Tala mambu

Tala ntu mia mambu

Muna kubika e fulu kia bandulwila e fuka, vioka 27.500 ma yilu ya matadi manatwa kuna estudio ya Mongo Ebo

AWEYI USADILWANGA E NKAYILU MIENO?

Video za Lukutakanu lwa Mvivu lwa 2020, ‘Yangalalanga Ntangwa Zawonso’!

Video za Lukutakanu lwa Mvivu lwa 2020, ‘Yangalalanga Ntangwa Zawonso’!

Kia 10 kia AGOSITU, 2020

E video muna lukutakanu lweto lwa mvivu zitoma simbanga ntima mieto ye kutusadisa mu toma bakula malongi ma Bibila. Muna Lukutakanu lwa Mvivu lwa 2020, ‘Yangalalanga Ntangwa Zawonso’! mwasongwa 114 za video ye malongi 43 mafilwa kwa Selo Yambuta ye asadisi au. Nga ozeye ngolo zivangwanga ye ntalu a nzimbu zisadilwanga muna kubika e video zazi?

Tezo kia 900 z’ampangi mu nz’amvimba basadila ntangw’au ye ngangu zau mu vana lusadisu muna kubika e programa yayi. Vioka 100.000 ma ola baviokesa muna salu kiaki kia mvu miole. Kumosi ye 70.000 ma ola zavavuanga mu kubika fuka kia Bibila kia miniti 76 kina ye ntu a diambu vo: Nekemiya: “Kiese kia Yave I Swekameno Dieno Diangolo.”

Nze una ozeye, nzimbu zayingi zasadilwa muna lungisa nsatu za asadi awaya akwa mvevo, kumosi yo kubika fulu, salanganu ya umbangu ye nzo zavuanga o mfunu muna manisa e salu kiaki.

O mpangi Jared Gossman ona osadilanga muna Buka kia Audio/Video wavova vo: “E Buka kia Alongi muna Buka kia Selo Yambuta, bezolanga vo fulu yayingi ye fu ya kisi nsi yaswaswana yamoneka muna video zeto. Ediadi diamfunu kikilu, kadi e kintwadi kieto kia wan’angudi, kia nz’amvimba. Muna lungisa ekani diadi, buka 24 yasadidi entwadi muna nsi 11. Ampangi mu nz’amvimba muna toma sala e salu kiaki, nzimbu zayingi ye nkubameno zambote zavavuanga.”

Masini ye fulu yamfunu ivavuanga muna kubika video zankaka. Muna bong’e nona, e fulu kiakubikilwa e fuka Nekemiya: “Kiese kia Yave I Swekameno Dieno Diangolo,” kiatungilwa kuna mbazi a estudio ya Monte Ebo lukufi ye Patterson, Nova York, Estados Unidos de America. Muna toma sadila e nzimbu za nkayilu, ekolo kiaviengeswanga e fuka kia lusansu lwa Nekemiya, ampangi batunga yaka ilenda yalulwa. E yaka yayi ina nze yaka ya Yerusaleme yankulu. Konso yaka kiakala ye lá kwa meta 6, kiafukwa mabaya yo kuswa e tinta kimana kiakala nze matadi. E “yaka” yayi ilenda yalulwa yo sadilwa mu fulu yankaka, ediadi diakulula o lutangu lwa salanganu ya vuanga o mfunu. Kana una vo i wau, tezo kia 100.000 ma dolare mavavuanga muna kubika e salanganu ya bandulwila e fuka. *

Ozaya mawonso mama diwokesa o luyangalalu lweto muna lukutakanu lweto lwa mvivu lwa mvu wau. Tuna ye ziku vo mawonso mavangilu muna kubika e programa yayi, mevana nkembo kwa Yave omu nz’amvimba. Tunuvutwidi matondo muna tukau tweno nuvananga muna nzil’a donate.jw.org ye nzila zankaka mu yikama e salu kia nz’amvimba.

^ tini. 5 E fuka kia Nekemiya: “Kiese kia Yave I Swekameno Dieno Diangolo,” kiakubikwa vitila e COVID-19. Muna kolo kiakina o nsiku walembi finama muntu yo kwandi ke wakala ko.