“E mioyo mi’awana besumukanga yo fwa, vana vau mikwendanga kuna ‘bilungi’ yo tumbwa yakwele mvu.” (Catecismo da Igreja Católica) Afidi a mabundu makaka belonganga vo, o tubwa kuna bilungi, i vambulwa emvimba yo Nzambi.

“O moyo una usumuka, fwa ufwa.” (Yezekele 18:4) Afwa “ke bazeye diambu ko.” (Kimpovi 9:5) Wau vo moyo fwa ufwanga ye afwa ke bazeye diambu ko, aweyi balenda bangikilwa kuna bilungi yo vambulwa yo Nzambi?

O mvovo wa Kiyibere ye Kingerekia wasekolwa vo “bilungi” muna Nkand’a Nzambi, ziami kia wantu awonso uyikanga. Muna bonga e nona, vava Yobi kayela kimbevo kiangolo wasamba kwa Nzambi vo: ‘Kele vo wansweka muna nsi a fwa [ziami].’ (Yobi 14:13) Yobi wazola vunda muna ziami ke va fulu kiampasi ko kiavambuka yo Nzambi.

O nsoki ke ukutufinamesanga yo Nzambi ko, kansi ukutuvambulanga yo Nzambi. Rocío, ozingilanga kuna México wavova vo: “Yalongwa elongi dia bilungi tuka muna kileke kiame. Wonga wayingi yamonanga yo yindula vo Nzambi kena ye fu yambote ko, nkwa makasi yo ntim’ambadi.”

E ludi kia Nkand’a Nzambi mu kuma kia mfundisa za Nzambi ye dina dibwilanga wantu vava befwanga, kiasoba ngindu za Rocío muna mpila kabadikilanga Nzambi. Rocío wavova vo: “Yamona nze mono nkatwilu e zitu vana vembo. Yayantika longoka vo Nzambi wete dieto kevavanga, okutuzolanga ye ndenda kwame kunzola. Una nze se osimbininanga wan’andi vana koko yo vava ewete diau.”—Yesaya 41:13.

Ayingi besadilanga Nzambi mu kuma kia wonga wa tumbwa kuna bilungi, kansi Nzambi ka zolele ko vo wansadila mu kuma kia wonga. Yesu wavova vo: “Zola Yave wa Nzambi aku.” (Maku 12:29, 30) Vava tubakulanga vo Nzambi ovangilanga mawonso muna unsongi, dikutufilanga mu bunda vuvu muna mfundisa zandi kuna sentu. Nze Eleyu wa nkundi a Yobi, tulenda vova ye ziku kiawonso vo: “Ke difwene kwa Nzambi ko, kavanga umpumbulu, yo Mpungu-ngolo kavanga vilwa.”—Yobi 34:10.