Ke kolo ko, e Kintinu kia Nzambi tuvingilanga, i sia vo, luyalu lwasikidiswa kwa Nzambi lutwasa luvuvamu ye kintwadi mu nza yawonso. Muna Nkunga 72:7 tutanganga vo: “Luvuvamu luwokela.” Nkia ntangwa e Kintinu kia Nzambi kikwiza? Nkia mambu mevangama muna Kintinu kia Nzambi? Adieyi ofwete vanga muna baka nluta mia Kintinu kiaki?

Bibila kivovelanga mambu mamfunu mevangamanga muna songa vo e ngiz’a Kintinu kia Nzambi ifinamene. E mambu mama mawonso, vita mu nza yawonso, nzala, yimbevo, nzakama za ntoto yo wokela kwa umpumbulu i “sinsu” kia lumbu yambaninu.—Matai 24:3, 7, 12; Luka 21:11; Lusengomono 6:2-8.

Ungunza wankaka uvovanga vo: “Muna lumbu yambaninu mukwiza nsungi zampasi ye vonza. Kadi wantu bekala akwa kuyizola, minzol’a nzimbu, . . . akolamini a mase ye ngudi, ntokozi, minkondwa kwikizi, minkondwa nzol’a ungudi, minkondwa ngwizani, akumbi, minkondwa volo, akwa nganzi, mindembi zola mawete, . . . bazola kuyitundidika, azodi a nkembo ke mu Nzambi ko.” (2 Timoteo 3:1-4) Wantu besonganga e fu yayi bekalanga va nza tuka kolo, kansi owau bawokele mu nza yawonso.

Ungunza wau wayantika lungana tuka muna mvu wa 1914. Azingudi a tusansu, ayadi ye asoneki bayika una e nza yasobela tuka mvu wauna. Muna bonga e nona, Peter Munch wa musi Dinamarca wavova vo: “E vita yabwa muna mvu wa 1914, i diambu diasoba e zingu kia wantu.” Vitila mvu wauna, e zingu kia wantu kiambote kikilu kiakala, kansi tuka mvu wauna e sumbula yayantika wokela, wonga, lumengo ye nkinda-nkinda mu nza yawonso.”

Kansi, e mambu mama mena nze tembwa kiangolo kibundumukini vitila kialembama. Mambu mama mesonganga vo ke kolo ko Kintinu kia Nzambi kiyala e nza yawonso. Vana ntandu, Yesu wayika diambu diankaka diamfunu muna sinsu kia lumbu yambaninu. Wavova vo: “E nsangu zazi zambote za Kintinu zisamunua mu nza yawonso muna umbangi kwa zula yawonso, i bosi e mbaninu ikwiza.”—Matai 24:14.

E nsangu zambote i mbuta a diambu besamunanga e Mbangi za Yave. Muna kuma kiaki, e finkanda betoma sadilanga fiyikilwanga vo Eyingidilu Disamunanga Kintinu kia Yave. Nkumbu miayingi, divovelanga mambu mambote mana Kintinu kia Nzambi kivanga muna wete dia wantu yo ntoto.

Muna baka mvutu za kiuvu kiaki, tala mambu yá mamfunu malende:

1. Kintinu ke kisadila konso luyalu lwa wantu ko ngatu sunzulwa kwa tuyalu twatu.

2. Ayadi a nza ke bezola yambula e wisa kiau ko, muna kuma kiaki, betelamena Kintinu kia Nzambi.—Nkunga 2:2-9.

3. Kintinu kia Nzambi kifwasa yintinu yawonso izolele kwamanana yala muna vita yansuka. (Daniele 2:44; Lusengomono 19:17-21) E vita yayi iyikilwanga vo Armangedo.—Lusengomono 16:14, 16.

4. Wantu awonso ana betambulwila yalwa kwa Kintinu kia Nzambi bevuluka muna Armangedo yo zingila muna nza ya luvuvamu. Bekala muna buka kiyikilwanga muna Bibila vo “ndong’ayingi,” i sia vo, wantu ana ke balendi tangwa ko.—Lusengomono 7:9, 10, 13, 14.

E diambu diantete ofwete vanga muna yalwa kwa Kintinu kia Nzambi i longwa yovo vua zayi. Yesu wasamba kwa Nzambi vo: “Muna vua moyo a mvu ya mvu, divavanga vo batoma kuzaya, ngeye Nzambi mosi kaka aludi yo Yesu Kristu ona watuma.”—Yoane 17:3.

Vava wantu belongokanga vo Yave wa Nzambi muntu kieleka, nluta miayingi betambulanga. Tala nluta miole: Entete, bekalanga ye lukwikilu lwasikila muna Nzambi. Lukwikilu lwalu lutukanga una mambu masikididi oma mekubakwikidisanga vo Kintinu kia Nzambi kiakieleka ye ke kolo ko kiyantika yala e nza. (Ayibere 11:1) Diazole, o zola kwau muna Nzambi yo wantu ankaka kuwokelanga. O zola kwau muna Nzambi kukubafilanga mu kunlemvokela ye nsi a ntima yawonso. O zola kwau muna wantu, kukubasadisanga mu lemvokela e mvovo emi mia Yesu mitomene zayakana: “Konso una nuzolele vo wantu banuvanga, i una mpe nuvanga kwa yau.”—Luka 6:31.

O Mvangi eto, una nze se dia nzodi ona otokanenanga e wete dieto. Ozolele vo twakala ye moyo owu uyikilwanga muna Bibila vo “moyo kikilu.” (1 Timoteo 6:19) Kansi, o unu wantu ke bena ye “moyo kikilu” ko. Kadi wantu benuananga ye mpasi zayingi muna zingu. Muna zaya kana nki i “moyo kikilu,” tala e mambu mambote e Kintinu kia Nzambi kisinga vanga muna wete dia wantu.