Tala mambu

Tala ntu mia mambu

 LONGI DIA 2

Nani i Nzambi?

Nani i Nzambi?

1. Ekuma tufwete sambidila Nzambi?

O Nzambi aludi i Mvangi a lekwa yawonso. Kena ye lubantiku ko, ke kala mpe ye nsuka ko. (Nkunga 90:2) Yandi i Nto a nsangu zambote zina muna Nkand’a Nzambi. (1 Timoteo 1:11) Wau vo Nzambi watuvanga, yandi kaka tufwete sambila.—Tanga Lusengomono 4:11.

2. Aweyi kena Nzambi?

Ka vena muntu ko wamona kala Nzambi, e kuma kadi Mwanda. Ediadi disonganga vo osundidi vangwa yawonso ya moyo ina ova nza. (Yoane 1:18; 4:24) Kana una vo i wau, tulenda zaya kiwuntu kia Nzambi muna lekwa kavanga. Kasikil’owu, vava tutalanga nsema wazala ye nti miyimanga bundu ye mvuma za mpila mu mpila, tubakulanga o zola ye ngangu zandi. O vonga kwa nsema kukutusonganga o nkum’a Nzambi.—Tanga Roma 1:20.

Tulenda longoka mayingi mu kuma kia kiwuntu kia Nzambi muna tanganga Nkand’a Nzambi. Kasikil’owu, Nkand’a Nzambi ukutuzayisanga mana Nzambi kezolanga ye mana kemenganga, mpila kekadilanga yo wantu ye mpila kesingikilanga mambu.—Tanga Nkunga 103:7-10.

3. Nga Nzambi una ye nkumbu?

Yesu wavova vo: “E S’eto koko’zulu, yambula nkumbu aku yazitiswa.” (Matai 6:9) Kana una vo Nzambi ovwidi mazina mayingi, nkumbu mosi kaka kena yau. Mu mpila yaswaswana iyikilwanga muna konso ndinga. Muna Kikongo tuyikilanga yo vo “Yave.”—Tanga Nkunga 83:18.

E nkumbu a Nzambi yakatulwa muna nsekola zayingi za Nkand’a Nzambi yo vingisa mazina nze Mfumu yovo Nzambi. Kansi vava kiasonekwa Nkand’a Nzambi, e nkumbu a Yave mu tezo kia 7.000 ma fulu yakala. Yesu wazayisanga nkumbu a Nzambi vava kalonganga oma ma Nzambi kwa wantu.—Tanga Yoane 17:26.

Tala e video Nga Nzambi una ye Nkumbu?

4. Nga Yave okutuvwanga kieleka mfunu?

Nze se diadi dianzodi, Nzambi otokananenga wete dieto

Nga ulolo wa mpasi bemonanga wantu zisonganga vo Nzambi ke kutuvwanga mfunu ko? Akaka bevovanga vo Nzambi oyambulanga vo twamona mpasi muna kututonta, kansi ediadi ke dialudi ko.—Tanga Yakobo 1:13.

Nzambi wavana wantu nswa wa kuyisolela. Nga ke tuyangalalanga ko wau twasola sadila Nzambi? (Yosua 24:15) Kansi, wantu ayingi besolanga vanga mambu mambi kw’akaka. Ekiaki i kuma mpasi ziwokelelanga. Yave okendalalanga vava kemonanga mambu mama mambi.—Tanga Etuku 6:5, 6.

Yave wa Nzambi okutuvwanga kikilu o mfunu. Ozolanga vo twakala ye kiese muna zingu. Ke kolo ko, osukisa e mpasi kumosi y’awana betwasanga zo. Nzambi ovwidi kuma kiasikila keyambulwilanga e mpasi mu fikolo. Muna Elongi dia 8, tulongoka e kuma keyambulwilanga e mpasi.—Tanga 2 Petelo 2:9; 3:7, 13.

5. Aweyi tulenda kadila ye ngwizani ambote yo Nzambi?

Yave okutubokelanga vo twamfinama muna mokenanga yandi muna sambu. Yave ovwanga konso muntu mu yeto o mfunu. (Nkunga 65:2; 145:18) Una y’etima dia kutuloloka. Omonanga e ngolo tuvanganga za kunyangidika, kana una vo ezak’e ntangwa tusumukanga. Muna kuma kiaki, tulenda kweto kala ye ngwizani ambote yo Nzambi kana una vo tu wantu alembi lunga.—Tanga Nkunga 103:12-14; Yakobo 4:8.

Wau vo Yave watuvanga, tufwete kunzolanga lutila nkutu una tuzolelanga wantu akaka. (Maku 12:30) Avo osongele zola muna Nzambi muna longokanga mayingi mu kuma kiandi yo vanga mana kezolanga, okala ye ngwizani ambote yo yandi.—Tanga 1 Timoteo 2:4; 1 Yoane 5:3.