O wana bena vo se ambuta mbebe, ampwena bena yau yalunga-lunga mase mau bena vo se anunu. Bibila kivovanga vo wana “bateka longoka songa o vumi wa Nzambi muna nzo zau yo senda mase ye nkaka zau . . . , kadi ediadi diansongi vana ndose a Nzambi.” (1 Timoteo 5:4) Vava wana bevanganga mawonso muna lunga-lunga mase mau, belemvokelanga mpe nkanikinu wa Bibila wazitisa mase mau.—Efeso 6:2, 3.

 Bibila ke kivananga nkanikinu miasikididi ko muna mpila o wana bafwete lunga-lungila mase mau ma anunu. Kansi, kiyikanga akala ye akento akwa kwikizi balunga-lunga mase mau. Bibila kivananga mpe malongi mamfunu malenda sadisa awana belunga-lunganga mase mau.

•  Kuna nz’ankulu, aweyi akaka balunga-lungila mase mau ma anunu?

•  Nkia malongi ma Bibila malenda sadisa awana belunga-lunganga mase bena vo se anunu?

•  Nga Bibila kiyikanga e mpila yasikididi ina wana bafwete lunga-lungila mase mau?

 Bavanga wo mu mpila zaswaswana, mun’owu wa mambu mababwila muna zingu.

•   Yosefe kazingilanga vamosi ko yo Yakobo wa se diandi. Kansi vava kakala ye lau, wabokelesa se diandi keza zingila muna Engipito. Wamvana nzo, madia yo kunlunga-lunga.—Tuku 45:9-11; 47:11, 12.

•   Rute wayaluka yo kwenda kuna nsi a kô wandi. Wasala kwayingi muna lunga-lunga kô wandi.—Rute 1:16; 2:2, 17, 18, 23.

•   Yesu, vava kakala vo se kefwa, wasola muntu ona kavana kiyekwa kia lunga-lunga Maria wa ngudi andi. Nanga muna kolo kiokio, o Yosefe wa nkaz’a Maria wakifwila.—Yoane 19:26, 27. a

 Muna Bibila muna ye nkanikinu milenda sadisa awana belunga-lunganga mase bena vo anunu. Kadi, ezak’e ntangwa beyoyanga ye tokana muna ngindu.

•   Zitisanga mase maku.

   Bibila kivovanga vo: “Zitisa se diaku yo ngudi aku.”—Luvaiku 20:12.

   Aweyi olenda sadila nkanikinu wau? Muna lembi tuminanga mase maku muna mambu mawonso ma zingu kiau. Mun’owu wa ngolo zau, yambula vo yau kibeni babaka e nzengo muna mpila ina bazolele lunga-lungilwa. Kansi, zitisanga mase maku muna vanga mawonso olenda mu kubasadisa.

•   Ubabakulanga yo kubaloloka.

   Bibila kivovanga vo: “O nkwa ngangu ke funganga makasi mu nzaki ko, diambote kuna kwa yandi mu viokesa e mbi.”—Ngana 19:11.

   Aweyi olenda sadila nkanikinu wau? Avo se yovo ngudi aku una vo nunu uvovese diambu diambi yovo lembi vutula matondo muna mawonso ovanganga, ukiyuvula: ‘Aweyi yadi mona kele vo mono yakala vana fulu kiau? Avo tubakwidi e mpasi zau yo kubaloloka, ediadi disadisa mu lembi sakisa mambu.

•   Mokenanga ye akaka.

   Bibila kivovanga vo: “Vana vakondelo mbokena makani mefunganga, kansi vana vena aludiki ayingi o makani mesikilanga.”—Ngana 15:22.

   Aweyi olenda sadila nkanikinu wau? Vava zaya mpila mawuku o mase maku balenda tambula mu kuma kia kimbevo bena kiau. Vava zaya e nkubika za vangwa muna zunga kiaku mu diambu ditadidi lunga-lunga anunu, ezi zilenda kusadisa. Mokena ye awana balunga-lunga kala mase mau ma anunu. Avo mpangi una zau, mokena yau muna zaya una konso muntu muna yeno kalenda sadisila yo lungisa e nsatu za mase meno.

•   Kalanga ye tezo.

   Bibila kivovanga vo: “E ngangu kuna kw’alembami zina.”—Ngana 11:2.

   Aweyi olenda sadila nkanikinu wau? Zayanga e tezo kiaku. Yeto awonso tezo tuna kiau muna ntangwa ye ngolo tulenda sadila mu vanga konso diambu . Ozaya tezo kiaku dikusadisa mu zaya mana olenda vanga. Avo omwene vo e salu kingi, olenda lomba lusadisu kwa akaka muna nzo yovo lomba lusadisu kwa awana besadilanga mu nzo zilunga-lunganga anunu.

•   Kuvilakani nsatu zaku ko.

   Bibila kivovanga vo: “Kavena muntu ko omenganga e nitu andi, kansi odikilanga yo lunga-lunga yo.”—Efeso 5:29.

   Aweyi olenda sadila nkanikinu wau? Kana una vo una ye mbebe yalunga-lunga mase maku ma anunu. Ofwete katulanga mpe ntangwa muna kuyilunga-lunga y’esi nzo aku avo wakazala. Ofwete toma dia yo leka una ufwene. (Kimpovi 4:6) Vana ntandu, diambote wavaulanga e ntangwa kimana wavundanga. Avo ovangidi mawonso mama, okala wakubama muna toma lunga-lunga mase maku.

 Bibila ke kiyikanga mpila yasikididi ko ina wana bafwete lunga-lungila mase mau. Vena ye wana bezolanga zingila vamosi ye mase mau ma anunu. Kansi, akaka balenda mona vo diambote mu sia mase mau muna nzo zilunga-lunganga anunu. O wana bafwete mokena mu zaya e fulu yambote mase mau balenda zingila.—Ngalatia 6:4, 5.