I wau kavova dumbelele kimosi kia mvu 13 vava kakayilwa mwan’a mbwa. Nkento mosi osalanga salu kia kinkita, wavova vo e komputadore kakayilwa kwa se diandi vava katanganga, i lukau lwasoba kikilu e zingu kiandi. Yakala dimosi wasompele ke kolo ko, wavova vo e kalati kasonekenwa kwa nkaz’andi muna luyindulu lwa lumbu kia lukazalu lwau, i lukau lusundidi o mfunu katambula.

Konso mvu, ndonga bevanganga ngolo yo fwasa ntangwa muna vava lukau “lwambote” bevana kwa nkundi yovo yitu kiau muna lumbu kiamfunu. Ayingi badi yangalela wá e mvovo mina bavova ana bayikilu ova ntandu. Adieyi tuvova mu kuma kiaku? Nga olenda vana yovo tambula lukau lutoma yangalelwa?

Ediadi dilenda twasa kiese, ke kwa ndiona kaka otambala lukau ko, kansi kwa ndiona mpe ovana lo. Nkand’a Nzambi uvovanga vo: “Edi disundidi e kiese dia vana, ke mu tambula ko.” (Mavangu 20:35) Kieleka, o mvani a lukau olenda mona kiese kele vo ndiona otambwidi lukau otomene lo yangalela.

Adieyi olenda vanga kimana lukau lwaku lwakala se nto a kiese kiakieleka kwa ngeye ye kwa ndiona otambula lo? Avo ke dilendakana ko mu vana lukau “lusundidi,” adieyi olenda vanga kimana lukau lwaku lwayangalelwa?