna lukanu. (Ntalu 15:30, 31) E fu kia sumuka kuna lukanu, kitukanga muna ‘ntima.’—Yeremiya 16:12.

3.   Nkumbu miayingi. Bibila kisonganga mpe vo vena ye nswaswana vana vena sumuka mu nkumbu mosi yo sumuka mu kolo kiandá. (1 Yoane 3:4-8) Nzambi otumbanga muntu ona walongoka malongi mandi kansi ‘osumukanga kuna lukanu.’—Ayibere 10:26, 27.

 E ntona za muntu osumukini zilenda kuntumba. Muna bonga e nona, Davidi wa ntinu wavova vo: ‘Kadi mbi ame ina va ntandu a ntu ame; nze funda kiazita, kilenda yo nata ko.’ (Nkunga 38:4) Kansi, Bibila kisianga nsilu vo: “O kimpumbulu kayambula e nzil’andi o muntu a mbi kayambula e ngindu zandi; yambula kavutuka kwa Yave, ona okumfwila e nkenda, kwa Nzambi eto, kadi ololoka emvimba.”—Yesaya 55:7.