NTU A DIAMBU WA FUKWA | LUVUNU LUFILANGA WANTU MU LEMBI ZOLA NZAMBI
Ekuma Dinina Diampasi Kw’akaka mu Zola Nzambi?
“Zola Yave wa Nzambi aku yamuna nsi a ntim’aku yawonso, yo muna fulumwinu kiaku kiawonso, yo muna nyindu aku wawonso. I wau wuwu o nkanikinu anene, wantete mpe.”—Yesu Kristu, 33 T.K. *
Akaka bemonanga vo diampasi mu zola Nzambi. Kuna kwa yau, Nzambi nkwa nsoki, wavavuka wantu ye diampasi muna kunzaya. Badika mana akaka bavova:
-
“Yalombanga lusadisu lwa Nzambi muna sambu, kansi yamonanga vo kamvwanga mfunu ko ye kilendi kumfinama ko.” Kiakwikilanga ko vo Nzambi una.”—Marco, Itália.
-
“Kana una vo yakala y’etima dia sadila Nzambi, kansi yamonanga vo wavavuka wantu. Yayindulanga vo Nzambi nkwa ntima mbadi, ekani diandi i tumba kaka wantu. Kiakwikilanga ko vo yandi kwa nkenda.”—Rosa, Guatemala.
-
“Muna kileke kiame, yakwikilanga vo Nzambi kekutuvwanga mfunu ko ye ofimpanga zingu kieto mu zaya vilwa weto kimana katutumba. Yabadikilanga Nzambi nze nyadi obangikanga wantu keyalanga yo lembi kubavwa o mfunu.”—Raymonde, Canadá.
Adieyi obenze? Nga diampasi mu zola Nzambi? Se tuka kolo, Akristu bevanganga kiuvu kiaki. Muna mvu wa 500 yakuna mvu wa 1500, ayingi muna Kikristu kia Kimpangila ke basambilanga Nzambi a Mpungu-ngolo ko. Ekuma? Wantu wonga wa Nzambi bamonanga. Will Durant wa nzingudi a lusansu wavova vo: “O mpasi nsumuki, nkia unkabu kalenda kala wau mu samba kwa nkwa nsoki ona wavavuka wantu?”
Ekuma Nzambi kebadikilwanga vo “nkwa nsoki ye wavavuka wantu? Nkand’a Nzambi adieyi kieleka ulonganga mu kuma kia Nzambi? O longoka e ludi, nga dilenda kusadisa mu zola Nzambi?
