E LEKWA MU MANTA KAKA INA ADIEYI OLENDA VANGA?
Yangalelanga Ina una Yau
O wantu ana beyangalelanga ina bena yau, zingu kiakiese bekalanga kiau. Kana nkutu vava e mambu mesobanga muna zingu kiau, bevanganga mawonso muna zingila mun’owu wa lekwa bena yau.
EKUMA DININA O MFUNU MU YANGALELANGA INA UNA YAU?
Jessica Koehler ona walongoka e mambu ma Psicologia wamona vo, awana beyangalelanga ina bena yau, ngindu zasikila bekalanga zau ye diampasi dikalanga kwa wantu awaya mu mwena akaka kimpala. Muna kuma kiaki, ke diasivi ko mu mona vo o wantu ana beyangalelanga ina bena yau akwa kiese ye ke betokananga kwa saka ko. Dialudi vo akaka muna wantu awaya, ke bena ye nzimbu zayingi ko. Kansi, akwa kiese kadi betoma sianga e sungididi kiau muna mambu mana mena vo ke malendi sumbilwa mu nzimbu ko nze, e kiese kiakala vamosi ye esi nzo ye akundi.
ADIEYI OLENDA VANGA?
Venga e fu kia kuyitezanesa ye akaka. Avo oyantikidi tezanesa e lekwa yakete una yau ye lekwa yayingi ina akaka bena yau, olenda yantika lembi yangalela ina una yau yo yima nkutu e fu kia kimpala. Kansi e ludi kia diambu i kiaki: Akaka muna awana bena ye mavua mayingi nanga mu mfuka bayisia. Nicole ona ozingilanga kuna Senegal, wavova vo: “Muna kala ye kiese, kivavanga kala ye lekwa yayingi ko. Kansi, avo ngiangalele ina ngina yau, ndenda kala ye kiese kana nkutu vo akaka mavua mayingi bena mau lutila mono.”
Teza vanga e diambu edi: Venga tala mafoto yovo tuzayisu muna internete otu tusiamisanga luzolo lwakala ye mavua mayingi ngatu tala wantu ana bevavanga songa vo zingu kiambote bena kiau.
Vutulanga matondo. Nkumbu miayingi, o wantu ana bena ye fu kia vutula matondo, beyangalelanga ina bena yau yo lembi mona vo lekwa yayingi diaka bavuidi o mfunu ngatu bafwanukini. Roberton wa musi Haiti wavova vo: “Yivaulanga e ntangwa muna yindula owete una akaka bekumpanganga kumosi ye esi nzo ame. I bosi, ivutulanga matondo kwa wantu awaya muna mawonso batuvangidi. Ilonganga mpe mwan’ame wa mvu nana mu vutulanga matondo muna konso lekwa kekayilwanga.”
Teza vanga e diambu edi: Konso lumbu, sonekanga e mambu ovutulwila matondo. Dilenda kala mu kuma kia vimpi waku, ngwizani ambote ye esi nzo, akundi akieleka, vava e ngonde itezamanga yovo mpaika a nkongolo.
Ezak’e ntangwa diampasi kikilu dikalanga kwa yeto awonso mu yangalela ina tuna yau. Kansi, e ngolo tuvanganga, ke zankatu ko. Vava tusolanga yangalela ina tuna yau, tusolanga mpe kala akwa kiese, kina vo i fu ke kilendi sumbilwa mu nzimbu ko.
