Tala mambu

Tala ntu mia mambu

 KUNKU KIA 3

Aweyi Nulenda Singikila Ntantani?

Aweyi Nulenda Singikila Ntantani?

“Nusiamanan’o zolana; kadi zola i kufùka mbidi a masumu.”—1 Petelo 4:8

Kuna lubantiku lwa lukazalu lweno, nuwanana ye mambu mayingi. Mambu mama malenda bwa kadi e ngindu zeno ye mpila nubadikilanga mambu yaswaswana. Malenda mpe tuka kuna mbazi yovo mu mana mebwanga kuna kinsalukisa.

Tulenda vava venga mambu mama, kansi Diambu dia Nzambi dikutukasakesanga vo twasingika mambu meto. (Matai 5:23, 24) E mpila yambote ya singikila mambu i sadila nkanikinu mia Bibila.

 1 NUMOKENANGA

ADIEYI BIBILA KIVOVANGA? ‘Vena ye ntangw’a vova.’ (Kimpovi 3:1, 7) Nuvaulanga ntangwa mu mokenena konso diambu dikunutokanesanga. Zayisa nkaz’aku una omonanga ye ngindu zaku mu kuma kia diambu. ‘Vovanga e ludi’ kwa nkaz’aku ntangwa zawonso. (Efeso 4:25) Venga e fu kia tantana kana nkutu ku makasi una. E mvutu zambote zilenda kulula makasi yo lembi tantana.—Ngana 15:4; 26:20.

Avo vena ye diambu kuyangalele ko, kwamanana songa ngemba, kuyambula songa zola ko yo luzitu kwa nkaz’aku. (Kolosai 4:6) Nusingika mambu vana vau, ke nuyambula vovana ko.—Efeso 4:26.

ADIEYI OLENDA VANGA?:

  • Vava ntangwa yambote muna mokenena e diambu

  • Venga fu kia zenga mvovo ekolo nkaz’aku kevovanga. Ngeye mpe okala ye ntangw’aku ya vova

 2 WUNIKINA YO VAVA BAKULA

ADIEYI BIBILA KIVOVANGA? ‘Nusongaziana walakazi, nuvita ntu muna zitaziana.’ (Roma 12:10) E mpila osilanga sungididi vava nkaz’aku kevovanga mfunu ina. Vavanga bakula ngindu za nkaz’aku yo ‘yambaziananga muna mpasi . . . yo songa lulembamu.’ (1 Petelo 3:8; Yakobo 1:19) Kansi, kuwunikina kaka ko. Avo dilendakana, yambula e salu osalanga kimana watoma sia sungididi kwa nkaz’aku yovo yuvula kana vo nulenda mokenena diambu diadi mu ola yakaka. Avo obadikidi nkaz’aku nze nsadisi vana fulu kia kumbadikila vo mbeni, dikusadisa mu lembi funga makasi mu nzaki.—Kimpovi 7:9.

ADIEYI OLENDA VANGA?

  • Kala yo nyindu asikila kana nkutu vo mana owanga ke mena kuyangidika ko

  • Vava bakula e nsas’a mvovo mia nkaz’aku, sinsu kevanga ye zú dia ndinga andi

3 NUSADILA NZENGO NUBAKIDI

ADIEYI BIBILA KIVOVANGA? “Muna mfuntu wawonso mwina nluta, e mpov’a nua, nkondwa kaka itwasa.” (Ngana 14:23) Avo nubakidi nzengo, nusadila zo. Nanga dilenda vava vo nwavanga ngolo zayingi, kansi o vanga wo nluta dikunutwasila. (Ngana 10:4) Avo nuvangidi mambu kumosi, ‘nsendo ampwena nutambula.’—Kimpovi 4:9.

ADIEYI OLENDA VANGA?

  • Mokena yo nkaz’aku muna zaya dina nulenda vanga mu singika e diambu

  • Ntangwa ke ntwanga, nuvanga lufimpu mu zaya lunungunuku lweno