NGA bakayila kala e lekwa kina vo kiamfunu kikilu kwa ngeye? Nanga o muntu ona otoma zolanga yandi wakayila e lekwa kiokio. Nkia diambu wavanga? Kalukatikisu ko vo otoma kio lunga-lunganga.

Bibila kivovanga vo wana “i nkayilu a Yave.” (Nku. 127:3) Dialudi vo mase bena vo Akristu bebadikilanga wan’au vo lukau lwamfunu lwatuka kwa Se diau dia zulu ye bazolele vanga mawonso balenda muna toma kubalunga-lunga muna nitu, ngindu ye muna kimwanda.

Diankenda vo mase mankaka o unu ke bebadikilanga wan’au ko se nkayilu a Nzambi. (Yes. 49:15; 2 Tim. 3:1-3) Mase mankaka nanga bazolele lunga-lunga wan’au, kansi diampasi dikalanga mu kuma kia mambu mankaka mampasi bewanananga mau. Nkia maka mambu mama mampasi mefilanga mase mu lembi lunga-lunga wan’au? Adieyi o Yave kevingilanga kwa mase? Aweyi mase bena vo Akristu balenda sansila wan’au mu mpila yambote?

MAMBU MAMPASI BEWANANANGA MAU MASE

• Lubangamu lwa yitu ye wantu ankaka. Muna zunga yankaka, mase ana bena ye wan’ayingi betoma zitiswanga kwa akaka. Muna kuma kiaki, akazi balenda komekenua kwa yitu yovo mfinangani zau mu wuta wan’ayingi, i sia vo, lutila ana belenda lunga-lunga.

• Tokanena oma ma kusentu. Mu zunga yankaka wan’ayingi befwanga mu kuma kia nzala, mayela yovo kondwa kwa mawuku mambote. Muna kuma kiaki, akazi ankaka bebakanga e nzengo za wuta wan’ayingi kadi bena ye ziku vo akaka ke befwa ko yavana belwaka muna ntel’a kimbuta. Akazi ankaka bewutanga wan’ayingi kimana babalunga-lunga vava benuna. Ediadi ditoma vangamanga musungula muna nsi zina vo anunu ke belungwa-lungwanga ko kwa ayadi.

• Lembi vanga e nkubika muna kakidila yimita. Mu zunga yankaka, akazi ayingi ke bazeye e nkubika zazi ko zakakidila yimita yovo nlongo mina balenda sadila muna kakidila kimana o nkento kalembi yimita. Akaka belendanga nlongo yovo pílulas, kansi wau vo ke zambote beni ko, wonga bemonanga wa vonza e nlongo miami milenda twasa muna nitu au. Akaka ke belendanga sumba nlongo miami ko kadi ntalu yayingi mifwanga. a

ADIEYI O YAVE KEVINGILANGA KWA MASE?

Balungisanga e nsatu za kinitu za wan’au. Yave wavana e mbebe kwa mase balungisanga e nsatu za kinitu za wan’au. Ovingilanga vo mase basalanga ye fululu kiawonso kimana bavana madia, mvuatu ye fulu kia zingila kwa wan’au awonso yavana bekula. Yave ozolele mpe vo mase balonganga wan’au. Muna kuma kiaki, mase bena vo Akristu  ke befilanga wan’au ku internato ko. Kansi, bevanganga mawonso kimana o wan’au bazinga yau yavana bekula, batambula malongi mamfunu ma zingu, viokesa yau e ntangwa kimana bamona vo mu lutaninu bena ye betoma zolwanga. Diamfunu musungamenanga vo Yave nkwa ntim’anleka ye ke vingilanga ko vo mase bakala amvuama. Ekiaki i kuma kasolela mase bakala vo asukami, kansi akwa fululu muna salu, muna sansa Mwan’andi mosi kaka ona ketoma zolanga.—Mat. 13:55, 56; Luka 2:24.

Nkanikinu wa Bibila: “Kieleka, avo muntu ke toma lunga-lunganga awana kavuidi ko, musungula esi nzo andi, ovanini lukwikilu nkalu, oviokele mundembi-kwikila muna mbi.”—1 Tim. 5:8.

Yave ozeye wo vo mase balenda vua lusadisu o mfunu ekolo benunanga. Ozevo, imosi muna mpila o wana balenda vanina o zitu kwa mase mau i vanga e nkubika muna kubalunga-lunga vava benuna. (Luv. 20:12; 1 Tim. 5:4) Kansi, Yave otoma yangalalanga vava mase beyindulanga una balenda lunga-lungila wan’au, vana fulu kia tokanena una o wan’au bekubalunga-lungila.—2 Kor. 12:14.

Balungisanga e nsatu za mwanda za wan’au. Mase bena vo Akristu bena mpe ye mbebe ya longa wan’au bazola Yave yo kunsambila. Kuna kwa Yave, e mambu mama i mau masundidi o mfunu o mase balenda longa wan’au.—Nsi. 6:6, 7.

Nkanikinu wa Bibila: “Nubasansilanga [wan’eno] muna longi ye luludiku lwa Yave.”—Efe. 6:4.

YAVE OZOLELE VO MASE BASANSA O WAN’AU MU MPILA YAMBOTE

Nuteka kubama mu kuma kia kusentu. Avo nuzolele wuta wana, nutoma yindula mambu ma zingu kieno. Kasikil’owu, nga nukala ye nzimbu zafwana muna vana madia, mvuatu yo longa wan’ayingi? Avo ve, numokena kimana nuakulula lutangu lwa wana nuwuta mpasi vo nualenda sansa o wan’eno mu mpila ina o Yave kazolele. Dialudi vo, o Yave obakulanga vo ke mambu mawonso ko ma zingu mevavanga vo o muntu kateka kubama ntete. (Kim. 9:11) Kansi, o Yave osambula e ngolo zawonso nuvanga kimana nuakala e mpila mase oyandi kazolele vo nuakala.

Nkanikinu wa Bibila: “E makani ma nkwa fululu nluta metwasanga, kansi akwa ntim’a duku-duku sukama besukama.”—Nga. 21:5.

“Nani vovo nuina, avo ozolele tunga nzo yandá, kalembi teka vuanda, kabadika e ntalu mu zaya kana vo una ye nzimbu zafwana mu manisa yo?”—Luka 14:28.

Nusia Yave vana fulu kiantete. Nuvanga  mawonso kimana o sadila Yave diakala se diambu disundidi o mfunu kwa esi nzo eno. Avo luna ye wana, nukala ye kani dia longa konso mwana mu zola Yave. Nubasadisa basianga e sungididi yo longoka diambu muna tukutakanu. Nukalanga ye nsambila ya esi nzo konso lumingu. Nulonganga wan’eno una balenda silanga o umbangi. Ke nuvingila ko vo yitu yeno yovo wan’eno bena vo ambuta balungisa mawonso mama. Kadi eyayi i mbebe eno. Ntangwa ye ngolo zayingi divavanga muna sadisa wana bazola Yave, kansi avo nuvangidi wo nluta miayingi nuvua.

Nkanikinu wa Bibila: “Kina ye kiese kisundidi kiaki ko: kia wá vo o wan’ame muna ludi bekangalelanga.”—3 Yoa. 4. b

Nubunda Yave e vuvu. Kiakala vo luna yindula wuta wana yovo luna kala yo wana, nukala ye ziku vo e nkanikinu mia Yave misundidi o mfunu lutila fu ya kisi nsi yovo mana mevangamanga muna zunga nuzingilanga.

Avo nubakidi e nzengo zalembi wuta wan’ayingi, nukala ye vuvu vo Yave okunulunga-lunga muna kinunu kieno. Nusunda e ngindu za sia vo, nufwete wuta wana kadi vava bekola besala e nzimbu zafwana muna kunulunga-lunga muna kinunu kieno. Ke nulendi kala ye wonga ko vo ke vekala yo muntu ko muna kunulunga-lunga. Kadi, Yave wasia nsilu wa kunulunga-lunga ye ntangwa zawonso olungisanga e nsilu miandi.—Yos. 23:14.

Nkanikinu wa Bibila: “Bunda Yave e vuvu ye ntim’aku wawonso, kubundi vuvu muna umbakuzi wa ngeye kibeni ko. Untadila muna nzila zaku zawonso, yandi osingika e nzila zaku.”—Nga. 3:5, 6.

“Toko yakala, owau ndunini, Kansi kisidi mona nsongi ko kabembolwa, ngatu wan’andi bavava madia.”—Nku. 37:25.

“Ozevo, nuvavanga ntete Kintinu ye unsongi wa Nzambi, e lekwa yayi yawonso ikunukudikilwa.”—Mat. 6:33.

O wana i nkayilu o Yave kavana kwa mase. Kalukatikisu ko vo Yave otoma yangalalanga vava mase bena vo Akristu betoma lungisanga e mbebe yayi. Kuna zola kwawonso mase belungisanga e nsatu za kinitu, ngindu ye za mwanda za wan’au; bebakanga e nzengo za lutangu lwa wana bewuta yo sia luzolo lwa Nzambi vana fulu kiantete ke fu ya kisi nsi ko yovo mana akaka bevovanga. Vava bevanganga wo, besonganga vo o wan’au lukau lwamfunu, i sia vo, “i nkayilu a Yave.”