Tala mambu

Tala ntu mia mambu

 LONGI DIA 6

Nkia Vuvu Tuna Kiau mu Kuma kia Mafwa?

Nkia Vuvu Tuna Kiau mu Kuma kia Mafwa?

1. Azeyi i nsangu zambote mu kuma kia mafwa?

Vava Yesu kalwaka kuna Betania, lukufi ye Yerusaleme, o nkundi andi Lazaro wafwa se vioka lumbu yá. Yesu wayenda kuna ziami kumosi yo Mareta ye Maria, nsanga za Lazaro. Vana vau o nkangu ubalende. Nga olenda yindula e kiese kina Mareta yo Maria bamona vava Yesu kafula Lazaro?—Tanga Yoane 11:21-24, 38-44.

Mareta wazaya e nsangu zambote mu kuma kia mafwa. Wazaya wo vo Yave wasia nsilu wa fula mafwa kimana bazinga diaka ovo ntoto.—Tanga Yobi 14:14, 15.

2. Ayeyi i nkal’a mafwa?

Nzambi wavovesa Adami vo: “U ntoto wina, mu ntoto ovutuka.”—ETUKU 3:19.

O wantu mu ntoto bavangilwa. (Etuku 2:7; 3:19) Ke tuna ye mwanda ko usisanga e nitu yo zingila va fulu kiakaka. Nitu a kinsuni tuna wau, muna kuma kiaki ke tuna ye lekwa ko kikwamanananga zinga ku nima lufwa. Vava tufwanga, tomfo tweto ye ngindu zeto mpe zifwanga. Muna kuma kiaki, vava Lazaro kafuluka kavova kana diambu dimosi ko mu kuma kia lufwa lwandi, kadi mafwa ke bazeye diambu ko.—Tanga Nkunga 146:4; Kimpovi 9:5, 6, 10.

Nga Nzambi wantu kebangikanga kuna bilungi vava befwanga? Wau vo Nkand’a Nzambi usonganga vo mafwa ke bazeye diambu ko, elongi dia bilungi luvunu dilonganga mu kuma kia Nzambi. Nzambi omenganga e ngindu za bangika wantu kuna bilungi.—Tanga Yeremiya 7:31.

Tala e video O que acontece quando morremos?

 3. Nga tulenda mokena ye mafwa?

Amafwa ke balendi vova ko ngatu wá. (Nkunga 115:17) Kansi, mbasi zakaka zambi balenda mokena yo wantu yo kubakwikidisa vo mianda mia mafwa bemokenanga miau. (2 Petelo 2:4) Yave okutusimanga o mokena ye mafwa.—Tanga Nsiku 18:10, 11.

4. Nani osinga fulwa?

Ulolo wa wantu ana bafwa bevutuka zinga diaka ova ntoto. Kana nkutu awana ke bazaya Nzambi ko yo vanga mambu mambi, besinga fulwa.—Tanga Luka 23:43; Mavangu 24:15.

Awana befuluka belongoka e ludi mu kuma kia Nzambi yo songa lukwikilu muna Yesu muna kunlemvokelanga. (Lusengomono 20:11-13) Awana befuluka yo vanga oma mambote besinga zinga yakwele mvu ova ntoto.—Tanga Yoane 5:28, 29.

5. Lufuluku adieyi lukutusonganga mu kuma kia Yave?

Nzambi watuvana e vuvu mu kuma kia mafwa muna fila Mwan’andi kafwa mu kuma kieto. Muna kuma kiaki, lufuluku lukutusonganga o zola ye nkenda za Yave. Vava mafwa mefuluka, nani i muntu antete oyangalela mona?—Tanga Yoane 3:16; Roma 6:23.