Tala mambu

Nki i Luvubu?

Nki i Luvubu?

Mvutu za Bibila

 O muntu vava kevubwanga, odimunwanga emvimba muna maza. * Ekiaki i kuma Yesu kavubilwa muna nkoko wakala ye maza mayingi. (Matai 3:13, 16) Idiau mpe diavangama vava musi Etiopia kalomba vo kavubwa vava balwaka “vana fulu kiakala maza.”—Mavangu 8:36-40.

Ayeyi i nsas’a luvubu?

 E Bibila kitezanesanga luvubu yo luziku. (Roma 6:4; Kolosai 2:12) Mu nkia mpila? Vava muntu kedimunwanga muna maza, dina nze yandi ofwidi, i sia vo, oyambwidi e mpila zingu kakedinge kiau yamuna lumbu kiokio. Vava ketombokanga muna maza, dina nze yandi oyantikanga zingu kiampa, i sia vo, wakubama mu vanga luzolo lwa Nzambi. O luvubu lusonganga vo muntu okwikilanga muna kimenga kia Yesu Kristu yo vanga nsobani muna zingu kiandi mu kala ye ntona zavelela vana ntadisi a Nzambi. (1 Petelo 3:21) Ekiaki i kuma Yesu kavovesela alongoki andi vo bafwete vubwa.—Matai 28:19, 20.

Nga o luvubu masumu lukatulanga?

 Ve. Bibila kilonganga vo menga ma Yesu kaka malenda kutuvelelesa muna masumu. (Roma 5:8, 9; 1 Yoane 1:7) Kansi, muna vua e nluta mia kimenga kia Yesu, o muntu kafwete kwikila muna Yesu, zingila e ngwizani ye malongi mandi yo vubwa.—Mavangu 2:38; 3:19.

Nga Bibila kilonganga luvubu lwa asedia?

 Ve. E Bibila ke kilonganga luvubu lwa nsedia ko. Muna mabundu mankaka, bezazilanga fimaza vana mband’a ntu a nsedia se sinsu kia luvubu ye bekumvananga e nkumbu a luvubu. Kansi awana kaka bena muna ntela yabakula yo kwikila muna “nsangu zambote za Kintinu kia Nzambi” i bafwete vubwa. (Mavangu 8:12) Ediadi divavanga vo muntu kalongoka e Diambu dia Nzambi, zingila e ngwizani ye mana kelongokanga yo viluka e ntima. O nsedia kalendi vanga mambu mama ko.—Mavangu 2:22, 38, 41.

 Kuna diak’e sambu, e Bibila kivovanga vo Nzambi obadikilanga nsedia bena vo mase mau Akristu se bavauka yovo bavelela vana meso mandi mu kuma kia lukwikilu lwa mase mau. (1 Korinto 7:14) Kele vo divavanga vo ansedia bavubwa, o lusadisu lwa wantu ankaka ke lwadi kala mfunu ko muna tontokana kwa Nzambi. *

Ngindu zabendomoka mu kuma kia luvubu

 Luvunu: O zazila fimaza vana mband’a ntu a muntu mpila mosi kwandi yo luvubu lwa dimuna muntu muna maza.

 Ludi: Bibila kivovelanga wantu ayingi bavubwa. Yau awonso dimunua badimunua emvimba muna maza. Muna bonga e nona, vava Filipi kavuba musi Etiopia, ‘bakulumuka muna maza,’ i bosi, ‘bavaika muna maza.’ *Mavangu 8:36-39.

 Luvunu: Bibila kisonganga vo vava esi nzo bavubwanga e nsedia mpe bavubwa. Muna bonga e nona, kivovanga mu kuma kia nyingidi mosi kuna Filipi vo: “Yandi y’esi nzo andi bavubwa.”—Mavangu 16:31-34.

 Ludi: O lusansu lwalu lwa nyingidi ona watambulwila e ludi lusonganga vo awana bavubwa babakula e “diambu dia Yave” yo ‘yangalala.’ (Mavangu 16:32, 34) Ediadi disonganga vo ke vakala nsedia ko wavubwa muna esi nzo ana bavubwa, kadi o nsedia kalendi bakula diambu dia Yave ko.

 Luvunu: Yesu walonga vo nsedia balenda vubwa vava kavova vo e Kintinu kia Nzambi kia awana bena nze yingiana-ngiana.—Matai 19:13-15; Maku 10:13-16.

 Ludi: Vava Yesu kavova diambu diadi, ke luvubu ko kavovelanga. Kansi, edi kazola vova vo konso ndiona ozolele kota mu Kintinu kia Nzambi kafwete kala ye fu kia lulembamu nze kingiana-ngiana.—Matai 18:4; Luka 18:16, 17.

^ O mvovo wa Kingerekia wasekolwa vo “luvubu,” una ye nsasa vo “dimunua.” Tala o nkanda Theological Dictionary of the New Testament (Dicionário Teológico do Novo Testamento), Volume I, lukaya lwa 529.

^ O nkanda The International Standard Bible Encyclopedia, (Enciclopédia Bíblica Padrão Internacional) uvovanga vo Luwawana Lwampa ke lutondanga luvubu lwa nsedia ko. Uvovanga mpe vo e fu kiaki mu “ngindu zabendomoka mu kuma kia mfunu wa luvubu” zatuka, za sia vo, o luvubu masumu lukatulanga.— Volume 1, lukaya lwa 416-417.

^ Vana ntu a diambu “Luvubu (muna Bibila)”, o nkanda New Catholic Encyclopedia (Nova Enciclopédia Católica) uvovanga vo “Akristu a tandu kiantete vava bavubanga o muntu bandiumisanga muna maza.”— Volume 2, lukaya lwa 59.