Nsangu Zambote Muna 500 za Ndinga

WINIKINA MU

Nsangu Zambote Muna 500 za Ndinga

VAVA kiabwa vita kuna Ruanda, e buka kiakete kia asekodi kia Mbangi za Yave batina muna nzo zau yo sisa lekwa yau. Kansi, banata komputador yakete kuna bayenda tinina. Ekuma? Kimana balembi yambula sekola nkanda mu ndinga Kinyarwanda.

Mpangi mosi wa nkento kuna Sudeste ya Ásia wasalanga muna komputador andi mu fuku, kana una vo wayoya kakala, ndungutila yo kondwa mini kwa vunzanesanga e salu kiandi kia sekola. Adieyi i kani diandi? Wazolanga manisa e salu kiandi kia sekola muna ntangwa yasikidiswa.

Asekodi awaya, bena muna buka kia 2.300 z’ampangi bekuyivananga kuna mvevo mu sala muna mavula 190 mu nz’amvimba. E kimbuta kiau kia tuka mvu 20 yakuna mvu 90, bekuyifuntunanga kimana wantu bawá e nsangu za lufiaulwisu zina muna Nkand’a Nzambi, ezi zisekolwanga mu 500 za ndinga.—⁠Lusengomono 7:⁠9.

Vavanga Wantu a Ndinga Zayingi

Muna mvu miavioka, e salu kia nsekola kia Mbangi za Yave kiawokela kikilu. Kasikil’owu, muna mvu wa 1985 Eyingidilu mu ndinga 23 zaswaswana dianietekwanga nkumbu mosi, ediadi diasivi kikilu. O unu, Eyingidilu mu ndinga 176 divayikiswanga kimana awonso betanganga dio mu nza yawonso konso ntangwa balongoka diambu diau adimosi.

Eyingidilu i finkanda-nkanda fitoma vayikiswanga lembi ningameswa. Divayikiswanga ntangwa zawonso mu tezo kia ndinga 50. Ekuma? Ekuma kadi mavula menietekanga e nkanda kebekasakesanga wantu ko mu sekola nkanda milenda nietekwa mu ndinga za kisi nsi. Kansi, Mbangi za Yave mu nz’amvimba bevananga tukau twau twamvevo kimana e Diambu dia Nzambi ye nkanda kevayikisanga ntaudi akwikizi mialwaka mwawonso yamuna zunga ina ye nsatu zayingi.—⁠2 Korinto 8:⁠14.

O wantu beluta yangalelanga o wá nsangu zambote za Nkand’a Nzambi muna ndinga za yau kibeni. Muna bong’e nona, ke kolo kiayingi ko e nkanda mieto miayantikwa sekolwa mu ndinga Miskito, ndinga yivovwangwa kwa tezo kia 200.000 ma wantu kuna Nicarágua. Nkento mosi walomba nkanda Tusansu twa Nkand’a Nzambi * muna ndinga Miskito. Vava katambula nkanda wau, o mfidi a dibundu dia zunga kiandi vavana mpe kawanuka. Vava kamona vo nkanda wowo wambote kikilu wazola wo bonga. Kansi, o nkento ndiona katonda ko, mfidi a dibundu wamvana kilo 20 ya nkasa yovo madezo ye kilo 20 ya kafe vana fulu kia nkanda!

Muna mvu miavioka, e nkanda mieto misekolwanga mu vioka ndinga kumi ye zole za kisi nsi kuna México kumosi ye ndinga Maya, Nahuatl ye Tzotzil. Ke vavioka mvu kumi ko nkutakani 72 za mingutukila a mbanza ye nding’a sinsu ya Mbangi za Yave muna nsi yayina yawokela, owau se tezo kia nkutakani 1.200. Mbangi za Yave bekunanga nsangu za Nkand’a Nzambi muna ntima mia wantu, kansi beyambulanga vo Nzambi kamenesa mbongo aludi.—⁠1 Korinto 3:5-7.

Nkand’a Nzambi wa Tandu Kieto mu Ndinga 80 Wasekolwa

Muna mvu miviokele, Mbangi za Yave basala kwayingi mu nieteka Nkand’a Nzambi wa nsekola ya Tradução do Novo Mundo das Escrituras Sagradas wamvimba yovo ndambu mu ndinga 80. Nkia nluta diatwasa? Mbangi mosi a Yave kuna nsi ya África do Sul wavova mu kuma kia nsekola ya Nkand’a Nzambi muna ndinga Tswana vo: “Ekiaki sadilwa kiamfunu kikilu. E nsekola yayi yiwokese kiese kiame muna Diambu dia Nzambi. Mu mvovo mialeboka wasekolwa ye kiese uvananga mu tanga wo.” Mpangi mosi kuna Moçambique ovovanga Tsonga, wasoneka vo: “Kana una vo twakala ye nkanda miawonso kevayikisanga ntaudi akwikizi, kondwa Nkand’a Nzambi, miakala nze kuma kwina ye miandazi ye nsemo kansi lembi noka. Kansi, e mvula yanoka vava kiavayikiswa o Nkand’a Nzambi wa nsekola ya Tradução do Novo Mundo das Escrituras Sagradas muna ndinga Tsonga.”

Ozevo, awana besekolanga yo samuna nsangu zambote zina mu Nkand’a Nzambi, ungunza umosi wankulu wa Nkand’a Nzambi belungisanga. Yesu Kristu yandi kibeni wavova vo: “E nsangu zazi zambote za kintinu zisamunwa muna nza yawonso, muna umbangi kwa zula yawonso; i bosi iluak’e mbaninu.”—⁠Matai 24:⁠14.

[Mvovo Vana Yand’a lukaya]

^ tini. 8 Wavaikiswa kwa Mbangi za Yave.