E LEKWA MU MANTA KAKA INA ADIEYI OLENDA VANGA?
Kala ye Vuvu
Nga muna nsi aku e ntalu a lekwa mu manta kaka ina ye kuna futwa nzimbu zafwana ko kuna salu? Nga otokananga una olungisila e nsatu zaku ye za esi nzo aku? Avo e mvutu zaku elo, nanga olenda tokana mu kuma kia kusentu. Kansi, kana nkutu muna ntangw’ampasi, okala ye vuvu mfunu kikilu dina.
EKUMA DININA O MFUNU MU KALA YE VUVU?
O wantu ana bena ye vuvu ke bevingilanga kaka ko muna mambu mambote mevangama. Kansi, e vuvu kikubasadisanga muna vanga mana balenda muna tomesa e mambu mu zingu kiau owau. Kasikil’owu, o lufimpu lusonganga vo awana bekalanga ye vuvu . . .
-
nkumbu miayingi belendanga zizidila mambu mampasi
-
diasazu dikalanga kwa yau mu kulukilwa e nsobani
-
bebakanga nzengo zambote ezi zikubasadisanga mu kala yo vimpi wambote ye zingu kiambote
ADIEYI OLENDA VANGA?
Diantete, zaya una e Bibila kilenda kusadisila o unu. E Bibila kivuidi malongi mayingi mamfunu malenda kusadisa mu zaya dina olenda vanga mu kuma kia manta kwa ntalu a lekwa. Malongi mama ye mambu mankaka, malenda kusadisa mu lembi dimbula e vuvu yo zaya dina olenda vanga owau ye kuna sentu vava mambu mekituka mampasi kikilu.
Dianzole, zaya dina Bibila kivovanga mu kuma kia kusentu. Avo obakwidi o mfunu wa ngangu zina muna Bibila, okala ye tima dia zaya diaka mayingi mu kuma kia kusentu. Kasikil’owu, olongoka vo Nzambi kazolele kaka ko vo wakala ye “vuvu ye zingu kiasikila kuna sentu,” kansi okutuvananga kuma kiasikila muna kwikila mu vuvu kiaki. (Yeremiya 29:11) E kuma kiaki i Kintinu kia Nzambi.
NKI I KINTINU KIA NZAMBI? NKIA MAMBU KIVANGA?
E Kintinu kia Nzambi i luyalu luyala e nza yawonso. (Daniele 2:44; Matai 6:10) Tuka kuna zulu, o Nzambi ofokola e mpasi, usukami ye wantu awonso bezingila mu luvuvamu ye bekala ye yawonso bevua o mfunu muna kala ye kiese, nze una usonganga e sono ilende.
Ulolo wa wantu bekwikilanga muna nsilu miami kadi bena ye ziku vo Nzambi “kalendi vuna ko.” (Tito 1:2) Ozevo, ekuma olembi tangila e Bibila ngeye kibeni? E vuvu kina muna Bibila kilenda kusadisa mu kala ye ngolo mu zizidila e kolo kiampasi yo kala ye vuvu vo kuna sentu e mambu toma metoma.
Nanga Oyangalela Mpe Malongi Mama
SIKAMA!
E Nza Yankinda-Nkinda—Kudimbula Vuvu Ko
E Bibila kilenda kutusadisa mu zizidila e mpasi za zingu yo kutuvana e vuvu mu kuma kia sentu.
MVUTU ZA YUVU YA BIBILA
Nzimbu ye Mfuka—Nga Bibila Kilenda Kusadisa?
Nzimbu ke zitwasanga kiese ko, kansi vena ye nkanikinu nyá mia Nkand’a Nzambi milenda kusadisa mu kala ye ngangu muna ndilu a nzimbu.
TU AKI NANI
Lomba Beza Kukingula
Zaya e mvutu za Bibila mu kuma kia kiuvu kiaku, yovo zaya mayingi mu kuma kia Mbangi za Yave.
