Yeremiya 25:1-38

  • Yave ofundisi e zula (1-38)

    • Zula isadila Babele mu 70 lwa mvu (11)

    • Mbungw’a vinyu a makasi ma Nzambi (15)

    • Lufwasu muna zula ye zula (32)

    • Awana bevondwa kwa Yave (33)

25  Muna mvu wayá wa luyalu lwa Yoyakime+ wa mwan’a Yosiya wa Ntinu a Yuda, i sia vo, muna mvu wantete wa luyalu lwa Nebukandesa* wa ntinu a Babele, o Yeremiya otambwidi diambu mu kuma kia nkangu awonso a Yuda.  I wau wuwu kavovele o Yeremiya wa ngunza mu kuma kia* nkangu wawonso wa Yuda y’esi Yerusaleme awonso:  “Tuka muna mvu wa 13 wa luyalu lwa Yosiya wa mwan’a Amone,+ wa ntinu a Yuda, yamu unu kiaki, se mvu 23 itambulanga e diambu dia Yave. Ikunuvovesanga ntangwa ke ntangwa* kansi oyeno ke nuwanga ko.+  O Yave otumini ntaudi zandi zawonso angunza kwa yeno, okubatumanga ntangwa ke ntangwa,* kansi oyeno ke nuwanga ko ngatu tamba o matu nuawá.+  Banuvovesanga vo: ‘Dodokolo, nuviluka wau konso muntu muna nzila zandi zambi yo mavangu mandi mambi;+ ozevo, i nkala nukala kolo kiandá mwamu nsi ina Yave kavana kwa yeno ye kwa mase meno tuka kuna nz’ankulu.  Ke nulandi nzambi zankaka ko, nuabasadila yo kubakunda yo kunkendeleka muna salu kia moko meno; avo ke wau ko, lufwasu ikunutwasila.’  “‘Kansi, oyeno ke nuangwila ko,’ u kavovele o Yave. ‘Nuankendeleka muna salu kia moko meno yo kuyitwasila e mpasi.’+  “I dianu vo, i wau wuwu kavovele o Yave a vu: ‘“Wau vo ke nuwidi mambu mame ko,  tumisa itumisa makanda mawonso ma node,”+ u kavovele o Yave, “itumisa Nebukandesa* wa Ntinu a Babele wa selo kiame,+ ikubatwasa bafwasa e nsi yayi+ ye nkangu andi ye zula yawonso izungidi.+ Ikubafwatakesa yo kubakitula se kuma kia zakamena ye kia sikila mumpiozi, ikitula yo mpe se mazumbu yakwele mvu. 10  Isukisa nding’a nkembo, nding’a kiese vana bena,+ nding’a toko diansompi ye nding’a ndumb’ansompi+ yo mazu ma nikinua ye ntemo a mîni. 11  E nsi yayi yawonso ikituka se mfuta ye kuma kia zakamena, e zula yayi isadila ntinu a Babele mu 70 lwa mvu.”’+ 12  “‘Kansi, o 70 lwa mvu vava lulunga,+ itumba ntinu a Babele ye zula kiakina muna kuma kia bi wau,’+ u kavovele o Yave, e nsi ya Akaladi ‘ikitula yo se mfuta yakwele mvu.+ 13  Muna nsi yayina, itwasa o mambu mame mawonso mana yavova ye mawonso masonama mu nkanda wau mana kasakula Yeremiya mu kuma kia zula yayi yawonso. 14  Kadi zula yayingi ye atinu anene+ bekubakitula se abundu au,+ ikubavutulwila mun’owu wa mavangu mau ye salu kia moko mau.’”+ 15  Kadi i wau wuwu kampovese o Yave wa Nzambi a Isaele: “Tambula e mbungw’a vinyu ya makasi mame ova koko kwame, nuika yo kwa zula yawonso ina itumini. 16  Benua, benikuka oku yo kuna, bekala nze lau mu kuma kia nsosolo una itwika vana bena.”+ 17  Dianu vo, ntambwidi e mbungwa vana koko kwa Yave, nduikini yo kwa zula yawonso ina Yave kantumini:+ 18  Tuka muna Yerusaleme ye mbanza za Yuda,+ atinu au ye akuluntu au, yabakitula se mfuta, kuma kia zakamena yo sivika ye sibu+ nze owu wina o unu kiaki; 19  i bosi Faro wa ntinu a Engipito ye ntaudi zandi, akuluntu, yo nkangu andi wawonso,+ 20  ye nkangu miawonso mia nsi zankaka vana bena; atinu awonso a nsi a Usi; atinu awonso a nsi ya Afelesetia,+ Asekelone,+ Ngaza, Ekerone ye nsadidila ya Asedode; 21  Edome,+ Moabe,+ ye Anemone;+ 22  atinu awonso a Turo, atinu awonso a Sidone+ ye atinu awonso a sanga ya kalunga; 23  Dedane,+ Tema, Buzi ye awonso ana bazengwa e nsuki vana ndambu a matu;+ 24  atinu awonso a Arabia+ ye atinu awonso a nkangu mia nsi zankaka ana bekalanga muna makanga; 25  atinu awonso a Zimere, atinu awonso a Elame+ ye atinu awonso a Madai;+ 26  atinu awonso a node bena kwandá ye ana bafinamene, mosi-mosi ye yintinu yawonso yankaka ya nza ina ova ntoto; o ntinu a Sesake*+ okubalandila muna nua. 27  “Ubavovesa vo: ‘I wau wuwu kavovele o Yave a vu, wa Nzambi a Isaele: “Nunua, nukolwa, nuluka yo bwa yavana ke nulenda telama diaka ko+ muna kuma kia nsosolo una itwika vovo lwina.”’ 28  Avo ke bazolele tambula e mbungwa ko vana koko kwaku kimana banua, ubavovesa vo: ‘I wau wuwu kavovele o Yave a vu: “Nufwete yo nua! 29  Kadi, avo ngiantikidi twasa lufwasu muna mbanza iyikilwanga nkumbu ame,+ nga yeno ke nutumbwa ko e?”’+ “‘Oyeno tumbwa nutumbwa, kadi mbokelese nsosolo wabukumuna wantu awonso a nza,’ u kavovele o Yave a vu. 30  “Ubasakulwila mambu mama mawonso, oku vo: ‘Tuka kuna zulu Yave otatula e ndinga,Tuka muna saba kiandi kiavauka owisa e nding’andi. Obamina e kalu kiandi. Okaza nze awana bediatakesanga bundu ya vinyu,Oyimbidila nkung’a nsundidi kwa wantu a nza yawonso.’ 31  ‘E zú dilwaka yakuna nsuk’a nza,Kadi o Yave mfundu kena wau ye zula. Yandi kibeni ofundisa wantu awonso.*+ Vo i yimpumbulu vana kekubavana kwa nsololo,’ u kavovele o Yave. 32  I wau wuwu kavovele o Yave a vu: ‘Nutala, lufwasu lusayananga muna zula ye zula,+E tembwa kiangolo kivaikiswa tuka muna nsuka za nza.+ 33  “‘Muna lumbu kiakina, awana bevondwa kwa Yave bekala tuka nsuka mosi ya nza yakuna nsuka yankaka ya nza. Ke bedilwa ko yovo kutikwa ngatu zikwa. Bekala nze mbole vana ntoto.’ 34  Nuyayana yo kaza, yeno avungudi! Nulengomoka vana ntoto, yeno mfumu za makambi,Kadi e lumbu kina nuvondwa yo mwanganeswa kilweke,Nubwa yo wudika nze kinzu kiambote kia tûma! 35  Avungudi ke bena ye fulu kia tinina ko,E mfumu za makambi mpe ke bena ye kuna betinina ko. 36  Nuwá! I kazu kia avungudiYe dilu kia mfumu za makambi,Kadi Yave ofwasakese madilu mau. 37  E fulu yavuvama ya zingila ke isidi ye zingu koMuna kuma kia nsita za makasi ma Yave. 38  Osisidi e swekameno diandi nze mwan’a nkosi,*+Kadi e nsi au ikitukidi se kuma kia zakamenaMuna kuma kia nsosolo a nsokiYe nsita za makasi mandi.”

Mvovo vana yand'a lukaya

Mvovo wa sina: “Nebukadrezare,” mpila yankaka yasonekena yo.
Yovo “kwa.”
Mvovo wa sina: “Ibundumukanga muna mene-mene yo vova.”
Mvovo wa sina: “okubabundumunanga muna mene-mene yo kubatuma.”
Mvovo wa sina: “Nebukadrezare,” mpila yankaka ya sonekena yo.
Eyayi nanga i nkumbu a Babele (Babilone) yasonekwa mu sono ya kinsweki.
Mvovo wa sina: “nitu zawonso.”
Yovo “mwan’a nkosi a mika miayingi muna nsingu.”