Vava tukuyisilanga makani ma mwanda, tusadilanga ngolo zeto mu mpila yambote. (1 Kor. 9:26) O kuyisila makani ma mwanda dikutusadisanga mu toma sadila e ntangwa isidi vitila e mbaninu a tandu kiaki. (Efe. 5:15, 16) Muna nsambil’eno ya esi nzo, nulenda badika e makani ma mwanda nulenda kuyisila muna mvu wampa wa salu. O nkanda wau wa malongi una ye malongi mamfunu malenda kunusadisa mu kuyisila makani ma mwanda yo samba mu kuma kia makani mama.—Yak. 1:5.

Kasikil’owu, muna lusadisu lwa esi nzo eno, nga mosi muna yeno olenda sala se mviti a nzila a ngonde ke ngonde? Avo lukatikisu una lwau kana vo olenda lungisa e ola zilombwanga, olenda mokena ye aviti a nzila akaka ana bena ye zingu kiafwanana ye kiaku. (Nga. 15:22) Olenda mpe mokena yo mviti a nzila mosi muna nsambil’eno ya esi nzo. I bosi, yindula yo soneka muna manaka maku mana olenda vanga. Avo wasala kala se mviti a nzila, fimpa e zingu kiaku mu zaya kana vo olenda vutuka sala diaka e salu kiaki.

Nga vena ye muntu muna nzo eno olenda sala se mviti a nzila ansadisi mu ngonde mosi yovo vioka? Kana nkutu vo kuna diaka ye nkuma wafwana ko, olenda kwaku sala se mviti a nzila ansadisi muna salanga ola zakete muna salu kia umbangi konso lumbu. Avo kukalanga ye ntangwa yayingi ko muna kati kwa lumingu mu kuma kia salu kiaku yovo sikola, nanga olenda sola e ngonde ina ye lumbu ya vundu yovo ngonde ina ye nsuk’a tumingu tanu. Soneka muna manaka maku e ngonde ozolele sala se mviti a nzila ansadisi yo vanga e nkubika.—Nga. 21:5.

TALA E VIDEO, NUKALA YO UNKABU—AVITI A NZILA. I BOSI, VANA E MVUTU ZA YUVU ILENDE:

• Aweyi Yave kasambulwila e ngolo za mpangi Aamand za sala se mviti a nzila a ngonde ke ngonde? Ediadi adieyi ditulongele?