Tala mambu

Tala ntu mia mambu

 LONGI DIA 13

Azeyi i Nsangu Zambote mu Kuma kia Nsambila?

Azeyi i Nsangu Zambote mu Kuma kia Nsambila?

1. Nga nsambila zawonso zambote?

Muna mabundu mawonso muna ye wantu akwa ntima miambote. Nsangu zambote mu zaya vo Nzambi omonanga wantu awaya yo kubalunga-lunga. Kansi diankenda vo, mambu mayingi mansoki mevangamanga muna nkumbu a dibundu. (2 Korinto 4:3, 4; 11:13-15) Amwangi a nsangu bevovanga vo mabundu makaka mekuyisianga muna mavangu mansoki, vondana, nwan’evita yo tá e zumba yo wan’akete. Mambu mama mekendelekanga kikilu akwa ntima miambote ana bekwikilanga muna Nzambi.—Tanga Matai 24:3-5, 11, 12.

Ekolo nsambila aludi ikembelelanga Nzambi, e nsambil’aluvunu Nzambi ikendelekanga. Malongi mau ke mena mu Nkand’a Nzambi ko, musungula mana belonganga mu kuma kia Nzambi ye mafwa. Kansi, Yave ozolele vo wantu bazaya e ludi mu kuma kiandi.—Tanga Yezekele 18:4; 1 Timoteo 2:3-5.

2. Azeyi i nsangu zambote mu kuma nsambila?

Diakiese mu zaya vo Nzambi kalendi vunwa ko kwa mabundu mevovanga vo yandi bezolanga, kansi mavangu mau mesonganga vo nza ya Satana bezolanga. (Yakobo 4:4) Diambu dia Nzambi diyikilanga nsambila zawonso zaluvunu vo “Babele Anene.” E Babele i mbanza yakala kuna nz’ankulu, muna mwayantikila nsambil’aluvunu vava kiavioka Kizalu kia lumbu ya Noa. Ke kolo ko, Nzambi ofwasa kuna kinsalukisa e nsambila zivunanga yo bangika wantu.—Tanga Lusengomono 17:1, 2, 5, 16, 17; 18:8.

Vena diaka ye nsangu zakaka zambote. Yave kevilakana ko wantu akwa ntima miambote ana bena muna mabundu maluvunu mu nza yawonso. Okutakesanga wantu awaya muna kubalonga e ludi.—Tanga Mika 4:2, 5.

 3. Adieyi bafwete vanga akwa ntima miansongi?

Nsambila aludi mu kutakesa ina wantu

Yave otokananga mu kuma ki’awana bezolanga e ludi ye mambu mambote. Okubalukisanga vo bavaika muna mabundu maluvunu. Awana bezolanga Nzambi bevanganga nsobani muna yangidika Nzambi.—Tanga Lusengomono 18:4.

Muna tandu kiantete, vava akwa ntima miansongi bawá nsangu zambote basamunwina kw’antumwa, bayangalala kikilu. Yave wabalonga mpila yampa ya zingila, zingu kiakiese, kina y’ekani ye vuvu kia kusentu. Bena se mbandu ambote kwa yeto o unu, kadi batambulwila nsangu zambote yo sia Yave vana fulu kiantete muna zingu kiau.—Tanga 1 Tesalonika 1:8, 9; 2:13.

Yave otambulanga muna nsambil’andi awana bebembolanga nsambil’aluvunu. Avo otambulwidi e mbok’a Yave, okituka se nkundi andi, okala mosi muna asambidi a Yave yo vwa moyo a mvu ya mvu.—Tanga Maku 10:29, 30; 2 Korinto 6:17, 18.

4. O Nzambi aweyi ketwasila e kiese mu nza yawonso?

Nsangu zambote mu zaya vo lufwasu lwa nsambil’aluvunu lufinamene. Lutwasa luvevoko mu nza yawonso. E nsambil’aluvunu ke yibendomona diaka wantu ko ngatu kubavambula. Awonso bezinga ova nza besambila Nzambi mosi kaka aludi.—Tanga Lusengomono 18:20, 21; 21:3, 4.