E ngolo bevanganga wantu mu sikidisa luvuvamu ova nza zifunganga mu kuma eyi:

•   ‘E nzil’a muntu ke ina muna yandi ko ngatu singikila ntambi zandi.’ (Yeremiya 10:23) Wau vo wantu ke bavangwa ko ye nswa wa kukiyala, ke balendi sikidisa luvuvamu lwakwele mvu ko.

•   “Ke nubundi azitu a wantu vuvu ko, yovo mwan’a muntu, muna ke mwina luvuluzu ko. O mwand’andi uvaika, muna ntoto kevutuka; Muna lumbu kiakina o makani mandi mavididi.” (Nkunga 146:3, 4) Ayadi a nza, kana nkutu awana bena ye makani mambote ke balendi fokola emvimba ko e kuma itwasanga e vita.

•   “Muna lumbu yambaninu mukwiza nsungi za tema. Kadi wantu bekal’akwa . . . lunzi, mindembi zola mawete, ayekodi, akwa nswatakesa, akwa lungumvi-ngumvi.” (2 Timoteo 3:1–4) Mu “lumbu yambaninu” a nza yayi yambi tuzingilanga. E fu besonganga wantu mu lumbu yayi ikitulanga dio se diampasi mu sikidisa luvuvamu.

•   “Tâtu kwa nza yo kalunga, e kuma kadi, o Nkadi ampemba okulumukini oko nwina, wina yo makasi mayingi, wau kazeye wo vo kolo kiandwelo kaka kena kiau.” (Lusengomono 12:12) Nkadi ampemba una vo i mbeni a Nzambi, ona wavetwa ova ntoto ofilanga wantu batanginin’o mwand’andi wambi. Wau vo yandi oyalanga e “nza yayi” ka tulendi zingila mu luvuvamu ko.—Yoane 12:31.

•   “[Kintinu kia Nzambi] kikosomona yo sukisa yintinu yayi yawonso [itelamenanga Nzambi], kitongama mpe yakwele mvu.” (Daniele 2:44) Kintinu kia Nzambi kaka kilungisa luzolo lweto lwa zingila mu luvuvamu lwakwele mvu. Ke vena luyalu lwa muntu ko lulenda wo vanga.—Nkunga 145:16.