Nkia ntangwa ivewa o luzayisu lwa “luvuvamu ye ngemba”?

Nze una twavovele kala muna “Yuvu ya Atangi” yavaikisu ke kolo ko muna Eyingidilu a dimosi, o Yave ke kolo ko osia muna ntima mia “mpoka kumi” (ayadi awonso a ngolo) e “kani” diandi, i sia vo, bavana e wisa yo nkum’au kwa “bulu kiansisi kiambwaki,” i sia vo, kwa Nações Unidas. E bulu kiaki kiyikilwanga mpe vo “teke kia bulu kiansisi.” (Lus. 13:14, 15; 17:3, 16, 17) Ozevo, e “mpoka kumi” ye bulu kiansisi eki kitambula e wisa, befwasa emvimba e nsambil’a luvunu. Owau, o luzayisu lwa “luvuvamu ye ngemba” b luvewa vitila yovo vava e nsambilʼa luvunu ifwaswa?—1 Tes. 5:3.

Oyeto ke tuzeye ko e ntangwa yasikididi ivewa o luzayisu lwa “luvuvamu ye ngemba.” Kele vo twazaya mawonso ke diadi kala mfunu ko twakwamanana yingila. Muna kuma kiaki, o Yesu ntangwa zawonso wavovesanga alandi andi vo: “Nukwamanana yingila.” (Mat. 24:42; 25:13; 26:41) Owau, yambula twavovela o ungunza una Paulu wa ntumwa kavumunuinua muna nkanda kasonekena esi Tesalonika.

Paulu wasoneka vo: “Vava beyantika vova vo, ‘Luvuvamu ye ngemba!’ vana vau, o lubukumuku lukubalwakila kuna kinsalukisa.” (1 Tes. 5:2, 3) E nkanda mieto nkumbu miayingi miasasilanga e mvovo mia Paulu mu mpil’eyi: O luzayisu lwa “luvuvamu ye ngemba” luvangama vitila lubantiku lwa mpasi zayingi, ezi ziyantikila muna lufwasu lwa Babele Anene, i sia vo, nkubika zawonso za  nsambil’a luvunu. Twavovanga mpe vo vava bevova ‘luvuvamu ye ngemba’ tuzaya wo vo e mpasi zayingi se ziyantika.

Kansi, vava tutomene vavulula, nanga vena ye mpila yankaka tulenda bakulwila e diambu diadi. Nanga o luzayisu lwa ‘luvuvamu ye ngemba’ luvewa kuna nim’a lufwasu lwa nsambil’a luvunu. Ekuma ediadi dilenda vangamena? Yambula twabadika yuvu ilende.

Aweyi e nsambil’a luvunu iyikamenanga e vita? Bibila kisasilanga vo: “Muna yandi [“nkembi anene,” i sia vo, Babele Anene] musolokele menga ma . . . awonso bavondwa ova nza.” (Lus. 17:1, 5; 18:24) Tuka kolo, e nsambil’a luvunu iyikamanga e vita ye nkumbu miayingi i nkwa kuma muna mavangu mansoki mevangamanga ova nza yo vonda nkutu ulolo wa wantu. Muna diadi, e nsambil’a luvunu isiamisanga e vita ye mavangu mansoki, kansi ke luvuvamu ko ye ngemba. Ediadi divaikisi e kiuvu eki: Nga o luzayisu lwa “luvuvamu ye ngemba” luvewa kaka vava e Babele Anene ifwaswa? Ediadi dilenda vangama, kansi ke tuna ye ziku ko.

Nkia diambu divangama kuna nim’a luzayisu lwa “luvuvamu ye ngemba”? Paulu wavova vo: “Vana vau, o lubukumuku lukubalwakila kuna kinsalukisa.” (1 Tes. 5:3) E nota de estudo ya tini kiaki ivovanga vo: “Paulu wasonga vo vevioka fintangwa yovo ke vevioka ntangwa ko vana vena luzayisu lwa ‘luvuvamu ye ngemba’ yo lufwasu lwa awana bevana luzayisu lwalu. O lufwasu lwalu luvangamena kuna kinsalukisa ye ke bekala ye una betinina ko.” Ozevo nanga ayadi angolo, bevana o luzayisu lwa “luvuvamu ye ngemba” kuna nim’a lufwasu lwa nsambil’a luvunu, i bosi, o lufwasu lukubalwakila kuna kinsalukisa.

Adieyi nkangu a Yave uvanga muna ndungan’a ungunza wau? Paulu wavova vo: “Ampangi, ke luna mu tombe ko, kimana o mwini wanuluakila nze una uluakilanga mwivi.” (1 Tes. 5:4) Badika e diambu edi: Avo o luzayisu lwa “luvuvamu ye ngemba” luvangamene kuna nim’a lufwasu lwa nsambil’a luvunu, ozevo, o nkangu a Yave uzaya wo vo o lufwasu lwa ayadi awonso angolo luvangama ke kolo ko. Kansi, kuna kwa ayadi ana beyindula vo besiamisa o luvuvamu, o lufwasu lwau lukwizila nze mwivi, kuna kinsalukisa, lembi wo zaya.

Owau, nkia diambu tulenda vingila? Ke kolo ko “e mpoka kumi” ye bulu kiansisi eki kitambula e wisa befwasa e nsambil’a luvunu. Ediambu diadi ditwasa o lubatiku lwa mpasi zayingi. Tuzeye wo mpe vo, vekala ye ntangwa ina ivewa o luzayisu lwa “luvuvamu ye ngemba.” Nkia ntangwa ediadi divangama? Vena ye mambu mole tuyikidi malenda kutusadisa mu bakula e diambu diadi. Diantete: Nanga o luzayisu lwalu luvangama vitila o lufwasu lwa nsambilʼa luvunu. Diazole: Nanga o luzayisu lwalu luvangama vava ayadi awonso befwasa emvimba e nsambilʼa luvunu. Tufwete vingila kimana twamona mawonso mevangama. Nkumbu miayingi o ungunza wa Bibila utoma bakulwanga muna kolo kina ulungananga yovo kuna nim’a ndungana.—Tezanesa ye Yoane 12:16.

Kansi, edi disundidi o mfunu kwa yeto ke ntangwa ko ivewa o luzayisu lwa “luvuvamu ye ngemba,” kansi i sikila ye kwikizi kwa Nzambi. Tufwete ‘yingila yo lungalala,’ kimana twakala kikilu twatoma kubama kiakala nkia mpila ina o ungunza ulunganena.—1 Tes. 5:6.