E LEKWA MU MANTA KAKA INA ADIEYI OLENDA VANGA?

Sadila e Nzimbu mu Mpila Yambote

WINIKINA MU

O manta kwa ntalu a lekwa, mpasi ditwasanga kwa yeto awonso. Kansi, kudimbula e vuvu ko. Kadi vena ye mambu olenda vanga muna lembi mona mpasi zayingi.

EKUMA DININA O MFUNU MU SADILA E NZIMBU MU MPILA YAMBOTE?

Avo kusadidi e nzimbu zaku ko mu mpila yambote, ediadi dilenda kutwasila mpasi za kondwa nzimbu yo tokana kwasaka. Kana nkutu vo nzimbu zakete kaka una zau, vena ye maka mambu olenda vanga malenda kusadisa mu sadila e nzimbu zaku mu mpila yambote.

ADIEYI OLENDA VANGA?

Zinga mun’owu wa mbakilu zaku. Avo ovangidi wo, wavuvama ye wakubama okala muna sumba e lekwa kina kwavingilanga ko.

Muna lenda zingila mun’owu wa mbakilu zaku, vanganga e mbalu, i sia vo, soneka e ntalu a nzimbu ofutwanga ye zina osadila muna lekwa ina ovuidi o mfunu. Vava omana soneka, kala ye ziku vo osadila kaka e nzimbu muna lekwa ina ovuidi kikilu o mfunu. I bosi, vanga mawonso muna landa mana osonekene yo vanga e nsobani ekolo e ntalu a lekwa isobanga. Kansi avo wakazala, bakanga e nzengo kumosi yo nkaz’aku.

Teza vanga e diambu edi: Vana fulu kia kota e mfuka, sadila kaka e nzimbu una zau muna sumba e lekwa ozolele avo dilendakana. Akaka bemonanga vo osadila e nzimbu mu mpila yayi, dikubasadisanga muna toma sadila e nkubika bevanganga muna mpila ina besadila e nzimbu zau yo venga deva e nzimbu. Vaulanga mpe ntangwa muna fimpululanga e ntalu a nzimbu una zau kuna banco. Avo ozeye e ntalu a nzimbu una zau kuna banco, kutokana kwayingi ko.

Dilenda kala diampasi mu zingila mun’owu wa mbakilu zaku. Kansi avo ovangidi nkubika zambote, dilenda kala dialusadisu. Dilenda mpe kulula e ntokani zaku.

‘Badika e ntalu.’—Luka 14:28.

Tanina e salu kiaku. Nkia mambu olenda vanga muna tanina e salu kiaku? Tala maka mambu olenda vanga: Lwakanga mu ola yambote kuna salu. Kalanga ye ngindu zasikila mu kuma kia salu kiaku. Vitanga o ntu muna sadisa akaka yo salanga ye fululu kiawonso. Kalanga nkwa luzitu. Landanga tuludiku twa salu yo tomesa salu kiaku.

Venga sadila e nzimbu muna mambu makondwa o mfunu. Ukiyuvula: ‘Nga nkumbu miayingi nzimbu zayingi ifwasanga muna sumba e lekwa ina ke ina kwandi mfunu ko?’ Kasikil’owu, wantu ayingi befwasanga e nzimbu zina befuntukinanga kwayingi muna sumba droga, mfomo, nua malavu mayingi ma nkolwa yo kuyivana muna nsaka za mpanza. E mambu mama malenda mpe fwasa o vimpi wau yo vidisa e salu yau.

“Nkwa kiese o muntu osolwele ngangu. . . disundidi wete ke mu palata ko.”—Ngana 3:13, 14.

Lundanga e nzimbu mu kuma kia mambu ma kinsalukisa. Avo dilendakana, lunda finzimbu mu kuma kia mambu ma kinsalukisa. E nzimbu zazi zilenda kusadisa avo ngeye yovo yitu kiaku obakamene kimbevo, avo okatwilu mu salu yovo diambu diankaka dibwidi.

“E ntangw’ampasi yo mambu makinsalukisa mebwilanga [yeto] awonso.”—Kimpovi 9:11.

Mambu Malenda Kusadisa mu Lunda e Nzimbu

Lambanga madia ngeye kibeni.

Olenda fwasa nzimbu zayingi avo una ye fu kia sumba madia malambwa kala yovo dila kuna restaurante nkumbu miayingi. Kana una vo ntangwa ye ngolo divavanga muna lamba madia ngeye kibeni, ovanga wo dilenda sadisa muna lunda e nzimbu. Dikusadisa mpe mu zaya kana vo madia mambote odianga.

Kala ye ngangu muna ntangw’a sumba.

Soneka e lekwa o sumba yo vanga e ngolo muna sumba kaka e lekwa osonekene. Venga sumba e lekwa kuvuidi kwaku mfunu ko.
Avo nzimbu una zau, diangangu mu sumba lekwa yayingi mu nkumbu mosi vava ikalanga yakuluka e ntalu. Sola fulu kiambote muna lundila lekwa yayi kimana yalembi wola mu nzaki.
Vava sumba e lekwa ya kompani itomene zayakana kansi muna ntalu akuluka.
Sumbilanga muna internete vava e lekwa ikulukanga e ntalu kimana wavenga sumba lekwa ina kukanini ko yo zaya e mpila ina una sadila e nzimbu zaku. Avo muna zunga ozingilanga diasazu dikalanga mu sumbila muna internete, nga olenda teza e ndekwa zazi?
Sumba e lekwa muna kolo kina maloja mekululanga e ntalu a lekwa yau. Tezanesanga e ntalu a lekwa kumosi ye ntalu a kura, maza ye lekwa yankaka.

Teka yindula vitila wasumba lekwa yampa.

E makompani mesokanga telefone ye lekwa yankaka, mevaikisanga lekwa yampa ntangwa zawonso muna vava wokesa nzimbu zau. Muna kuma kiaki, ukiyuvula: ‘Nga o sumba telefone ina mu moda nluta kikilu dikuntwasila? Nga mfwete soba kikilu e telefone ame o wau? Avo nsobele yo, nga modelo yayi yampa mfunu kikilu mvuidi yo?’

Vangululanga e lekwa yo sadila yo diaka.

Avo dilendakana vangululanga e lekwa yaku ya kuku kimana wasadila yo mu kolo kiayingi. Olenda mpe sumba e lekwa yasadilwa kala kansi yakinu yambote.

Kala ye mpatu aku.

Nga olenda vaula fulu muna lupangu lwaku kimana wavanga e mpatu? Muna mpila yayi kufwasa nzimbu zayingi ko muna sumba madia mu kuma kia esi nzo aku ye olenda mpe nkutu sadila e lekwa okuna muna teka yovo kayila akaka.

“E makani ma nkwa fululu nluta metwasanga.”—Ngana 21:5.

“Ntangwa ke ntangwa tuvavanga fimpa e ntalu a lekwa ina tusumbanga ye una tusadilanga e nzimbu tuna zau.”—Miles, Inglaterra

“Vitila twasumba e lekwa muna supermercado, mono ye esi nzo ame tusonekanga e lekwa tuvuidi o mfunu.”—Jeremy, U.S.A

“Ntangwa ke ntangwa tufimpululanga kumosi ye esi nzo e nzimbu tuna zau yo zaya una tulenda zo sadila ye tulundanga finzimbu mu kuma kia mambu ma kinsalukisa.”—Yael, Israel.

“Tulonganga wan’ento bavangululanga e yekwa vana fulu kia vava sumba e lekwa yampa. Muna lekwa yayi dilenda kala vo kalu dieto ye lekwa yankaka tusadilanga muna nzo. Mono yo nkaz’ame tuvanganga mpe mawonso muna lembi sumba e lekwa ina mu moda.”—Jeffrey, U.S.A

“Yakulula e ntalu a nzimbu yafwasanga muna sumba e lekwa kadi yavanga e mpatu ya mono kibeni yo twela e nsusu. Ilendanga nkutu kayila akaka e lekwa ya mpatu ame.”—Hono, Mianmar.