NZAMBI OFWASA TUYALU TWA WANTU

Nzambi osinga fwasa tuyalu twa wantu muna vita iyikilwanga muna Bibila vo Armangedo. a (Lusengomono 16:16) Muna kolo kiakina, “ntinu mia nza yawonso,” belunganiswa vamosi muna “vit’a lumbu kianene kia Nzambi a Mpungu-ngolo.” (Lusengomono 16:14) Armangedo i vita ya Nzambi ina ifokola e vita zawonso ova nza.

O Nzambi ovingisa e Kintinu kiandi vana fulu kia tuyalu twa wantu. Luyalu lwandi luyala tuka kuna zulu ye ke lusinga fwaswa ko. (Daniele  2:44) Nzambi wasola Mwan’andi Yesu Kristu mu kala se Ntinu. (Yesaya 9:6, 7; Matai 28:18) O luyalu lwalu, i Kintinu b kina Yesu kalonga alandi andi vo balombanga muna sambu. (Matai 6:9, 10) Wantu awonso mu kintwandi bekala vava Yesu keyala e nza yawonso.

Nswaswani ye ayadi o unu, Yesu kesadila wisa kiandi ko muna wete dia yandi kibeni. Kadi oyandi nkwa unsongi ye ke sianga mpambula ko, ke vekala muntu ko otokana muna kuyimwena vo kena mfunu ko mu kuma kia nkand’a nitu, nsi yovo fulu kina kasansukila. (Yesaya 11:3, 4) O wantu ke betokana diaka ko mu kuma kia fu kia kondwa unsongi. Ekuma? Kadi o Yesu otokanena e wete dia konso muntu. “Okûla nsukami  vava kekaza, ye mumbona-mpasi ye ndiona okondelo nsadisi. . . . Okubakûla muna lubangamu ye nsoki.”—Nkunga 72:12-14.

E Kintinu kia Nzambi kifokola e nkele miawonso. (Mika 4:3) Kifokola mpe yimpumbulu yovo awana ke bezolanga kadila mu luvuvamu ko ye akaka. (Nkunga 37:9, 10) Akala, akento yo wana bezingila mu luvuvamu ova ntoto.—Yezekele 34:28.

Vava Kintinu kia Nzambi kiyala ova ntoto, wantu awonso zingu kiambote bekala kiau. Kifokola e mambu mawonso mefilanga o wantu mu nuana, nze usukami, nzala ye fulu kia zingila. Wantu awonso bekala ye lau dia vua ulolo wa madia ye bekala ye nzo zambote muna zingila.—Nkunga 72:16; Yesaya 65:21-23.

E Kintinu kia Nzambi kifokola e mpasi zawonso bemonanga o wantu mu kuma kia vita. Ke mputa za nitu kaka ko, kansi mpe ye ntokani zasaka zina o wantu benuananga zau muna kolo kia vita. Kana nkutu awana bafwa bevutuka zinga diaka ova ntoto. (Yesaya 25:8; 26:19; 35:5, 6) O wantu bemonana diaka ye yitu yau ye ke besungamena diaka ko e mfwilu mia vita, kadi mebadikilwa vo ‘mambu mavioka.’—Lusengomono 21:4.

NZAMBI OFOKOLA E SUMU

Vava Kintinu kia Nzambi kiyala ova ntoto, wantu awonso besambila kaka Yave c wa Nzambi aludi, ona una vo “Nzambi a zola yo luvuvamu.” (2 Korinto 13:11) O wantu belongoka una balenda zingila entwadi mu luvuvamu. (Yesaya 2:3, 4; 11:9) Awana belemvokela mana belongoka bevevolwa muna sumu.—Roma 8:20, 21.

NZAMBI OFWASA SATANA YE NKUYA MIANDI

E Kintinu kia Nzambi kifwasa awana benungununanga e vita, i sia vo, Satana ye nkuya miandi. (Lusengomono 20:1-3, 10) Wau vo ke bevukumuna diaka wantu ko, o “luvuvamu luwokela.”—Nkunga 72:7.

Olenda kala ye ziku vo o nsilu a Nzambi wa fokola e vita lungana kikilu ulungana. Nzambi una ye lendo yo luzolo lwa fokola e vita.

•   Nzambi una ye ngangu yo nkuma wafwana muna fokola e vita ye mavangu mansoki. (Yobi 9:4) Kavena diambu ko dilenda kunkakidila muna lungisa e nsilu miandi.—Yobi 42:2.

• Nzambi okendalalanga vava o wantu bemonanga e mpasi. (Yesaya 63:9) ‘Omenganga mpe ndiona ozolanga nsoki.’—Nkunga 11:5.

• Nzambi olungisanga e nsilu miandi, kalendi vuna ko.—Yesaya 55:10, 11; Tito 1:2.