Vioka bula-kati kwa asekodi a nkanda mieto ke besdilanga diaka ku Betele ko, kansi muna mavula ma salu kia sekola (RTO). Ekuma e nkubika yayi inina o mfunu? Nkia salanganu asekodi bavuidi o mfunu kimana batoma salanga e salu kiau kanele vo ke bena ku Betele ko? O yalula asekodi muna zunga ivovuanga e ndinga, aweyi ditwasilanga e nluta muna salu kiau kia sekola?

 E vula dia Salu kia Sekola disadisanga asekodi bakala muna zunga ina o nkangu uvovanga e ndinga ina besekolanga. Mpangi Karin, nsekodi a nding’a Alemão ya leboka wavova vo: “Tuka mena twayizila mu Vula dia Salu kia Sekola kwaku Cuauhtémoc, Chihuahua, México, yeto ya yeto asekodi mu nding’eto tumokenenanga, kia kala muna salu kia umbangi ye vava tukwenda sumbanga e lekwa. Nding’eto kaka tuwanga yo vova. Tuwanga mpe yingana ina ke twasidi wá ko se mvu miayingi. Muna nkanda mieto tukotesanga e mvovo mina o nkangu besadilanga muna moko yau.”

 Mpangi James, mosi muna asekodi a nding’a Frafa kuna Ghana, wavova vo, ezak’e ntangwa viangi kia esi Betele kemonanga. Kansi wakudikila vo: “Osadila kwaku Vula dia Salu kia Sekola, kiese kiayingi dikuntwasilanga. Osila umbangi muna nding’eto yo mona una o nkangu betambulwilanga e nsangu zambote, ditoma simbanga o ntim’ame.”

 Nkia mambu ampangi befimpanga vitila basola e zunga kitungilwa e Vula dia Salu kia Sekola? Mpangi Joseph, osadilanga muna Buka Kitalanga Mambu ma Ntungilu mu Nz’amvimba kuna Warwick, New York, U.S.A. wavova vo: “E diambu diampasi tunwananga diau i diadi: ke mu zunga yawonso ko mu vovuanga e ndinga muna ye kura yambote, maza ye internete isadisanga asekodi bakulumuna e nkanda misekolwa. Dianu vo, vitila twatunga e Vula dia Salu kia Sekola ke tufimpanga kaka zunga kimosi ko.”

 Muna lukufi, e mpila ya nzaki ye kivavanga nzimbu zayingi ko, i tungila e Vula dia Salu kia Sekola vana fulu kina e Seka dia Tukutakanu Twampwena, Seka dia Kintinu, yovo nzo ya misionário, muna lenda sadisa asekodi beza salanga yo vutuka muna nzo zau. Avo fulu yayi nkatu, ampangi balenda vewa o nswa wa sumba nzo zina ye fulu ya sadila kimana asekodi bazinga yo sadila mo. Avo mambu masobele, e nzo zazi zilenda tekwa yo sadila e nzimbu zazi muna salu yankaka.

Salanganu ya Salu

 Muna mvu wa salu wa 2020, milhões 13 za nzimbu za dólar twafuta muna sumba e salanganu ya Mavula ma Salu kia Sekola. Asekodi computador bavuinga o mfunu ye programa zandi, salanganu ya áudio e vídeo, internete yambote, kura, maza ye mankaka mpe. Computador ya nsekodi mosi ilenda sumbilwa mu 750 ma dólar. Muna computador zazi mu koteswanga programa zifutilwanga nzimbu, kumosi mpe ye WTS, programa yasokwa kwa Mbangi za Yave isadisanga asekodi batoma kubikanga e salu kiau yo vavulula mambu mu nzaki zawonso.

 Asekodi besumbilwanga mpe salanganu ya bandulwila e audio za mambu besekolanga. E sadilwa yayi yatomene sadisa asekodi vava kia bundumukini e vuku kia COVID-19, ndonga muna yau banata e salanganu yayi kuna nzo zau yo kwamanana bandula e audio za nkanda ye video basekolanga.

 Mpangi zayingi besadilwanga muna fimpa e nkanda misekolwanga yo lunga-lunga e Vula dia Salu kia Sekola. Cristin, osadilanga kuna Vula dia Salu kia Sekola kia nding’a Afrikaans kuna Cidade do Cabo, África do Sul, wavova vo: “Ateleki ayingi ye aviti a nzila a ngonde ke ngonde bevewanga e lau dia sadila e ngangu zau mu salu kiaki.”

 Mpangi zazi bekuyivananga kuna mvevo ye kiese kiawonso. Mpangi mosi a nkento ovananga o moko kuna Vula dia Salu kia Sekola wavova vo: “Osadila va fulu kiaki dikumpuvikanga e ngindu yo kunkumika.” Mpangi zankaka mpe besadisanga e ndinga zau muna bandula e audio. Juana, nsekodi a nding’a Totonac muna mbanz’a Veracruz, kuna México, wavova vo: “Wau twina lukufi ye mbanza ivovanga e nding’eto, diasazu dikalanga kwa mpangi zayingi mu yikama e salu kia bandula e audio za nkanda ye video zeto.”

 Nga e Mavula ma Salu kia Nsekola mesadisi muna tomesa e salu kia sekola? Mafunda ma atangi a nkanda mieto bavovele vo, elo. Mpangi Cédric, osadilanga muna buka kia asekodi a nding’a Kongo, kuna República Democrática do Congo, wavova vo: “Mpangi zankaka bayikilanga e mpila twasekolwelanga e nding’a Kongo vo ‘Kongo kia nkanda mia Mbangi za Yave,’ kadi ke kia sonamanga mu mpila yambote ko. Kansi o wau, ampangi bevovanga vo e nkanda mieto misekolwanga muna Kongo kiampa, kina e betela ye mpila ina o nkangu bevovelanga muna moko yau ya lumbu ke lumbu.”

 Mpangi Andile, osadilanga muna buka kia asekodi a nding’a Xhosa kuna África do Sul, wa wá mpe e mvovo mia mpila yayi, wavova vo: “Mpangi zayingi batuvovesa vo nsobani ivangamene muna mpila tusekolelanga nkanda mieto. Twamona vo kana nkutu yindende ina yazolanga tanga e Eyingidilu dia Kingelezo, o wau mu Xhosa betangilanga dio. Betoma yangalelanga e mvovo mia leboka misadilu muna sekola e Bibila kia Nsekola ya Nz’ampa ya fimpulwilu.”

 E nzimbu zawonso zisadilwanga muna tunga yo lunga-lunga Mavula ma Salu kia Sekola mu tukau twa mvevo zitukanga tuna ampangi bevananga muna yikama e salu kieto muna nza yawonso kumosi yo tukau tuvaninwanga muna nzil’eto ya internete donate.jw.org.