Don yo Margaret * bayangalala tambula mwan’au ankento ye esi nzo andi ana bayenda kubakingula. Muna madia ma lumbu kiansuka, Margaret, ona wazaya e salu kia lamba, walamba makaroni ye queijo,wau vo i madia batoma zolanga atekelo andi wole.

Vava awonso bafonga, Margaret watwasa madia yo sia mo vana kati kwa meza. Vava kakatula e finikwa, esi nzo bayantika kovola. Muna pidi, supu dia queijo dia tiya kaka diakala mo. Margaret wavilakana sia makaroni muna nzungu! *

Kiakala nkia kimbuta tuna kiau yovo nkia zayi tuna wau muna konso diambu, yeto awonso vilwa tuvanganga. Dilenda kala vo vova diambu lembi teka yindula, vanga diambu mu ntangwa yambi, lembi sia sungididi mu diambu yovo lembi vanga diambu. Ekuma vilwa uvangamenanga? Adieyi tufwete vanga avo vilwa tuvangidi? Nga tulenda venga o vilwa? O nyindu asikila ukutusadisa mu vana mvutu za yuvu yayi.

Vava tuvanganga diambu diambote, tutambulwilanga ye kiese kiawonso o lusanisinu luna tumwene vo lutufwanukini. Vava tuvanganga vilwa kana nkutu lembi wo kana yovo akaka ke babakwidi wo ko, nga ke diambote mpe ko mu tambulwila vilwa weto? Muna wo vanga, lulembamu divavanga.

Avo tusidi sungididi kiasaka muna yeto kibeni, tulenda veza o vilwa weto, tumba wantu akaka yovo vakula nkalu vo vanga tuvangidi wo. Mavangu mama malenda twasa mfwilu. E diambu dilenda kala kaka wowo lembi singikwa, wantu akaka balenda tumbwa e nkatu. Kana nkutu vo tulendele fuka o vilwa weto, tufwete sungamenanga vo kuna sentu, “konso muntu muna yeto, okuyitela mbalu kuna kwa Nzambi.”—Roma 14:12.

Nzambi ovuidi nyindu asikila mu kuma kia vilwa. Muna nkand’a Nkunga, Nzambi oyikilwanga vo “nkwa nkenda yo ungudi”; ‘kekwamanana tumba ko, ngatu funga makasi yakwele mvu.’ Ozeye wo vo tu asumuki, obakulanga lutovoko lweto, ‘osungamenanga wo vo tu ntoto.’—Nkunga 103:8, 9, 14.

Vana ntandu, nze se dia nkenda, Nzambi ozolele vo yeto wan’andi twabadikila o vilwa nze una yandi kebadikilanga wo. (Nkunga 130:3) E Diambu diandi dikutuvananga ulolo wa malongi ye luludiku muna kutusadisa vava tuvanganga vilwa yovo vava akaka bevanganga vilwa.

Nkumbu miayingi vava vilwa uvangamanga, o muntu ntangwa ye ngolo zayingi kefwasanga muna yekeka e ngielele kwa akaka, muna vava singika dina kavovele yovo dina kavangidi. Kansi,  avo e mvovo miaku mikendelekele akaka, ekuma olembi lombela e ndoloki, singika mambu yo tatidila e kikundi? Nga diambu diambi ovangidi edi ditwese mfwilu yovo mpasi kwa ngeye kibeni yovo kwa akaka? Vana fulu kia kuyifungila makasi yovo tumba akaka, ekuma olembi vangila e ngolo za singika mambu? O siandama vana e ngielele kwa muntu ankaka, ntantani diwokesanga nkatu-nkatu yo lembi fokola e mambu mu nzaki. Kansi, longokela vo diambu, singika o vilwa waku yo vanga dina difwete vangwa.

Vava muntu ankaka mpe kevanganga vilwa, diasazu kwa yeto mu songa vo tukendalele. Kansi, diambote mu landa e longi dia Yesu Kristu vava kavova vo: “Ozevo, mawonso nuzolele vo wantu banuvanga, i mau mpe nufwete vanga kwa yau.” (Matai 7:12) Avo vilwa ovangidi, kana nkutu wakete kwandi, ka lukatikisu ko vo ovavanga vo wantu akaka bafwila e nkenda yovo baloloka emvimba o vilwa waku. Ozevo, ekuma olembi vangila e ngolo za songa e nkenda zau zimosi kwa akaka?—Efeso 4:32.

Disionario dimosi disasilanga vo e “mfundisa zalembi songa, zayi wabendomoka yovo lembi sia sungididi muna diambu” i difilanga muntu mu vanga vilwa. Kieleka, tulenda vova ye ziku kiawonso vo, yeto awonso ezak’e ntangwa tuvanganga dimosi muna mambu mama. Kansi, avo tubadikidi miaka nkanikinu miasina mia Nkand’a Nzambi, disadisa mu venga vanga o vilwa.

Umosi muna nkanikinu miami una muna sono kia Ngana 18:13, eki kivovanga vo: “On’ovana mvutwilu ke mu teka wa ko, dia uzowa yo luvungu kwa yandi.” Kieleka, o vaula fintangwa muna teka wá mambu mawonso yo yindula e mvutu ovana, disadisa mu venga vana e mvutu lembi teka yindula yovo vova diambu kuna makasi. O zayi ovua muna toma sia e sungididi, ukusadisa mu venga vanga o vilwa muna mambu mawonso mena vo mfundisa zalembi songa.

O nkanikinu wankaka uvovanga vo: “Avo dilendakana, kuna dieno sambu, nukadila kuna luvuvamu yo wantu awonso.” (Roma 12:18) Vanga mawonso olenda mu wokesa mwand’a luvuvamu yo sala e ntwadi. Vava osalanga ye akaka, ubavuanga o mfunu yo kubazitisa yo vanga e ngolo za kubasanisina yo kubakasakesa. Avo muntu uvovese yovo uvangidi diambu diambi lembi teka yindula, olenda kunloloka yovo vilakana diambu mu sazu. Kana nkutu vilwa wampwena ulenda singikwa kuna zola kwawonso.

Longoka diambu muna vilwa waku. Vana fulu kia vava vakuba muna dina ovovele yovo ovangidi, badikila dio se lau mu wokesa e fu yaku yambote. Nanga luzindalalu, ngemba yovo volo ozolele wokesa. Adieyi tuvova mu kuma kia luvuvamu yo zola? (Ngalatia 5:22, 23) Vana ntandu, olenda zaya dina kufwete vutukila diaka vanga ko. Kusie sungididi kiasaka ko muna mpasi omwene muna ntima. O kala ye fu kia seva dilenda sadisa mu vengomona e ntantani.

O kala yo nyindu asikila mu kuma kia vilwa, dikutusadisa mu zaya dina tufwete vanga avo vilwa uvangamene. Tukala yo luvuvamu lwa ntima yo luvuvamu ye akaka. Avo tuvangidi e ngolo za longoka diambu muna vilwa weto, tukituka se akwa ngangu yo zolakana. Ke tutokana kwayingi ko ngatu kukiyindulwila e mbi. O zaya vo akaka mpe benwananga mu singika vilwa wau, dikutusadisa mu kubafinama. Edi disundidi o mfunu, tulenda vua nluta muna longoka tanginina o zola kwa Nzambi yo luzolo lwandi lwa loloka kuna mvevo.​—Kolosai 3:13.

Nga o vilwa wa Margaret ona oyikilu kuna lubantiku wafwasa e nkingula yayina? Nkatu. Wantu awonso babadikila dio se diambu diatusevo, musungula Margaret, yau awonso bayangalela madia mamana kana una vo ke mwakala makaroni ko. Muna mvu mialanda, atekelo andi wole bazayisa kwa wan’au e diambu diavangama muna lumbu kiakina yo sungamena mambu mambote ma nkaka zau. Vana ntandu, owauna mpasi vilwa kwandi!