E LEKWA MU MANTA KAKA INA ADIEYI OLENDA VANGA?
Vena ye Mambu Kulendi Soba ko
Vava e ntalu a lekwa imantanga malembe malembe, dilenda kala diampasi muna bakula e diambu diadi, musungula vava tukudikilwanga o mfutu a nzimbu kuna salu. Kansi, vava e ntalu a lekwa imantanga vana vau ye avo e nzimbu tufutwanga ke zikulamene ko, tulenda yantika tokana kwasaka musungula avo mbebe tuna yau yalunga-lunga esi nzo.
Ke tulendi kakidila o manta kwa ntalu a lekwa ko. Kansi, avo tutambulwidi vo vena ye mambu ke tulendi singika ko ediadi dilenda kututwasila nluta miayingi.
EKUMA DININA O MFUNU MU ZAYA VO VENA YE MAMBU KULENDI SOBA KO?
O wantu ana betambulwilanga vo vena ye mambu ke balendi soba ko, bemonanga vo diasazu mu . . .
-
kala wavuvama. Vava tukalanga twavuvama, tutoma yindulanga yo baka e nzengo zambote.
-
venga mavangu mambi. Kasikil’owu, dilenda kala dia uzowa mu lembi futa e mpaku muna diambu ditadidi luzu, maza ye mambu mankaka yovo fwasa e nzimbu muna lekwa ke tuvuidi mfunu ko.
-
lembi tantana yo esi nzo mu kuma kia nzimbu.
-
vava e mpila balenda zizidila e diambu diadi. Ediadi dilenda songa vo lembi fwasa e nzimbu zayingi yo baka e nzengo za sumba kaka e lekwa ina kikilu bavuidi o mfunu.
ADIEYI OLENDA VANGA?
Kala wakubama muna kulukilwa o mambu. Muna kolo e lekwa imantanga mu nzaki, diangangu muna kulula e lekwa tusumbanga avo dilendakana. Akaka bevavanga fwasa e nzimbu zayingi lutila zina bena zau ye ediadi dikitulanga e zingu kiau se kiampasi. Muna kuma kiaki, o wantu awaya beyoyanga. Dialudi vo otokanenanga e wete dia esi nzo aku ye ozolele kubavana ina bavuidi o mfunu. Kansi sungamena e diambu edi: Esi nzo aku zola kwaku, ntangwa ye sungididi kiaku bavuidi o mfunu lutila lekwa kiankaka.
Ovava fwasa e nzimbu zayingi lutila zina tuna zau, dikitulanga e zingu se kiampasi
