Tala mambu

Tala ntu mia mambu

 KAPU KIA 14

Esi Nzo Aku Balenda Kala ye Kiese

Esi Nzo Aku Balenda Kala ye Kiese

1, 2. Adieyi Yave kazolele kwa esi nzo?

YAVE WA NZAMBI wavanga lukazalu lwantete. Bibila kikutuvovesanga vo Nzambi wavanga nkento antete yo “kuntwasa kwa yakala.” Adami wayangalala kikilu yo vova vo: “Ondioyu, i visi kia visi yame, nsuni a nsuni ame.” (Tuku 2:22, 23) Ediadi disongele vo Yave ozolele vo wantu bakala ye longo lwakiese.

2 Diankenda kikilu vo wantu ayingi ke bekalanga ye zingu kia nzo kiakiese ko. Kansi, Bibila kivuidi nkanikinu miayingi milenda sadisa awonso muna nzo mu kala ye zingu kia nzo kiasikila yo yangalela kala kumosi.—Luka 11:28.

ADIEYI O NZAMBI KELOMBANGA KWA AKALA?

3, 4. (a) Aweyi o yakala kafwete kadilanga yo nkaz’andi? (b) Ekuma dinina o mfunu kwa yakala yo nkento mu lolokanga muntu yo nkwandi?

3 Bibila kivovanga vo yakala diambote, kafwete zola yo zitisa o nkaz’andi. Dodokolo, tanga Efeso 5:25-29. Ntangwa zawonso, o yakala kafwete songanga zola kwa nkaz’andi. Kafwete kuntaninanga mpe yo kunlunga-lunga. Kalendi kumvanga konso diambu ko dilenda kuntwasila e mpasi.

4 Kansi adieyi o yakala kafwete vanga avo nkaz’andi ovangidi vilwa? Akala bevoveswanga vo: “Nuzolanga akazi eno, ke nubafungilanga makasi ma ndudi ko.” (Kolosai 3:19) Akala, nusungamena dio vo oyeno mpe vilwa  nuvanganga. Avo nuzolele vo Nzambi kanuloloka, nufwete lolokanga mpe akazi eno. (Matai 6:12, 14, 15) Vava yakala yo nkento bekalanga ye fu kia loloka muntu yo nkwandi, dikubasadisanga mu kala ye longo lwakiese.

5. Ekuma yakala kafwete zitisilanga o nkaz’andi?

5 Yave olombanga vo yakala kazitisanga o nkaz’andi. Katoma sianga e sungididi muna nsatu zandi. O lemvokela diambu diadi diamfunu kikilu. Kadi avo yakala ke toma lunga-lunganga nkaz’andi ko, dilenda fila Yave mu lembi wá e sambu yandi. (1 Petelo 3:7) E diambu dikitulanga o muntu se wamfunu kwa Yave, i zola kesonganga kwa yandi. Kuna kwa Nzambi o yakala kasundidi nkento ko.

6. O kala “nitu mosi,” aweyi disongele kwa nkento yo yakala?

6 Yesu wasasila vo yakala yo nkento “ke nwole diaka ko, kansi nitu mosi.” (Matai 19:6) O yakala yo nkento bafwete songanga e kwikizi kwa muntu yo nkwandi. (Ngana 5:15-21; Ayibere 13:4) Yakala yo nkento bafwete lungisanga e nsatu za vukana za muntu yo nkwandi. (1 Korinto 7:3-5) O yakala kafwete sungamenanga vo, “kavena muntu ko omenganga e nitu andi, kansi odikilanga yo lunga-lunga yo.” Muna kuma kiaki, yakala kafwete zolanga yo yangalela nkaz’andi. E diambu disundidi o mfunu i diadi, o nkento ozolanga vo nkaz’andi kakala nkwa ngemba yo toma kunzola.—Efeso 5:29.

ADIEYI NZAMBI KELOMBANGA KWA AKENTO?

7. Ekuma esi nzo bavuididi mfidi o mfunu?

7 Esi nzo awonso mfidi bavuidi o mfunu kakala se ntu muna nzo kimana basala kumosi mu mpila yambote. E sono kia 1 Korinto 11:3, kivovanga vo: “O ntu a konso yakala i Kristu; o ntu a nkento i yakala; o ntu a Kristu i Nzambi.”

8. Aweyi o nkento kalenda songela vumi kwa nkaz’andi?

 8 Akala awonso vilwa bevanganga. Kansi, vava nkento keyikamanga nzengo za nkaz’andi yo sala kumosi, esi nzo awonso bebakanga nluta. (1 Petelo 3:1-6) Bibila kivovanga vo: “Nkento kafwete toma zitisanga yakala diandi.” (Efeso 5:33) Adieyi tuvova avo yakala yo nkento ke besambilanga mu dibundu dimosi ko? Kana una vo i wau, o nkento kafwete zitisa o nkaz’andi. Bibila kivovanga vo: “Yeno akento, nusakalela akazi eno, kimana awana balembi lemvokelanga e Diambu dia Nzambi, babakilwa muna kadilu kia akento au, ke mu mvovo ko, wau bemonanga e kadilu kieno kiambote kumosi yo vumi.” (1 Petelo 3:1, 2) E mbandu ambote ya nkento ilenda sadisa yakala mu bakula yo zitisa mana nkaz’andi kekwikilanga.

9. (a) Adieyi kafwete vanga o nkento avo kayangalele ngindu za nkaz’andi ko? (b) Nkia luludiku mu kuma kia akento luna muna Tito 2:4, 5?

9 Adieyi o nkento kalenda vanga avo kayangalele ngindu za nkaz’andi ko? Kafwete songa ngindu zandi kuna  luzitu lwawonso. Kasikil’owu, ngindu za Abarayama ke zakala betela ko ye za Sara mu kuma kia diambu dimosi. Kansi kuna lutizu lwawonso, Sara wasonga e ngindu zandi ye Yave wavovesa Abarayama vo: “Wá e mvovo miandi.” (Tuku 21:9-12) Avo nzengo za yakala una vo Nkristu ke zikulwidi nsiku mia Bibila ko, o nkento kafwete yikama e nzengo zozo. (Mavangu 5:29; Efeso 5:24) O nkento ambote otoma lunga-lunganga esi nzo andi. (Tanga Tito 2:4, 5.) Vava nkaz’andi yo wana bemonanga e ngolo kevanganga, betoma kunzolanga yo kunzitisa.—Ngana 31:10, 28.

Aweyi Sara kenena se mbandu ambote kwa akento?

10. Adieyi Bibila kivovanga mu kuma kia vambana yo vonda longo?

10 Ezak’e ntangwa akazi bebakanga e nzengo za vambana yovo vonda longo mu nzaki. Kansi, Bibila kivovanga vo: “O nkento kafwete vambana yo nkaz’andi ko, . . . o yakala kafwete yambula nkaz’andi ko.” (1 Korinto 7:10, 11) Vena ye kuma ilenda fila akazi mu vambana, kansi o baka e nzengo zazi ke diambu diakete ko. Adieyi tuvova mu kuma kia vonda longo? Bibila kisonganga vo vena ye kuma kimosi kaka kifwete fila akazi mu vonda longo, i sia vo, vukana yo muntu una vo ke nkaz’andi ko.—Matai 19:9.

ADIEYI NZAMBI KELOMBANGA KWA MASE?

Yesu una se mbandu ambote kwa konso muntu muna nzo

11. Nkia diambu o wana betoma vuanga o mfunu?

11 Mase, nuvaulanga e ntangwa ya kala vamosi yo wan’eno. O wan’eno mfunu banuvuidi, kansi e diambu betoma vuanga o mfunu i kubalonga e ludi mu kuma kia Yave.—Nsiku 6:4-9.

12. Mu nkia diambu mase bafwete taninanga o wan’au?

12 E nza ya Satana mu yiva kaka ina. Vena ye wantu bevavanga vukumuna wan’eto yo vava kubaleka mu kingolo. Diampasi dikalanga kwa mase mankaka mu mokena  mambu mama yo wan’au. Kansi, mase bafwete lukisa wan’au mu kuma kia wantu awaya yo kubalonga una balenda kuyitanina. Mase, nufwete taninanga o wan’eno. *1 Petelo 5:8.

13. Aweyi mase bafwete longela o wan’au?

13 Mase, yeno luna ye mbebe ya longa o wan’eno una balenda songela e fu yambote. Aweyi nulenda wo vangila? Muna longanga wan’eno mambu mambote yo kubasingika avo diambu diambi bavangidi. Kansi, ke nufwete  wo vangila muna nsoki ko. (Yeremiya 30:11) Dianu vo, ke diambote ko mu vana e longi yovo singika wan’eno vava nukalanga ku makasi. Ke nuyambula ko vo e mvovo mieno miakala nze “nsosolo” yo lweka o wan’eno. (Ngana 12:18) Nulonga wan’eno babakula e kuma bafwete songelanga o nlemvo.—Efeso 6:4; Ayibere 12:9-11; tala e Mvovo Misasilu 30.

ADIEYI NZAMBI KELOMBANGA KWA WANA?

14, 15. Ekuma wana bafwete lemvokelanga mase mau?

14 Yesu walemvokelanga Se diandi ntangwa zawonso, kana nkutu vava diakalanga diampasi. (Luka 22:42; Yoane 8:28, 29) Yave olombanga mpe kwa wana vo balemvokelanga mase mau.—Efeso 6:1-3.

15 E wana, kana nkutu vava dikalanga diampasi mu lemvokela mase meno, nusungamena dio vo vava nulemvokanga, Yave ye mase meno bekunuyangalelanga. *Ngana 1:8; 6:20; 23:22-25.

Adieyi dilenda sadisa aleke mu songa kwikizi kwa Nzambi vava betontwanga mu vanga diambu diambi?

16. (a) Aweyi Satana ketontelanga aleke mu vanga mambu mambi? (b) Ekuma dinina o mfunu mu sola akundi ana bezolanga Yave?

16 Nkadi ampemba olenda sadila akundi eno ye aleke akaka mu kunutonta nuavanga mambu mambi. Satana ozeye wo vo dilenda kala diampasi mu zizidila e ntonta zazi. Kasikil’owu, Dina wa mwan’a Yakobo wakala ye akundi ana ke bazolanga Yave ko. Ediadi diatwasa mpasi zayingi kwa yandi ye kwa yitu yandi. (Tuku 34:1, 2) Avo akundi eno ke bezolanga Yave ko, balenda kunufila nuavanga diambu dina Yave kemenganga. Ediadi dilenda kunutwasila mpasi zayingi kumosi ye yitu yeno yo kendeleka Nzambi. (Ngana 17:21, 25) Ekiaki i kuma nufwete  vangila kaka kikundi ye awana bezolanga Yave.—1 Korinto 15:33.

ESI NZO AKU BALENDA KALA YE KIESE

17. Nkia mbebe kena yau konso muntu muna nzo?

17 Vava esi nzo belemvokelanga luludiku lwa Nzambi, bevenganga e mpasi ye mambu mankaka. Muna kuma kiaki, avo u yakala, zolanga o nkaz’aku, kadilanga yandi kuna zola. Avo u nkento, zitisanga o nkaz’aku yo kunsakalela, tanginina nkento oyikwanga muna Ngana 31:10-31. Avo nu mase, nulonga wan’eno bazola Nzambi. (Ngana 22:6) Avo u se, ‘toma ludikanga’ esi nzo aku. (1 Timoteo 3:4, 5; 5:8) Oyeno wana mpe nulemvokelanga mase meno. (Kolosai 3:20) Nusungamena dio vo konso muntu muna nzo olenda vanga vilwa. Muna kuma kiaki, nukala alembami yo lombanga ndoloki kwa muntu yo kwandi. Kieleka, Bibila kivuidi tuludiku twa Yave tulenda fila konso muntu muna nzo.

^ tini. 12 Olenda zaya diaka mayingi mu kuma kia mpila olenda tanina wan’aku muna nkanda Aprenda do Grande Instrutor kapu kia 32, wavaikiswa kwa Mbangi za Yave.

^ tini. 15 O wana ke bafwete lemvokela mase mau ko vava bekubalombanga bavanga diambu dikululanga nsiku a Nzambi.—Mavangu 5:29.