Ke kolo ko, o luzindalalu lwa Yave mu kuma kia nza yayi lusinga fokoka. E nsambila zaluvunu zifwaswa, e kintwadi kia zula kinuanisa nkangu a Nzambi. I bosi, Yave ofwasa yimpumbulu muna Armangedo. Akristu bevingilanga ye kiese kiawonso e ntangwa ina o mambu mama mevangama.

Dialudi vo ke tuzeye mawonso ko mu kuma kia mpasi zayingi. Kasikil’owu, ke tuzeye ko kana nkia ntangwa kikilu ziyantika. Ke tuzeye ko kana nki kifila ayadi mu fwasa e nsambila zaluvunu. Ke tuzeye ko kana kolo kwa e kintwadi kia zula kinuanisa nkangu a Yave. Ke tuzeye mpe ko kana nki kesadila o Yave muna fwasa e yimpumbulu muna Armangedo.

Kana una vo i wau, Bibila kikutuzayisanga mawonso tuvuidi o mfunu muna kala ye vuvu yo unkabu muna zizidila o mambu mevangama kuna sentu. Kasikil’owu, tuzeye wo vo ku mfoko a “lumbu yambaninu” tuzingilanga. (2 Tim. 3:1) Tuzeye wo vo o lufwasu lwa nsambil’aluvunu ‘lukufikwa’ kimana e nsambil’aludi yalembi fwaswa. (Mat. 24:22) Tuzeye wo vo Yave ovuluza nkangu andi. (2 Pet. 2:9) Tuzeye wo mpe vo Ndiona kasola o Yave muna fwasa e yimpumbulu yo tanina e ndong’ayingi muna Armangedo nkwa unsongi yo nkuma.—Lus. 19:11, 15, 16.

O mambu mevangama kuna ntwala mefila o wantu mu fwa e “kiambu yo wonga.” Kansi, avo tutangidi yo badika mavangu ma mpuluz’a Yave kuna nz’ankulu ye mana kesengomonanga mu kuma kia kusentu, ‘tutelama yo vumbula e ntu mieto’ ye vuvu kia sia vo luvuluzu lweto lufinamene.—Luka 21:26, 28.