E fu kia kuyitundidika kilenda fila muntu mu yima e fu kia sia mpambula. O nkwa kuyitundidika okwikilanga vo e ngindu zandi zisundidi o mfunu. Oyindulanga vo osundidi akaka yo kubabadikila vo ke bazeye diambu ko. Konso muntu olenda bwa mu ntambu wau. Encyclopædia Britannica ivovanga vo: “Wantu a makanda mayingi beyindulanga vo e mpila zingu kiau, madia mau, mvuatu miau, fu yau, mana bekwikilanga, kadilu kiau ye mankaka mpe, masundidi makanda mankaka.” Aweyi tulenda vengela e ngindu zazi zambi?

‘Kuna lulembamu, nubadikila ankaka vo banusundidi.’—FILIPI 2:3.

Aweyi disongele? Muna venga e fu kia lulendo, tufwete yima e fu kia lulembamu. Lulembamu lukutusadisanga mu zaya vo muna mambu mankaka ma zingu, akaka batusundidi. Ke vena kanda ko dina vo yau awonso akwa ngangu ye akwa fu yambote kaka.

Badika e nona kia Stefan. Wasansukila muna nsi ya luyalu lwa Comunista, kansi wasunda e  fu kia veza wantu a nsi ke ziyalwanga ko kwa Comunista. Wavova vo: “Ikwikilanga vo obadikila akaka vo basundidi, disadisanga mu venga e fu kia sia e mpambula. Kizeye mawonso ko. Ndenda longoka diambu kwa konso muntu.”

Vanga e ngolo mu kala ye ngindu zasikila mu kuma kia ngeye kibeni yo zayanga vilwa waku. Zaya wo vo akaka baviokele muna mambu mankaka. Kuyindula ko vo o wantu a kanda kingandi yau awonso wantu ambi.

Vana fulu kia yima e ngindu zambi mu kuma kia musi nkanda kingandi, ukiyuvula:

• ‘E fu kina kizolanga ko muna muntu ndioyo, nga kiambi yovo kiaswaswana kaka?’

• ‘Nga o muntu ndioyo olenda solola vilwa omu mono?’

• ‘Mu nkia mambu muntu ndioyo kansundidi?’

Avo ovene mvutu za yuvu yayi ye ziku kiawonso, kusunda kaka e fu kia sia mpambula ko, kansi osolola mpe mambu mambote muna yandi.