Tala mambu

Adieyi Mvanga Kele vo Kinsona Imonanga?

Adieyi Mvanga Kele vo Kinsona Imonanga?

Mana olenda vanga

1. Sia e sungididi muna mambu mambote ovanganga. (2 Korinto 11:6) Ke diambi ko mu zaya o bi waku, kansi kuvilakani mpe ko vo mambu mayingi mambote ovanganga. O toma kizaya dilenda kusadisa mu lembi kuyibadikilanga vo kuna mfunu ko yo lembi kuyimwena vo ngeye mosi kaka okalanga. Ukiyuvula, ‘Nkia mambu mambote ivanganga?’ Yindula e fu yambote una yau.

2. Songanga vo wantu ovuanga o mfunu. Yantika wo vanga kwa wantu akete. Nleke mosi nkumbu andi Jorge wavova vo: “O yuvula akaka o mavimpi yo vava zaya una e salu yau ina diatila, dilenda kusadisa mu toma kubazaya.”

Olenda vanga kiamvu kimana kiavambula ye akundi aku

Longi: Kuvangi kaka kikundi yo wantu luna yau ntela mosi ko. Nkand’a Nzambi uvovelanga wantu bavanga kikundi kiangolo, kansi ke bakala ntela mosi ko. Tulenda vovela Naomi yo Rute, Davidi ye Yonatane, Paulu yo Timoteo. (Rutu 1:16, 17; 1 Samuele 18:1; 1 Korinto 4:17) sungamena dio vo mokena disongele vo songana e ngindu, ke muntu mosi kaka ofwete vova. O muntu avo mu vova kena edi kezolanga vo akwandi batamba o matu. Dianu vo, kana una vo kuvovanga kwayingi ko, zaya dio vo vava omokenanga yo muntu, ke diambote wavovanga ntangwa zawonso.

3. ‘Uyisianga vana fulu kia wantu akaka.’ (1 Petelo 3:8) Kana nkutu vo kutondele ngindu za muntu ko, vuvika o ntim’aku yavana kefokola ovova. Vovela mambu mana mena ngwizani ye ngindu zaku. Avo omwene vo vena ye ngindu kutondele ko, songa e ngindu zaku kuna lembama kwawonso ye ngangu.

Longi: Voveselanga wantu muna mpila ina ongeye ozolanga vo wavoveselwa. Avo una ye fu kia filana mpaka, veza, finga yo badikila akwaku vo wantu ambi, o wantu ke bekufinama ko. Kansi avo e ‘mvovo miaku miambote,’ o wantu betoma kuzola.—Kolosai 4:6.