Yobi 1:1-22

  • Ziku ye kimvuama kia Yobi (1-5)

  • Satana okatikisi makani ma Yobi (6-12)

  • Yobi ovidisi mavua ye wan’andi (13-19)

  • Yobi kasidi tumba Yave ko (20-22)

1  Muna nsi ya Usi mwakala yo muntu, nkumbu andi Yobi.*+ Nkwa ziku yo unsongi;*+ wavuminanga Nzambi yo venga mambu mambi.+  Wana nsambwadi amakala kawuta ye wana tatu amakento.  Wakala ye 7.000 ma mameme, 3.000 ma samo, 1.000 dia ngombe* ye 500 za mabuluku* ye ulolo wa ntaudi, muntu anene kakala vana vena nkangu awonso a Este.  Wan’andi amakala balambisanga e lambu, konso muntu muna nzo andi, muna lumbu kiandi kiasikdiswa. Babokelanga nsanga zau tatu, kimana badia yo nua yau.  Vava lumbu ya lambu yaviokanga, Yobi wababokelanga muna kubavelelesa. Wasikamanga mu mene-mene yo tambika yimenga ya ngioka+ mu kuma kiau. Kadi Yobi wavovanga vo: “Dilenda kala vo wan’ame basumukini yo tianguna Nzambi muna ntima miau.” I wau Yobi kavanganga ntangwa zawonso.+  Lumbu kimosi, vava wan’a Nzambi aludi*+ bakota muna kuyisunzula vana ndose a Yave,+ Satana+ mpe okotele vana kati kwau.+  I bosi, Yave oyuvuidi Satana vo: “Akweyi otuka?” Satana ovutwidi Yave vo: “Mu vumvula vana ntoto yo kangalela vo.”+  Yave ovovese Satana vo: “Nga omwene* selo kiame Yobi? Kavena muntu ko ofwanane yandi va ntoto. Nkwa unsongi*+ yo kwikama, ovuminanga Nzambi yo venga mambu mambi.”  Muna kuma kiaki, Satana ovutwidi Yave vo: “Nga mu nkatu Yobi kevuminanga Nzambi e?+ 10  Oyandi ye nzo andi ye lekwa yawonso kena yau, nga kuzietese yo lûmbu ko e?+ Wasambula e salu ya moko mandi,+ e twelezi yandi iwokelanga kikilu muna nsi. 11  Kansi owau, lambula koko kwaku yo katula yawonso kena yau, kieleka okutianguna vana ndose aku.” 12  I bosi, Yave ovovese Satana vo: “Tala, yawonso kena yau ina vana moko maku.* Kansi, yandi kibeni kumviakani ko!” Muna diadi Satana okatukidi vana ndose a Yave.+ 13  Lumbu kimosi wan’andi amakala ye amakento badianga yo nua vinyu muna nzo a mpangi au ambuta,+ 14  o nati a nsangu olweke kwa Yobi, ovovele vo: “Ekolo ngombe zivatidingi ye mabuluku madidingi vana ndambu, 15  Aneseba babalwakidi, banete yau awonso, bavondele mpe ntaudi zaku muna nsosolo. Mono mosi kaka mvukidi muna kuzayisa wo.” 16  Wau kavovanga, wankaka olweke, ovovele vo: “Tiya twa Nzambi* tutukidi kuna zulu, tuyokele mameme ye ntaudi, tuzinisi yau awonso! Mono mosi kaka mvukidi muna kuzayisa wo.” 17  Wau kavovanga, wankaka olweke, ovovele vo: “Akaladi+ bezidi mu buka tatu, bakutumwini samo, babanete, bavondele ntaudi zaku muna nsosolo. Mono mosi kaka mvukidi muna kuzayisa wo.” 18  Wau kavovanga, wankaka olweke, ovovele vo: “Wan’aku amakala ye amakento vava badidingi yo nua vinyu muna nzo a mpangi au ambuta, 19  kuna kinsalukisa, tembwa kiangolo kitukidi muna makanga kiwandamene muna konko yau yá ya nzo, e nzo ibwididi aleke, bafwidi. Mono mosi kaka mvukidi muna kuzayisa wo.” 20  Ozevo, Yobi otelamene, otiazwini mvuatu miandi, ozengele nsuki za ntu andi; i bosi obwidi vana ntoto, ofukamene, 21  ovovele vo: “Nkonga* yavaika muna vumu kia ngudi ame,Nkonga mpe ivutuka.+ Yave ovene,+ Yave okatwidi. Yambula nkumbu a Yave yakwamanana kembelwa.” 22  Muna mawonso mama, Yobi kasidi sumuka ko ngatu vova vo Nzambi mbi kavangidi.*

Mvovo vana yand'a lukaya

Nanga ina ye nsasa vo: “Lekwa Kiamengwa.”
Yovo “kondwa tumbu.”
Mvovo wa sina: “500 za vangu ya ngombe.”
Mvovo wa sina: “mabuluku mankento.”
Mvovo wa kingana kia Kiyibere, wan’a Nzambi uyikanga, i sia vo, ambasi.
Mvovo wa sina “Nga osidi ntim’aku muna.”
Yovo “Wakondwa tumbu, muntu ambote.”
Yovo “muna wisa kiaku.”
Nanga, “Nsemo.”
Yovo “Kimpene.”
Yovo “ngatu yikila Nzambi diambu diambi.”