O nkundi i “muntu tutoma zolanga yovo zitisa.” Kasikil’owu, Yonatane yo Davidi bayantika kituka akundi akieleka vava Davidi kavonda Ngoleyate. (1 Sam. 18:1) Konso muntu muna yau wasonganga e fu kiatunta o nkwandi mu zola kala nkundi andi. Ozevo, muna kala ye kikundi kiasikila yo muntu divavanga vo twatoma kunzaya. Ediadi ntangwa ye ngolo divavanga. Muna internete, o wantu bevanganga kikundi muna bosa kaka e nkumbu a muntu. Wau vo muna internete o wantu balenda kubika mana bevova yo zaya una akaka bekubabadikila, dilenda kala diasazu mu sweka e mpila wantu bena. Muna kuma kiaki, diambote mu toma yindula e mpila wantu tuzolele vanga yau kikundi. Kukadi ye wonga ko wa kendeleka muntu avo kutambulwidi ndomb’andi ko ya vanga yandi kikundi wau vo kutomene kunzaya ko. Ozevo, avo obakidi e nzengo za vanga kikundi muna internete, nkia diambu ofwete sungamena?

TALA E VIDEO, KALA YE NGANGU MUNA SADILA INTERNETE. I BOSI, VANA E MVUTU ZA YUVU ILENDE:

• Nkia mambu ofwete yindula vitila wasia mafoto ye nkomena muna internete?

• Ekuma ofwete toma solela akundi aku muna internete?

• Ekuma ofwete kadila ye tezo mu kuma kia ntangwa oviokesanga muna internete?—Efe. 5:15, 16