E LEKWA MU MANTA KAKA INA ADIEYI OLENDA VANGA?
Kayilanga Akaka
Avo diampasi dikalanga kwa ngeye mu sumba e lekwa kina ozolele, nanga olenda yindula vo ke dilendakana ko mu kayila akaka. Kansi, okayilanga akaka dilenda kusadisa mu zizidila e mpasi za kondwa nzimbu. Dilendakana kwandi kwa ngeye mu lundanga nzimbu yo kayilanga mpe akaka.
EKUMA DININA O MFUNU MU KAYILANGA AKAKA?
Tutoma yangalalanga vava tukayilanga akaka, kana nkutu kina tuvene kiakete kwandi. Madotolo mankaka bevovanga vo okayila akaka dilenda kala diambote muna vimpi weto wa nitu ye muna ngindu. Kasikil’owu, dilenda kulula ntelamw’a moyo, ntokani zasaka, ndunzi muna nitu yo vuvika ntima. Dilenda mpe sadisa mu toma lekanga.
Vava tusadisanga akaka, kiakala kubavana nzimbu yovo lekwa kiankaka bevuanga o mfunu, diasazu dikala muna tambulwila lusadisu lwa akaka vava tuvuanga lo mfunu. Howard ona ozingilanga kuna Inglaterra wavova vo: “Wau vo mono yo nkaz’ame tuvanganga mawonso muna kayila akaka, diasazu dikalanga muna tambulwila lusadisu lwa akaka vava tuvuanga lo mfunu.” Dialudi vo awana bekayilanga akaka kuna mvevo ke bevanganga wo ko ye kani diavingila vo akaka mpe babakayila. Kansi, kina balenda tambula i akundi akieleka ana bekalanga bakubama muna kubasadisa vava bevuanga lusadisu o mfunu.
ADIEYI OLENDA VANGA?
Kayilanga ankaka ina una yau. Kanele vo lekwa yakete una yau, olenda kwaku kayila akaka, kana nkutu fimadia. Duncan ye esi nzo andi ana bezingilanga kuna Uganda, asukami kikilu, kana una vo i wau besonganga e fu kia kayila akaka. Duncan wavova vo: “Muna konso Kialumingu, mono yo nkaz’ame tubokelanga akaka ku nzo eto muna dila vamosi. Tuzolanga viokesa e ntangwa ye wantu ankaka.”
Dialudi vo, vava okayilanga akaka ofwete kala ye tezo. Kadi avo ke wau ko olenda mwesa esi nzo aku e mpasi.—Yobi 17:5.
Teza vanga e diambu edi: Kayila muntu fimadia yovo lekwa kia nua. Avo una ye lekwa kusadilanga diaka ko, nga ke diambote ko mu kaya kio kwa akundi aku yovo mfinangani aku?
Mpila yankaka olenda kayila. Tukau twankaka twamfunu, ke tufwanga nzimbu ko. Kasikil’owu, tulenda sadila ntangw’eto muna vanga mambu muna wete dia akaka. Kana nkutu mvovo miangemba milenda kala se lukau. Muna kuma kiaki, zayisanga akaka vo otoma kubazolanga ye mfunu kikilu bena kwa ngeye.
Teza vanga e diambu edi: Sadisanga akaka muna salu yau ya lumbu ke lumbu, vangulula e nzo yovo sumba lekwa. Soneka nkanda yovo twika mensagem kwa nkundi aku, kana nkutu kunzayisa kaka vo yandi una yindula.
Avo oyimini e fu kia kayila akaka, okala ye kiese kiayingi
