Tala mambu

Tala ntu mia mambu

 LONGI DIA 14

Ekuma Nzambi Kasolela Nkangu?

Ekuma Nzambi Kasolela Nkangu?

1. Ekuma Nzambi kasolela Isaele se nkangu andi?

Nzambi wasola mbongo a Abarayama se nkangu andi yo kubavana nsiku. Wayikila zula kiaki vo “Isaele” yo kubavana kiyekwa kia tanina e nsambil’aludi ye diambu diandi. (Nkunga 147:19, 20) Muna mpila yayi, e zula yawonso yadi sambulwa mu kuma kia Isaele.—Tanga Etuku 22:18.

Nzambi wasola Aneyisaele kimana bakala se mbangi zandi. Lusansu lwau lusonganga e nsambu balenda vwa o wantu muna lemvokela nsiku mia Nzambi. (Nsiku 4:6) Muna lusadisu lwa Aneyisaele, esi zula yakaka badi zaya Nzambi aludi.—Tanga Yesaya 43:10, 12.

2. Ekuma Nzambi kasolela nkutakani y’Akristu?

Kuna kwalanda, Aneyisaele bavidisa edienga dia Nzambi. Yave wavingisa nkutakani y’Akristu vana fulu kia zula kiaki. (Matai 21:43; 23:37, 38) O unu, Akristu akieleka yau bena se mbangi za Yave vana fulu kia Aneyisaele.—Tanga Mavangu 15:14, 17.

Yesu wakubika alandi andi kimana basamuna nsangu zambote yo kitula wantu a zula yawonso s’alongoki. (Matai 10:7, 11; 24:14; 28:19, 20) Owau, e salu kiaki kilweke ku mfoko, ekolo kifinamanga e mbaninu a tandu kiaki. Wau i nkumbu antete muna lusansu lwa wantu, Yave kalungalakese mazunda ye mazunda ma wantu a zula yawonso muna nsambil’aludi. (Lusengomono 7:9, 10) Akristu akieleka besalanga entwadi mu kasakesa yo sadisa muntu yo nkw’andi. Mu nza yawonso, nkubika mosi belandanga ya malongi ma Nkand’a Nzambi muna tukutakanu twau.—Tanga Ayibere 10:24, 25.

 3. E nkubik’a Mbangi za Yave aweyi yayantikila mu lumbu yeto?

Muna mvu mia 1870, buka kiakete ki’alongoki a Nkand’a Nzambi bayantila sengomona ludi kia Nkand’a Nzambi kiaswekwanga se tuka kolo. Bazaya wo vo Yesu wasikidisa e nkutakani y’Akristu muna samuna nsangu zambote. Muna kuma kiaki, bayantika salu kia samuna nsangu zambote za Kintinu mu nza yawonso. Muna mvu wa 1931, bayantika kiyikila muna nkumbu a Mbangi za Yave.—Tanga Mavangu 1:8; 2:1, 4; 5:42.

4. E salu kia Mbangi za Yave aweyi kifidilwanga?

Muna tandu kiantete, e nkutakani z’Akristu mu nsi zayingi balandanga luludiku lwa buka kia selo yambuta kiazayanga vo Yesu i Ntu a nkutakani. (Mavangu 16:4, 5) Diau adimosi mpe o unu, Mbangi za Yave mu nza yawonso belandanga luludiku lwa Buka kia Selo Yambuta bena vo Akuluntu azikuka. Ampangi awaya befilanga e salu kisalwanga muna mavula ma Mbangi za Yave mesekolanga, nieteka yo kayanesa nkanda misasilanga Nkand’a Nzambi mu vioka 600 za ndinga. Muna mpila yayi, e Buka kia Selo Yambuta bevananga malongi ye luludiku lwa Nkand’a Nzambi kwa vioka 100.000 ma nkutakani mu nza yawonso. Muna konso nkutakani, muna ye mpangi z’akala zazikuka besalanga nze akuluntu yovo akengi. Ampangi awaya belunga-lunganga ekambi dia Nzambi kuna zola kwawonso.—Tanga 1 Petelo 5:2, 3.

Mbangi za Yave bekuyivananga muna salu kia samuna nsangu zambote yo kitula wantu s’alongoki. Nze una wavanganga antumwa, tusilanga umbangi mu mu nzo ye nzo. (Mavangu 20:20) Tulongokanga mpe Nkand’a Nzambi y’awana bezolanga e ludi. Kansi, Mbangi za Yave ke nkutakani kaka ko. Tuna nze wan’angudi bena ye Se dimosi dianzodi. Yeto awonso tusalaziananga nze mpangi z’akala ye z’akento. (2 Tesalonika 1:3) Wau vo Nkangu a Yave wasikidiswa mu yangidika Nzambi yo sadisa muntu yo nkw’andi, bena se nkangu usundidi e kiese ova nza.—Tanga Nkunga 33:12; Mavangu 20:35.