Tala mambu

Nki i Kimwanda? Nga Ndenda Kala Nkwa Kimwanda Lembi Kala mu Dibundu?

Nki i Kimwanda? Nga Ndenda Kala Nkwa Kimwanda Lembi Kala mu Dibundu?

Mvutu za Bibila

 O mvovo nkwa kimwanda muna Bibila, ulenda songa vo kala ye tima yovo luzolo lwa yangidika Nzambi yo landa e ngindu zandi ye mavangu mandi. O nkwa kimwanda ngolo kevanganga mu zingila e ngwizani ye nsiku miandi yo filwa kwa mwand’andi avelela. *Roma 8:5; Efeso 5:1.

 Muna yika e nswaswani vana vena nkwa kimwanda, e Bibila mavangu ma awana bena vo ke akwa kimwanda ko kitoma sadilanga. Kasikil’owu, nswaswani ye nkwa kimwanda, “o nkwa kinitu ke tambulwilanga mambu ma mwand’a Nzambi ko” yovo malongi ma Nzambi. (1 Korinto 2:14-16) Vana fulu kia kala akwa ngemba ye ungudi, akwa kinitu akwa “kimpala ye ntantani.” Ediadi diaswaswana kikilu ye akwa kimwanda. (1 Korinto 3:1-3) Awana bezolanga kumba akaka yo vambanesa akundi akola beyikilwanga vo “akwa kinitu, bakondwa kimwanda.”—Yuda 19; Ngana 16:28. *

Oma mena mu lukaya lwalu

 E kimwanda akweyi kitukanga?

 Wau vo mu fwaniswa kia Nzambi twavangilwa, tuvuidi e lendo kia kala akwa kimwanda. (Tuku 1:27) Kalukatikisu ko vo i kuma tumwenanga wantu bekalanga ye luzolo lwa longoka mambu yovo lekwa ina ke balendi mona ko.

 Tuwutukanga ye lendo kia songa e fu ya Yave * wa Nzambi, nze luvuvamu, nkenda ye fu kia lembi sianga e mpambula. (Yakobo 3:17) Vana ntandu, Nzambi okumikanga kimwanda kia awana besianga e ngolo za lemvokela nsiku miandi.—Mavangu 5:32.

 Okala nkwa kimwanda ekuma dinina mfunu?

 Okala nkwa kimwanda i difilanga ku “moyo ye luvuvamu.” (Roma 8:6) E nkayilu miami mia Nzambi miantalu kikilu, ke mina ye tezo ko.

  •   Moyo: Nzambi wasia nsilu wavana moyo a mvu ya mvu kwa akwa kimwanda.—Yoane 17:3; Ngalatia 6:8.

  •   Luvuvamu: Ediadi disongele vo nkwa kimwanda mu luvuvamu kekalanga yo Nzambi. Awana besianga kaka e sungididi muna nsatu zau za kinitu, atantu a Nzambi. (Roma 8:7) Vana ntandu, “o luvuvamu lwa Nzambi luna luviokele umbakuzi wawonso,” i nsendo Nzambi kevananga kw’awana bevanganga e ngolo za kala akwa kimwanda. (Filipi 4:6, 7) O luvuvamu lwalu lwa ntima lukubasadisanga mu kala ye kiese muna zingu.—Matai 5:3.

 Aweyi ndenda kadila nkwa kimwanda?

  •   Longoka yo lemvokelanga nsiku mia Nzambi. Olenda wo vanga muna tanganga e Bibila. Muna Bibila i mwasonekwa e ngindu za Nzambi kwa wantu ana ‘bafilwa kwa mwand’avelela.’ (2 Petelo 1:21) Muna olongoka mekusadisa mu sambilanga Nzambi “muna mwanda ye ludi” yo filwa kwa mwand’avelela mun’owu wa luzolo lwa Nzambi.—Yoane 4:24.

  •   Lomba lusadisu lwa Nzambi muna sambu. (Luka 11:13) O Nzambi okusadisa kimana wayima e fu iswaswanisa o nkwa kimwanda. (Ngalatia 5:22, 23) E sambu kilenda kusadisa mpe mu vua e ngangu mu zizidila mambu mampasi muna zingu.—Yakobo 1:5.

  •   Kalanga entwadi y’akwa kimwanda. Oyau bekusadisa mu kumika e kimwanda kiaku. (Roma 1:11, 12) Kansi, okalanga entwadi yo wantu bena vo e ngindu zau ke zina ngwizani ko yo Nzambi dilenda fwasa kimwanda kiaku.—Yakobo 4:4.

 Muna kala nkwa kimwanda mfwete kala mu dibundu?

 Okala mu dibundu ke dikitulanga muntu ko se nkwa kimwanda. E Bibila kivovanga vo: “Konso muntu obanzanga vo Nzambi kesambilanga, kansi ke kebanga lubini lwandi ko, ntim’andi kevunanga, e nsambil’andi mpe yampavala.”—Yakobo 1:26, tala mpe mvovo vana yand’a lukaya.

 Kansi, e Bibila kivovanga mpe vo akwa kimwanda besambilanga Nzambi mu mpila ina keyangalelanga. Bazeye wo vo vena yo “mwanda umosi” kaka, i sia vo, mwand’avelela a Nzambi. O mwanda wau ukubafilanga mu sambila Nzambi se “nitu mosi” yo kituka se buka kitatidilanga “kintwadi kia mwanda muna kangwa kia ungudi.”—Efeso 4:1-4.

 Luvunu mu kuma kia kimwanda

 Luvunu: O kala nkwa kimwanda i konso nzila kelandanga o muntu muna lungisa e kani diandi yovo kala ye lendo kia vanga konso diambu.

 Ludi: E Bibila kivovanga vo nkwa kimwanda i ndiona olandanga e ngindu za Nzambi muna zingu kiandi. Ke bembolanga Nzambi ko muna kala se muntu ambote. Akwa kimwanda betambulanga o nsendo muna zaya vo Yave i Mvangi yo zingila e ngwizani ye kani diandi.—Nkunga 100:3.

 Luvunu: O muntu olenda kituka nkwa kimwanda muna kuyivanina emvimba o nkalu yovo muna kuyimwesanga e mpasi.

 Ludi: Okuyimwesa e mpasi muna nitu i mpila wantu ‘basikidisila nsambila ya yau kibeni,’ i ngindu za kinitu. (Kolosai 2:18, 23) Muna Bibila e mpasi ke zikalanga ngwizani ko ye kimwanda, kansi kiese kaka.—Ngana 10:22.

 Luvunu: Okala engwizani ye nza ya kimwanda, kumosi ye mpandu i dikitulanga muntu se nkwa kimwanda.

 Ludi: Dimosi muna mavangu ma mpandu i kwikila vo amafwa balenda mokena yo wantu bena moyo. Kansi, e Bibila kilonganga vo amafwa ke bazeye diambu ko. (Kimpovi 9:5) E mpandu i mokena ye vangwa ya mianda isianga Nzambi kitantu. O Nzambi keyangalalanga mavangu ma mpandu ko ye wantu mekakidilanga mu kala nkwa kimwanda.—Levitiku 20:6; Nsiku 18:11, 12.

 Luvunu: Wantu awonso bena ye kimwanda.

 Ludi: E lekwa yawonso kasema o Nzambi nkembo ikuntwasilanga. (Nkunga 145:10; Roma 1:20) Kansi, vangwa ya ngangu kaka ilenda kala ye kimwanda. Nswaswani ye vangwa ya ngangu, e bulu mu lendo kia kingutukila kaka bevangilanga mambu, ke balendi vanga kikundi yo Nzambi ko. Nsatu za kinitu kaka zikubafilanga mu vanga konso diambu. (2 Petelo 2:12) E Bibila kisonganga vo o nkwa kimwanda waswana ye bulu yakondwa nyindu ye fu ya nkal’ambote.—Yakobo 3:15; Yuda 19.

^ E mvovo miasekolwa vo “mwanda” muna ndinga yasina yasonekenua Bibila mina ye nsasa vo “fulumwinu.” Muna mvovo miankaka, i lekwa ke kimonekanga ko, kansi e mpila kisadilanga yisonganga e ziku vo e lekwa kiokio kina kikilu. O Nkand’a Nzambi usonganga vo o Nzambi i Muntu a Kimwanda Osundidi. O nkwa kimwanda ovanganga e ngolo mu baka e nzengo zina ngwizani yo luzolo lwa Nzambi ye ofilwanga kwa mwand’andi avelela.

^ Muna Bibila o mvovo “kinitu” ye “kinsuni” misadilwanga mu yika wantu ana bena vo e nsatu zau za kinitu i diambu disundanga o mfunu, wantu ana bezitisanga nkaninkinu mia Nzambi ko.

^ E Bibila kisonganga vo Yave i nkumbu a Nzambi.—Nkunga 83:18.