1-2. Nkia mambu malenda kutufila mu lembi kala ye ngwizani ambote ye yitu yeto bena vo ke Mbangi za Yave ko?

 YESU wavovesa o muntu ona wazola kituka nlandi andi vo: “Wenda kuna nzo kwa yitu yaku, ubasamunuina mawonso Yave kavangidi.” (Maku 5:19) Yesu wavova e diambu diadi kadi wazaya wo vo wantu ayingi bekalanga ye luzolo lwa zayisa e nsangu zambote kwa yitu ye akundi au.

² Nga osungamene una wamona vava wayantika longoka e Bibila? Nanga watoma yangalala yamu tezo kia zola zayisa mawonso walongoka kwa yitu yaku. Kansi, dilenda kala vo e yitu yaku ke batambulwila ko mana wabavovesa. Yovo e mpila wabazayisila e ludi yatwasa e ntantani vana kati kweno. Avo i diau diambwila, nki kilenda kusadisa mu kwamanana sikila ye kwikizi muna Yave yo kala ye ngwizani ambote ye yitu yaku?

3. Nkia mambu tulongoka mu longi diadi?

³ Mu longi diadi tulongoka: (1) Una e nkenda zikutufidilanga mu tokanena e wete dia yitu yeto ana ke besambilanga Yave ko kana nkutu vo ke bazolele longoka oma ma Yave ko; (2) dina tulenda vanga avo yitu yeto bavovele yovo vanga e diambu ditukendelekele; (3) una tulenda sadisila e yitu yeto avo tubasongele luzindalalu yo kala ye vuvu vo balenda sadila Yave kuna ntwala ye (4) una tulenda songela vo tukubazolanga.

YAMBULA E NKENDA ZAFILA MU SADISA E YITU YAKU

4. Aweyi Yesu kakadilanga ye awana ke batambulwilanga e nsangu zandi ko?

⁴ Yesu kabembola ko vana vau awana ke batambulwilanga ko e nsangu zandi. Muna kingana kimosi, Yesu wakitezanesa yo nsadi ona wasadila ndekwa zaswaswana muna sadisa o nti a nsanda kimana wayima e bundu. (Luka 13:6-9) Vava Yesu kayika kingana kiaki, se vioka mvu tatu kavavanga sadisa Ayuda kimana  bakwikila muna yandi yo kituka se alongoki andi. Ekuma kakwamanena kubasadisila? Kadi Yesu wafwilanga wantu e nkenda, ediadi diansadisanga mu kubasonga luzindalalu.

5. Nki kiafilanga Yesu mu fwila Ayuda e nkenda?

⁵ Yesu wafwilanga Ayuda e nkenda kadi e mfumu za mabundu ke balendanga kubasadisa ko mu kala ye lukwikilu lwasikila muna Nzambi. Yesu wavova vo Ayuda bakala nze “mameme makondwa mvungudi.” (Maku 6:34) Vava lufwa lwandi lwafinamanga, Yesu wadila mu kuma kia mbanza Yerusaleme kadi wazaya wo vo wantu bazingilanga mo badi vidisa o moyo au mu kuma kia kondwa kwa lukwikilu. (Luka 19:41-44) Vava tufwilanga e yitu yeto e nkenda nze una Yesu kavanga, dilenda kutufila mu kubasadisa.

6. Ekuma tufwete songelanga luzindalalu kwa yitu yeto bena vo ke Mbangi za Yave ko? (Ngalatia 6:9)

⁶ Tanga Ngalatia 6:9. Kana nkutu e yitu yeto ke basongele ntete luzolo lwa longoka oma ma Yave ko, tufwete kwamanana kubasonga luzindalalu yo lembi yambula vanga e “diambu diambote.” Tuzeye wo vo ntangwa divavanga kimana o muntu kavanga e nsobani muna mana kekwikilanga yo kala yo lukwikilu muna Yave. Nanga vakala mpe ye ntangwa ina ongeye ‘kwakala ye vuvu ko yo lembi zaya Nzambi.’ (Efe. 2:12) Avo i wau, kalukatikisu ko vo vakala yo muntu wasadisa. Ozevo, avo osongele luzindalalu kwa yitu yaku, okala mpe ye lau dia kubasadisa mu zaya mayingi mu kuma kia Yave.

DINA TULENDA VANGA AVO YITU YETO BAVOVELE YOVO VANGA DIAMBU DITUKENDELEKELE

7. Nkia diambu nanga diakakidilanga abunzi a Yesu mu kwikila muna yandi?

⁷ Abunzi a Yesu nanga bawá e nsangu za masivi mana kavanga kuna Ngalili. (Luka 4:14, 22-24) Kuna lubantiku, ke bakwikila muna yandi ko. (Yoa. 7:5) Ekuma? Bibila ke kiyikanga e kuma ko. Kansi, kivovelanga mambu mole makakidilanga akaka muna Ayuda mu kituka se alongoki a Yesu. Diantete, akaka wonga wabangikwa kwa mfinangani zau bamonanga. (Yoa. 9:18-22) Diazole, akaka bakizayila kala Yesu tuka muna kileke, ediadi diabafilanga mu lembi kwikila vo Yesu i Mwan’a Nzambi. (Maku 6:1-4) Nanga abunzi a Yesu ngindu zazi mpe bakala zau. Nga e yitu yeto i wau mpe bemonanga?

8. Nki kilenda fila e yitu yeto mu vova yovo vanga diambu dilenda kutukendeleka?

⁸ Yindula e kuma bavovele yovo vanga e diambu dikendelekele. Nanga abunzi a Yesu bakala muna buka kia yitu ana bavova vo Yesu “ozengomokene.” (Maku 3:21) Ekuma bavovela e diambu diadi? O lusansu lusonganga vo Yesu wakivananga emvimba muna salu kia umbangi yo wuka wantu, kakala nkutu ye ntangwa ya dia ko. (Maku 3:20) Nga e yitu ya Yesu bayindulanga vo mambu kasakisanga? Dilenda kala. E yitu yeto mpe nanga beyindulanga vo mambu tusakisanga mu kuma kia dibundu dieto. Avo i wau, diambote muna kubasonga muna mvovo ye mavangu meto vo kanele vo e salu kieto kia umbangi i kiau kisundidi o mfunu, kansi vena mpe ye mambu mankaka tuvanganga muna zingu.

9. Nki kilenda sadisa yitu yeto mu soba e mpila ina bekutubadikilanga? (1 Petelo 3:1, 2) (Tala mpe mafoto.)

⁹ Songanga mbandu ambote. E mvovo ye mavangu meto mangemba, malenda fila e yitu yeto muna soba e mpila ina bebadikilanga e Mbangi za Yave. (Tanga 1 Petelo 3:1, 2.) O yakala una vo ke Mbangi a Yave ko olenda mona kinsona yovo funga makasi mu sazu vava o nkento andi kekwendanga mu tukutakanu yovo mu salu kia umbangi. Muna lembi fila o yakala kamona kinsona yovo funga makasi,  o nkento kalenda vanga e nsobani muna salu yandi ya mwanda kimana kaviokesanga e ntangwa yafwana yo yakala diandi. Kasikil’owu, o nkento kalenda vanga e nkubika za vaikanga mu salu kia umbangi vava nkaz’andi kena ku salu yovo avo kena ku nzo ko. Vava o nkento kevanganga e nsobani muna yangidika yakala diandi, dilenda kala diasazu muna kunsadisa mu soba e mpila ina kebadikilanga e Mbangi za Yave.

10. Aweyi tulenda tanginina Yesu vava akaka bevovanga mambu mambi mu kuma kieto?

¹⁰ Ke dina mfunu ko mu vana e mvutu muna konso diambu diambi bevovanga mu kuma kieto. Vava akaka bamvunina mambu vo nkwa loko ye nduvu a vinyu, Yesu kafunga makasi ko ngatu vava songa vo mana bavova maluvunu. Kansi, wakasakesa o nkangu mu vava zaya e ziku kia mambu. (Mat. 11:19) Yesu wasonga mpe muna mvovo ye mavangu vo wakalanga ye tezo ye wayangalelanga e zingu. (Tezanesa ye Yoane 2:2, 6-10.) Diau dimosi mpe, avo yitu yaku bavovele e mbi mu kuma kiaku, kuvavi vana e mvutu ko muna mawonso bekuvovesa. Kansi, songa kwa yitu yaku muna mvovo ye mavangu vo u nkwa tezo ye oyangalelanga e zingu. Ediadi dilenda kubafila mu yambula kwikila muna ngindu zabendomoka bekalanga zau mu kuma kieto.

KWAMANANA KALA YO LUZINDALALU YE VUVU

11. Aweyi Yesu kakadila ye abunzi andi?

¹¹ E Bibila kisonganga vo Yesu wakwamanana songa luzindalalu kwa abunzi andi. Kasikil’owu, dilenda kala vo oyau mpe bakala kuna Kana vava o Yesu kavanga e sivi diandi diantete. (Yoa. 2:11, 12) Kanele vo i wau, abunzi a Yesu ke bakwikila mu yandi ko. Kansi, o Yesu kayambula kubasonga zola ko. E Bibila kisonganga vo, tezo kia mvu tatu vava Yesu kavanga e sivi diandi diantete kuna Kana, wakwamanana songa ngemba kwa abunzi andi.—Yoa. 7:5-8.

12. Nki kilenda kutusadisa mu kwamanana kala ye vuvu vo akaka muna yitu yeto balenda kituka akundi a Yave?

¹² O toma bakula e nkenda za Yave dilenda kutusadisa mu kwamanana kala ye vuvu vo e yitu yeto balenda kituka akundi a Yave. Vava e mpasi zayingi ziyantika, o wantu nanga bekala ye lau diakala ku sambu dia Yave. Dilenda kala vo, vava e nsambil’a luvunu ifokoka e yitu yeto besungamena mana twabavovesanga mu kuma kia diambu diadi. Nanga balenda baka e nzengo za sadila Yave. a (Lus. 17:16) Kansi vitila batuyikama, avo bawanane ye diambu diampasi owau, tufwete vanga mawonso tulenda muna kubasadisa. Dilenda kala vo betambulwila  e ludi kia Bibila avo bamwene vo zola tukubazolanga ye wete diau tutokanenanga.

SONGA VO ZOLA OKUBAZOLANGA

13. Nkia diambu ke tuzolele ko vo e yitu yeto bayindula?

¹³ Dialudi vo mayingi tuvanganga muna salu kia Yave, kansi ke tuzolele ko vo e yitu yeto bayindula vo ke tuna ye ntangwa ko mu kala yau entwadi yovo ke tukubazolanga diaka ko. (Mat. 7:12) Aweyi tulenda songela vo tutokananga mu kuma kiau? Yambula twavovela maka mambu.

14-15. Mu nkia mpila tusongelanga vo tuzolanga e yitu yeto bena vo ke Mbangi za Yave ko? Yika e nona.

¹⁴ Kwamanana mokena yau yo kubasonga vo zola okubazolanga. Tusonganga vo tuzolanga e yitu yeto vava tukubazayisanga una twina. Kasikil’owu, tulenda kubatwikila mensagem ye mafoto twakatula vava twakala mu vundu, nkangalu yovo vava twakala kumosi ye akundi. O lukau lwakete yovo nkanda una ye mvovo miangemba, nanga i diau dilenda kala o mfunu muna siamisa e ngwizani ye yitu yaku. Vava tuvanganga e mambu mama, tusonga vo tukubazolanga.

¹⁵ Badika e nona kia mpangi ankento Anna kuna Armênia. E yitu yandi betoma viokesanga e ntangwa kumosi, musungula muna nkinzi mia luwutuku ye nkinzi miankaka ke mina ngwizani ko ye nkanikinu mia Bibila. Vava mpangi Anna katambulwila e ludi, e yitu yandi bayantika tokana mu kuma kia una e ngwizani au isobela. Batokanena mpe una ukala e zingu kiandi kuna ntwala wau kakituka Mbangi a Yave. Adieyi mpangi Anna kevanganga muna vuvika e yitu yandi? Wavova vo: “Vava ikingulanga e yitu yame, ikubazayisanga oma ma zingu kiame ye salu isalanga. Ikubabokelanga mpe ku nzo ame yo kubasunzula kwa akundi ame. Muna kuma kiaki, ayingi muna yitu yame batomene zaya akundi ame ye bewizananga. Ayingi muna yitu yame bampovesa kala vo o mono mu kiese ikalanga ye ke betokananga diaka ko mu kuma kiame.”

16. Aweyi Yesu kasongela vo watokanenanga e wete dia Yakobo wa mpangi andi? (Tala mpe mvovo vana yand’a lukaya.)

¹⁶ Songa vo otokanenanga e wete diau. Vava kafuluka, Yesu wasonga vo watokanenanga e wete dia Yakobo wa mpangi andi vava kamoneka kwa yandi. (1 Kor. 15:7) Nga olenda yindula una Yakobo kamona vava kabakula vo Yesu kayoya ko mu kuma kiandi? Nanga e kiaki i kolo Yakobo kabakula vo Yesu i Masia. Kuna nim’a wanana yo Yesu, nanga Yakobo wasadisa e yitu yankaka mu bakula vo Yesu i Masia. b—Mav. 1:14.

17. Aweyi tulenda sadila o luludiku luna muna Roma 12:15? (Tala mpe foto.)

 ¹⁷ Tanga Roma 12:15. Avo tusongele vo wete dia yitu yeto tutokanenanga vava bevuanga o lusadisu o mfunu, kiakala muna ntangw’a mpasi yovo muna ntangw’a kiese, tulenda kubasadisa mu soba mana beyindulanga mu kuma kieto. c Kasikil’owu, avo mosi muna yitu yeto owutidi, tulenda kunsanisina yo kumvana lukau kimana kazaya wo vo tuyangalele mu kuma kiandi. Avo mosi muna yitu yeto ofwidilu, tulenda kumfiaulwisa muna mvovo mieto, kuntwikila mensagem yovo vava e mpila yankaka muna kunkasakesa. Dianu, ke tufwete vilakananga ko kubabokela, twika mensagem yovo kubakingula ntangwa ke ntangwa, musungula avo diambu diampasi bena nuana diau.

18. Aweyi tulenda tanginina Andere wa nlongoki?

¹⁸ Sunzula e yitu yaku kwa ampangi za nkutakani. Vava Andere wa nlongoki kazaya wo vo Yesu i Masia, vana vau wasunzula Petelo wa mpangi andi kwa Yesu. (Yoa. 1:40-42) Nga ongeye mpe olenda vanga diau dimosi? Kasikil’owu, nga olenda bokela e yitu kiaku mu lungana mu lukutakanu yovo kumbokela kuna nzo aku kimana nuadia kumosi ye akundi aku? Vava tusunzulanga e yitu yeto kwa mpangi zeto, ediadi dilenda kubasadisa mu bakula vo yeto tuna nze wantu ankaka ye tuzolanga vanga edi diambote.

19. Aweyi tufwete kadilanga ye yitu yeto kana una vo ke betoma bakulanga ko mana tukwikilanga? (1 Petelo 3:15)

¹⁹ Tanga 1 Petelo 3:15. Dilenda kala vo e yitu yeto ke betoma bakulanga ko e kuma ke tuvangilanga maka mambu ko, kansi balenda kwamanana sungamena e ngemba ye luzitu tukubasonganga. Kana una vo ke tukalanga  yau diaka kumosi ko muna nkinzi ke mina ngwizani ko ye nkanikinu mia Bibila, nanga balenda yangalala avo tuvangidi e ngolo muna viokesanga yau e ntangwa. Kasikil’owu, tulenda kubakingula, dia yau kumosi yo kubavana tukau mu kolo yankaka.

KUDIMBULA E VUVU KO KWA YITU YAKU

20. E mbandu a Yakobo ekuma inina ya lukasakeso kwa yeto?

²⁰ Yakobo kalanda Yesu ko ekolo kasalanga e salu kiandi kia umbangi ova ntoto. Kansi kuna kwalanda, wakituka mosi muna alongoki a Yesu ye mayingi kalongoka muna malongi ma Yesu. (Ngal. 1:18, 19; 2:9) Kasikil’owu, wasonekena Akristu e nkanda muna kayikila e malongi mafwanana ye mana o Yesu kalonga vana Mongo. d

21. Ekuma ke tufwete dimbulwila e vuvu ko kwa yitu yeto?

²¹ Kana una vo tuvanganga mawonso muna songa e ngemba kwa yitu yeto yo songa vo wete diau tutokanenanga, nanga balenda kwamanana lembi kutusonga e ngemba yovo longoka mu kuma kia Yave. Ekuma tufwete kwamanena kubasongela e ngemba? Kadi konso ntangwa tuvanganga wo, tutangininanga Yave wa Nzambi a nkenda yo Yesu wa Mwan’andi. (Luka 6:33, 36) Avo tukwamanene songa e kadilu kiambote, nanga e diadi dilenda kubafila mu soba e mpila ina bekutubadikilanga yo sungamena mana twabazayisa mu kuma kia lukwikilu lweto. Ozevo, avo ke tudimbula e vuvu ko kwa yitu yeto, tukala ye kiese kia mona akaka muna yau mu yikama e nsambil’a ludi.