Obadiya kiyekwa kakala kiau muna nzo a Akabi wa Ntinu ambi, ona wayambula vo e nsambil’a Bale, wa nzambi aluvunu yasayana muna nsi. Kansi, Obadiya Yave kikilu kavuminanga ‘tuka muna kileke kiandi.’ (1 Nti. 18:1-13) Vava Izebele wa Ntinu ankento kavana o nswa vo e ngunza zawonso za Yave zavondwa, Obadiya wazaya wo vo kafwete songa unkabu yo vanga e diambu muna kubasadisa. O sweka kaka kana nkutu ngunza mosi, diavonza kikilu diakala; kansi Obadiya wasweka 100 za angunza, wabalunga-lunga yo kubadikila muna kolo kia mvengele wayingi. Yindula una diakadila diampasi kwa Obadiya mu venga tungununua kwa ulolo wa ngunza zaluvunu ana basadilanga o ntinu yo ntinu ankento.—1 Nti. 18:19.

Adieyi tulenda longoka muna muntu ndioyo wavuminanga Nzambi? Kana una vo Obadiya wakala yo wonga wa Akabi, o vumi wandi muna Nzambi wasunda. Ediadi diamvana unkabu muna sia e zingu kiandi mu vonza muna tanina e mpangi zandi. Avo e nsambil’a ludi isiminu muna zunga tuzingilanga, oyeto mpe tufwete yima vumina Nzambi. O vumi wa mpila yayi ukutukumika muna sadisa e mpangi zeto ana bena mu mpasi.