Yobi 12:1-25
12 Yobi ovutwidi vo:
2 “Kieleka, oyeno nuzeye mawonso,*E ngangu zifwa yeno!
3 Kansi, mono mpe ngina ye umbakuzi.*
Yeno ke nunsundidi ko.
Nani olembele zaya mambu mama?
4 Nkitukidi se kuma kia sevelwa kwa akwame,+Muntu obokelanga Nzambi yo vingila vo kamvana e mvutu.+
O nsongi yo munkondwa tumbu okitukidi se kuma kia sevelwa.
5 O muntu una ye zingu kiasikila, osevanga awana bemonanga e mpasi,Oyindulanga vo wantu ambi kaka* bebwilwanga mpasi.
6 E saba ya mivi yavuvama,+Awana befungisanga Nzambi makasi mu luvuvamu bena,+Awana bena ye nzambi zau vana moko.
7 Ozevo, yuvula e bulu, ikulonga;Ye nuni za zulu mpe, zikuzayisa.
8 Yovo tala* e nza, ikulonga;Ye mbizi za kalunga zikuzayisa dio.
9 Muna awaya awonso nani lembele wo zayaVo koko kwa Yave kuvangidi wo?
10 E mioyo mia vangwa yawonso yamoyo mina vana moko mandiYo mwand’a wantu awonso.*+
11 Nga ke kutu ko kutezanga mambuNze una lulaka* luyelekelanga madia?+
12 Nga e ngangu ke zina kwa anunu ko,+Ye umbakuzi muna zingu kianda?
13 Oyandi una ye ngangu yo nkuma;+Una ye longi ye umbakuzi.+
14 Avo obangwidi e lekwa, ke kitungululwa ko;+Kina kakangidi, ke muntu ko olenda kio ziula.
15 Avo okakidi maza, yawonso iyuma;+Avo otwikidi mo, mezadisa e nza.+
16 Oyandi una ye nkuma ye ngangu;+O mbendomoki yo mbendomoni bena vana moko mandi;
17 Oyambulanga vo aludiki bakangalela ye malu makondwa nsampatu,*
Okitulanga afundisi se mazowa.+
18 Okutulula tuvambu twa atinu,+Okanga tuketo twau e mponda.
19 Oyambula vo nganga bakangalela ye malu makondwa nsampatu,+Yo bwisa akwa wisa ana basikila;+
20 Okanganga nua mia aludiki bebundwanga e vuvuYo katula ngangu za anunu;*
21 Otiamuna luvezo muna akwa tunda,+Yo zezesa akwa ngolo;*
22 Osengomona mambu masina ma tombe,+Otemesa ntemo vana vena tombe kin’e bu;
23 Owokesa e zula kimana kafwasa yo;Owokesa e zula kimana kabafila muna kinkole.
24 Okatula umbakuzi* kw’afidi a nkanguYo kubayunganesa muna makanga makondwa nzila.+
25 Bebabatanga muna tombe+ kia kondwa ntemo;Okubayunganesanga nze wantu bakolelo malavu.+
Mvovo vana yand'a lukaya
^ Yovo “ngiambuk’a moyo.”
^ Mvovo wa sina: “yeno i nkangu.”
^ Mvovo wa sina: “yo ntima.”
^ Mvovo wa sina: “awana kaka bezakamanga malu.”
^ Nanga, “vovesa.”
^ Mvovo wa sina: “fulumwinu kia wantu awonso.”
^ Yovo “lubini.”
^ Yovo “basanzwa.”
^ Yovo “akuluntu.”
^ Mvovo wa sina: “Ozezesa mponda z’akwa ngolo.”
