Mfwilu mia Vita
E vita mfwilu miayingi itwasanga kwa awana bewanukanga muna fulu ya vita. Masoladi ye nkangu ana bamona kala e vita batomene zaya e mfwilu miami.
MASOLADI
“Olenda mona wantu bevondwanga yovo lwekwa. Omona vo kuna mu lutaninu ko.”—Gary, Grã-Bretanha.
“Yatela mpuza ku nima ye vana mpolo. Yamona mpe wantu ayingi bafwa, kumosi ye yindende ye anunu. E vita ilenda kukitula nkwa ntim’a mbadi.”—Wilmar, Colômbia.
“Avo muntu ovondelo vana ntwal’aku, diampasi kikilu dikalanga mu vilakana diambu diadi. Olenda kwamanana yindula e kazu ye mpasi kamweswa. Kusinga vilakana muntu ndiona ko.”—Zafirah, Estados Unidos.
NKANGU
“Yamona vo kisinga kala diaka ye kiese ko. Yamona wonga wa fwa, kansi edi dialuta kumbwesa o wonga i zaya vo e yitu yame yovo akundi ame balenda vondwa.”—Oleksandra, Ucrânia.
“Mu vonza twakala kia nongwa, kadi twakala muna nlonga ekolo twavingilanga madia, tuka muna ola ya 2 yakuna ola ya 23.”—Daler, Tajiquistão.
“Mase mame bafwa muna vita. Mu kuma kia vita, yakituka mwan’a nsona ye ke vakala muntu ko muna kumfialwisa yovo kundunga-dunga.”—Marie, Ruanda.
Kanele vo mfwilu miayingi babaka mu kuma kia vita, wantu awaya basolola luvuvamu. Kuna diak’e sambu bena ye ziku vo ke kolo ko e vita zifokoka. Eyingidilu diadi disadila e Bibila muna sasila una e diambu diadi divangamena.
