Tala mambu

Tala ntu mia mambu

 LONGI DIA 4

Nani i Yesu Kristu?

Nani i Yesu Kristu?

1. E zingu kia Yesu aweyi kiayantikila?

Nkia fu ya Yesu yatuntanga wantu kwa yandi?—MATAI 11:29; MAKU 10:13-16.

Nswaswani yo wantu akaka, o Yesu una kayizidi ko ova ntoto, wateka zinga kun’ezulu nze vangwa kia mwanda. (Yoane 8:23) Yesu i vangwa kiantete kia Nzambi, wasadisa Nzambi muna sema lekwa yawonso. Yandi kaka wasemwa kwa yandi kibeni Yave, i kuma keyikilwanga vo Mwana “amosi kaka” a Nzambi. (Yoane 1:14) Yesu wakala mpe se Nkunzi a Nzambi. I kuma keyikilwanga vo “Diambu.”—Tanga Ngana 8:22, 23, 30; Kolosai 1:15, 16.

2. Ekuma Yesu kayizila ova ntoto?

O Nzambi wafila Mwan’andi ova ntoto muna sia moyo andi muna vumu kia Maria, mwenze wa mwisi Yuda. Muna kuma kiaki, Yesu kakala ye se dia kimuntu ko. (Luka 1:30-35) Yesu wayiza ova ntoto (1) muna longa e ludi mu kuma kia Nzambi, (2) muna songa mbandu ya una tulenda vangila luzolo lwa Nzambi kana nkutu vava tukalanga muna mpasi yo (3) vana moyo andi alunga se “lukûlu.”—Tanga Matai 20:28.

3. Ekuma tuvwididi lukûlu o mfunu?

Lukûlu i ntalu ifutwanga mu kûla muntu ozolele vondwa. (Luvaiku 21:29, 30) O lufwa ye kinunu ke kiakala ko mun’ekani dia Nzambi mu kuma kia wantu. Aweyi tuzayidi wo? Nzambi wavovesa Adami wa muntu antete vo, avo kavangidi dina diyikilwanga muna Nkand’a Nzambi vo “esumu,” fwa kefwa. Muna kuma kiaki, kele vo Adami kasumuka ko, kadi fwa ko. (Etuku 2:16, 17; 5:5) Mun’owu wa Nkand’a Nzambi, muna Adami i ‘mwakotela’ lufwa mu nza yawonso. Muna kuma kiaki, Adami wasambukisa esumu ye tumbu kia lufwa kwa wan’andi awonso. Lukûlu tuvwidi o mfunu muna kutuvevola muna tumbu kia lufwa twasambukiswa kwa Adami.—Tanga Roma 5:12; 6:23.

Nani wafwana futa lukûlu muna kutuvevola muna lufwa? Vava tufwanga, tumbu ki’esumu dia yeto kibeni tufutanga. Ka vena muntu walembi lunga ko olenda kûla akaka mun’esumu.—Tanga Nkunga 49:7-9.

4. Ekuma Yesu kafwila?

Nswaswani yo yeto, Yesu walunga kakala. Muna kuma kiaki, kafwila mu kuma ki’esumu diandi ko, kadi kasala vola esumu ko. Kansi wafwa mu kuma kia masumu ma wantu akaka. Nzambi wasonga zola kwandi kwampwena muna wantu, muna tuma Mwan’andi kafwa muna weto dieto. Yesu mpe wasonga zola muna lemvokela S’andi yo vana moyo andi mu kuma kia masumu meto.—Tanga Yoane 3:16; Roma 5:18, 19.

Tala e video Ekuma Yesu Kafwila?

5. Yesu adieyi kevanganga owau?

Vava kakala ova ntoto, Yesu wawuka mbevo, fula mafwa ye tanina wantu muna vonza. Wasonga mana kesinga vanga kuna sentu mu kuma kia wantu awonso alemvoka. (Matai 15:30, 31; Yoane 5:28) Vava Yesu kafwa, Nzambi wamfula nze vangwa kia mwanda. (1 Petelo 3:18) I bosi, Yesu wavingila kuna koko kwalunene kwa Nzambi yavana Yave kanyadika nze Ntinu a nza yawonso. (Ayibere 10:12, 13) Owau Yesu oyalanga se Ntinu kun’ezulu, alandi andi besamunanga e nsangu zazi mu nza yawonso.—Tanga Daniele 7:13, 14; Matai 24:14.

Ke kolo ko, Yesu osadila wisa kiandi kia Kintinu mu fokola mpasi zawonso y’awana betwasanga zo. Awonso bekwikilanga muna Yesu yo kunlemvokela, bevwa moyo muna paradiso ova ntoto.—Tanga Nkunga 37:9-11.